زوجج يخونج وتبغين النصيحة....تفضلي..

السلام عليكم ورحمة الله وبركته

أنا وحده من اللي ابتلاهن الله بخيانة الزوج...

استشرت الكثيرين على شان ينصحوني...أكثر اللي كنت أسمعه اصبري..اصبري...,ادعي له بالهداية...كنت اصبر وادعي رب العالمين وثقتي بربي عاليه إن شاء الله...

لكني كنت تايهه وأفكاري متشتته ودايماً أحس إنه يظلمني بخيانته... وما كنت أعرف كيف اتعامل مع خيانته لي...هو يكذب عليّ ويقولي سوالف ما تتصدق ويحاول يغطي على نفسه...مع العلم إنه في داخله عارف ومتأكد إني أعرف إنه يخوني بس ما كنت أفهم تصرفاته..

كنت اتجسس عليه واحاول اكشفه لأني كنت أحس إنه يستغفلني...بس ما استفدت شي...وتمادى أكثر في خياناته..

المهم

آخر الناس اللي استشرتهم أخوي...وكانت نصايحه لي غير بحكم إنه رجل

وضح لي أشياء كثيرة ما كنت فاهمتنها في زوجي وجاوب على تساؤلاتي...واستفدت منه وايد..وفهمت تصرفات زوجي أكثر...وقدرت إني اتحكم بأعصابي أكثر وأهون على نفسي...واعتبرت زوجي مريض وهالمرض بياخذ وقته وبيزول بإذن واحد أحد إن شاء الله...

بس بما انكم أخواتي وحبيباتي وعزيزات على قلبي حبيت أفيدكم بهذي النصايح لوجه الله...ورجاءي منكم إنكم تدعون لأخوي هذا بالسعادة والتوفيق طول حياته..ولزوجي إن الله يكرهه في غيري من النساء ويباعد بينه وبينهن كما باعد بين المشرق والمغرب...

أدري إني طولت عليكم...
..وتفضلوا هذا كلام أخوي ونصايحه..

يقول...
تذكرت بداية حياتي..أكثر الرجال يمرون في بداية حياتهم بهالصدمة...صدمة الزواج

خاصة إذا كان لهم علاقات خارجية قبل الزواج...يحسون انهم طاحوا بحفرة يوم تزوجوا..ويندمون على الساعة اللي تزوجوا فيها...

يمكن الزوجه تحس بالنفس الشي..لكن الزوجه بطبيعتهاتتأقلم أسرع على حياتها اليديده (الجديده)...

لكن الرجل ما يتأقلم ولا يرجع لبيته الدافي الا بعد سنين

لكنه اذا رجع
ابشري بالخير .....ابشري بالسعادة
وابشري بالاجر من الله
............................................

اسمعيني زين

ما بيتأقلم معاك زوجج إلا بعد فترة...وبيعرف قيمتج وبتعيشين السعادة الحقيقية

لكن بشروط:

أول شي لا تدخلين بحياته الخاصة...مثلا..لا تدخلين عليه وهو يكلم وحده

ولا تكلمينه في شؤون الجماع واللي المفروض يسويه واللي مفروض ما يسويه..... لأن قلبه وعقله مب وياج
الحين هو صوره بس جدامج (قدامك)

انصحج لا تصدمينه بنفسه...ممكن تكتبيله رسالة بالمستقبل...توضحين فيها أمور السرير وهجره لج...

لكني انصحج ما تكون بهالوقت.....لازم تصبرين شوي..لين تحسين انه رايق شوي...وان اللي حوله بدو (بدأوا) يتفرقون عنه..

ولا تدخلين في علاقاته العاطفية الثانية

لا ترفعين صوتج عليه

لا تكونين مخبرة على تصرفاته وعلى موبايله

لا تكشفيه وهو في موضع محرج

استمري في طيبتج واحترامج له

البسي زين ومغري وقصير وشفاف حتى لو اعترض

لا تناقشينه في الاشياء اللي تزعله..وقوليله إن شاء الله وفالك طيب..واللي تامر عليه بيصير

وعيشي لحظات السعادة اللي يرجع فيها لج بين فترة والثانية

أذا سويتي هالأمور..أقسم لج إنه بيرجع... لأن البنات اللي حوله..يبدؤون يتخلون عنه لغيره...لأنه متزوج..ولأنه عنده أولاد
ولأن أغلب هالعلاقات...البنت تعرف ان الشاب لايمكن يتزوجها....والشاب يعرف انه لا يمكن يتزوج هالبنت
و اثنينهم لا يمكن يثقون في بعض...والزوج دائما يبحث عن الزوجة الطاهرة مثلك...

بس متى بيرجع ومتى تتعدل أموره؟؟؟؟؟؟؟؟؟

يوم يروق...يوم يتعب ويروح كل اللي براسه...

و بقولج شي في كثير من الدراسات تقول...

ان الازواج ما تتفق نفسياتهم..سواء من الناحية العاطفية او الاجتماعية او الجنسية...الا بعد عشر سنين من الزواج..

لانها علاقة كل يوم تنبني....ولان كل واحد فيكم يكتشف في الثاني شي يعجبه وشي يكرهه

لكن الله قادر على كل شيء...ويا صبرج وعطفج عليه وحنانج وضحكتج له وعدم مصادمتج له
ان شالله يرجع بسرعة

الرجل يخون حتى لو كان متزوج ملكة جمال..لأن الكلام مع البنات يعتبرها الرجل هواية لا اكثر ولا اقل
والخيانة هذي مجرد صداقة بنظره...

