حبيباتي غلا ورحا!! أسمكم على نفس الوزن ومشكلتكم و حده!!

انا نفس الشي عانيت من هالمشكلة احنا في العين ما عندنا مكان نطلع نروح له!!
يعني حتى مطعم ما نقدر نروح!! الوضع العام ما يشجع!!

قبل كنت انا وزوجي ما نطلع إلا دبي ولا أبوظبي !! كل اسبوعين ثلاثه رحنا دبي
وتمشينا !! بس بصراحه انا من حملت ما أقدر أروح اماكن بعيده!!!
وكان نفس الشي يقولي ويين بنطلع بنروح يعني؟؟؟؟؟؟؟؟؟؟

ابديها بتمشيه انتي وياه بس في السيارة ومروا خذولكم عصير!!
بتقولون امحق تمشيه!!

بداية الغيث قطرة

انا بديتها بهالطريقة في العين
شوي شوي قمنا نروح منتزه نتمشى، شوي وداني مطعم، شوي اقترح
علي نحجز في فندق عندنا فوق الجبل.. مكانه حلو واتوقع انه بيكون
رومانسي خصوصاً يوم تقومين الصبح وتشوفين المدينة كلها تحتج
بس أجلناها عندي عرس هالأسبوع!! يعني بديتها بتمشية وعصير
ووصلنا اننا طلعنا اماكن وايد ممكن نروح لها من بعد ماهو اللي كان
يقول ويين بنروح؟

حطوا في بالكم بنات لا تقترحووووون لاتقولين ودنا فندق أو ودنا المنتزه
الفلاني !!! بيقولج لا الوضع هناك ما يناسب!! شيودينا!!!! ويكون الريال
أساساً ماهو عارف وشو الوضع هناك؟ بس يخاف يقولج أوكي أو بسأل
عن المكان وتحطين آمال يخاف يوديج هالمكان يطلع مكان مب لايق وينحرج
مايحبون يغامرون مع حريمهم!! ابديها انه ما تفرق معاج ...... ابديها
خاطري بالعصير الفلاني !! أو بيطلع يشتري غرض روحي معاه لأي
عذر .. عوديه انه وجودج خفيف معاه بالعكس عوديه انه وجودج حلو
يعني لا طلعتوا في السيارة تغزلي فيه أو فتحي موضوع حلو
عنه .. شوي شوي حسسيه أنه اجواء الطلعه حلوه له هو!!
بتلقينه بعدها بروحه يقولج بروح اشتري خبز تروحين معاي؟؟؟؟؟

"""كلكم تعرفون الريايل يبغيلهم مساااااايس"""

هذه حكمه لو كلنا نفهمها ونطبقها زين كان تغير الحال

الحمد لله انا من النوع اللي ما احب اطلع ابد
خاصة معاه
مليت من كثر ما اقوله طلعنا خلنا نتمشى
حتى المساايير ما احب
ولان ما عندي اهل هنا اقعد على النت او العب مع عيالي احسن

روحــ لك ـــي
مب هذي هي المصيبة
المصيبة انه ما يقدر اييلس مكان واحد وهو واعي تماماً لمدة تزيد عن الساعه إلا في الدوام وحتى دوامه في يتنقل في 3 دوائر يومياً وكل دائرة يتم فيها ساعتين

بعد الدوام يرد البيت يتغدى ويا إنه يرقد أو يطلع يتمشى اي مكان والمغرب عالقهوة وما يرد إلا يوم يكون هلكان ويبا يرقد ....

ونحنا (انا وعيالي) ميتين ملل

لاتشكون لي ابكي لكم..
يالله الستر والعافيه..
اغلب الرجال كذا خاصه اللي
جاهم عيال ولهم مده طويله زواج..
اجل انا وش اقول نقلني لقرية اهله
تخيلي قريه مافيها مطاعم ولافنادق
الا فيها حديقه عامه واذا طلعتي لها
نشروا صورتك بالصفحه الاولى خخخخخخخخ :(
وهو ياماشاء الله عليه..
من دوامه لنومه ومن نومه لأهله ..وزيارات لاقاربه
واصدقائه له وياهم استراحه خاصه :(
وحنا والله ماودي احلف يابنات ان لنا اربع سنين بهالمنطقه
يمكن ماقال يله نطلع الا مره او مرتين ..
وترا طول حياتي قبل لاياخذني عايشه بالعاصمه تعرفون الفرق
عاد مايبيلها شرح..
قولوا آمين جعل مامر علي من الضيقات بموازين اعمالي الصالحه
يارب لاتضيع اجري..
ومن شاف مصيبة غيره هانت عليه مصيبته الله لايجعل الدنيا اكبرهمنا..