و الرجل يخون لحبه للتجديد ولغرض التسلية لكنه يعرف ان بيته هو الاصل بحياته

الرجل يحب يفتح قلبه لكل وحده تطرق قلبه وترضي غروره...مب بسيطة عنده ان البنت هي اللي تعرض نفسها عليه...مب بسيطة ان البنت هي اللي تطالعه اول مرة..أو تكلمه

لكنه بنفس الوقت يعاني في داخله من هالازدواجية....لأن القلب مايتحمل هالهواية الخطرة...فيتشتت قلبه ويتعب
ويعاني بس انتي ماتدرين عنه...

يصيح (يبكي) احيانا بينه وبين نفسه...ويحن لكم حتى لو كان بينهن (البنات)....ويشتاق لكم وهو بقمة المتعة معاهن...

ويحب يرجع بسرعة للبيت على شان يشوفكم.....وفي باله انه يتمنى انه يحضنكم واحد واحد

لكنه يوم يرجع البيت...أحيانا يحضنكم ويونسكم.....

واحيانا تنسد نفسه منكم..خصوصاً إذا قابلتيه بسيل من الاسئلة والتحقيقات.....او قابلتيه بالبرود وصد ويهج (وجهج) عنه

وانتي معاج حق باللي تسوينه هذا...لكن العلاقة ما بتنجح بالطريقة هذي..اذا كان هو يصد وانتي تصدين...

هو يحتاج منج في هالفترات من حياته.....يحتاج حنانج الصادق...وضحكتج الصادقة...ونظافتج وطهارتج....
لان كل هالاشياء ما يلقاها مع البنات اللي كان عندهم...

ولأنه يعاني من الازدواجية....ومن تشتت القلب...ومن كثرة التفكير....ومن الشعور بالذنب وكثرة التمثيل عليج
فيحب انه يكون صادق معاج...ويحب انه يرتاح حتى لو زعلج

بس في هالحالة...أنصحج ما تناقشينه خاصة ان المناقشة تعذبه اكثر

صدقيني ....
لو كان هذا الريال (الرجل) سيء لدرجة كبيرة....كان ما كان هذا الصراع في داخله....وكان طنشج وطنش عياله
لكنه فيه بذرة خير...ولازم تنميهنا وتصبرين عليها..

ومن من الزوجات تقدر على هالكلام...إلا اذا كانت صابرة...وكان صبرها مثل الجبال


تصدقين....

إنه كل ما تكلم مع البنات أكثر...عرف قيمتك وقيمة أسرته أكثر....لانه كل ماتكلم معاهن اكثر...كل ماندم وشعر بالذنب تجاهج اكثر...وعرف قيمتج اكثر..فيرجع البيت وهو حاب يعوضج بس اهم شي يلقى ويه (وجه) طيب منج...

هوراح يتكلم مع هالبنات لين ماييه ( يجيه) يوم ينفجر....ويرجع لكم ...ويلتم شملكم

لكني ما أنصحج تدخلين اطراف ثانية بالموضوع...الوقت كفيل إنه يرده..

اصبري وأمورج كلها الى خير ان شاء لله...

والله كأني أشوفكم بعد كم سنة وانتو مستانسين ومتفاهمين في كل شي

بس أهم شي...ما تتأثر نفسيتج كثير...خلي ثقتج بنفسج كبيره...
وصدقيني...السعادة حولج والأمر بسيط يا أختي...

دوري عن السعادة....لا تيلسين (تجلسين) تتريين (تنتظرين) السعادة.....لأنها بهالطريقة ما بتيج (مابتجيك) ابدا

دوري عنها حولج..في القراءة....في تربية أسماج الزينه...في الرسم وباقي الهوايات...

في الطاعة....في حفظ القرآن....في زيارة الصديقات...في اللعب مع الاطفال...في كتابة الخواطر..في زيارة المنتديات...في الطبخ.....في الرياضة اللي تفرغ شحنات الجسم والروح

اهم شي في كل اللي سبق.....انك تبدين (تبدأين)

وبدون ماتخطين الخطوة الاولى للسعادة...بتيلسن (بتجلسين) طول وقتج في ارض الاحزان

أعانج الله....والله اني عارف إن هالشي صعب ومب هين

أسأل الله انه يثبتج ويصبرج...ويملأ قلبج بالسعادة والخير والامان والحب والاطمئنان ...ويكتبلج الخير وين ما كان ...ويبعد عنج الهموم والأحزان....ويجمع بينج وبين زوجك في خير حال

...............................................................

وهذا نهاية كلامه...أتمنى إنكم تستفيدون من نصيحته مثل ما استفدت أنا...

اللهم إني أسألك بأني أشهد بأنك الله لا إله إلا أنت، الأحد الصمد الذي لم يلد ولم يولد ولم يكن له كفواً أحد...أن تصلح كل زوج يخون زوجته وأن ترده لها عاجلاً وليس آجلاً...وأن تباعد بينه وبين غيرها من النساء كما باعد بين المشرق والمغرب...وأن تغض بصره عن غيرها من النساء..وأن يجعل كيدهن في نحرهن يا رب العالمين...