زوجـة اخـوي استأصلت الرحـم هل ازوجـه من ثانيـه ولا حـرام ؟؟؟؟؟؟/استوفى حقه من الردود

السلام عليكم اخواتي العزيزات


عندي اخو عمره 50 سنه وعنده ولد واحد لان زوجته شالت الرحم وماعاد تنجب


شوفوا مواصفاتها وبالله عليكم افتوني ان كنت الي بسويه صح او غلط

شخصيتها قاطعه رحم يعني امي عجوز ضريره خلال زواجها بأخوي من 13 سنه مازارتها اكثر من خمس مرات وكل مره ماتطول اكثر من ربع ساعه

ولدها كبر مايعرف ان في الحي جمب بيتهم تعيش عجوز ضريره وحيده تصير جدته ام ابوه

الحين بس بعد ماقطعت الصمت كلمت اخوي وهو طيب ويستجيب ان الولد لازم يزور جدته كل اسبوع لو عشر دقايق تسمع صوته ووافق وهو خجلان قالي انا الغلط مني لاني ناسي هالشي ( كيف ينسى زيارة امه مدري ! )

الزوج اذا زوجته مسيطره عليه وملتهيه بحب الدنيا ماظن تنصح زوجها ببر امه (ياناس حتى تيلفون مايتصلون طول هالسنين )


حياة هالزوجه يابنات تبذير وتمشيات وسفر وتقليد لحياة الاجانب ومدري تصلي ولا لا


انا الاخت الوحيده لأخوي اساعده بشكل شهري ماديآ كوني ولله الحمد مستده ماديآ


وغير الشهري احل مشاكله الماديه الكبيره الي سببها تبذير زوجته الي عارفه ان فيه ممول لتبذيرها (انا) فتصرف بدون حساب ....... مره سوت في بيتها شغله ب16 ألف ريال وقالت له وقع للشركه الي بتسوي الشغل شيك والفقير وقع ...... طيب طاف شهر واثنين والشركه تتصل تبي فلوسها او يودون الشيك النيابه لما قالي اخوي السالفه انصدمت قلت له انا اضعاف هالمبلغ عطيتك وماني مقصره ادفع الحين هات الشيك وعطيته المبلغ كامل راح سدده والحمدلله عطوه الشيك وخلصنا


نبهتني صديقتي الله يجزاها خير قالت لي ترى زوجة اخوك استحلت اللعبه وفي كل مره بتستغل حبك لاخوك وبتوقعه على شيكات وانتي بتدفعين ...... قلت لها تصدقين بالله انا ناسيه ان اخوي متزوج من كثر مازوجته قاطعتنا ( تهقين هي الي تحرضه ؟؟؟ ) صديقتي سكتت


البارح كنت اسولف مع صديقتي اني مو عاجبني حال اخوي لا اولاد ولا زوجه عدله وماديه وقاطعه ومخليتني مجرد ممول لتبذيرها ولا حمد ولا شكر


قالت لي تلاحقي هالمسكين اخوك وزوجيه ,,,,,,,,,,,,,,,,,,,,,,,,


وانا الحين قاعده ابني فيلا جديده لأمي حتى يكون عندنا مكان نجتمع فيه لمانزورها وببني فيه دور ثاني زياده للضيوف ,,,,,,,,,,,,,,,,,,,,, هل ازوج اخوي واعطيه الدور الثاني ,,,,,,,,,,,,,,,,, هل الي بسويه صح ؟؟؟

انا قادره ازوجه عشر مو وحده ولله الحمد مقتدره ماراح يدفع هو ولا ريال حتى الاعانه الشهريه علي


انا اتمنى اشوف اخوي حياته طبيعيه مثل الناس ماينقصه شي وفوق هذا طيب لابعد الحدود وباذل صحته ووقته لهالزوجه الانانيه الي لا احترام له ولا لاهله واستغلاليه اهم شي عندها الفلوس مافيه عواطف ولا احساس



انصحوني انا من كثر مافكرت ماخذه اليوم 3 مرات بروفين من الصداع والسهر

انا خايفه ربي ومابي اضر احد لكن هذا اخوي واحس انها مسيرته بدون احساس حتى الكلام الطيب مايسمعه منها لا شكل ولا عاطفه وفوق هذا وقاحه وقطيعه رحم


ولا كيف ابن يقطع امه 13 سنه ماتشوفه الا كل عيد عشر دقايق ؟


الله بيعاقبني على سكوتي هالسنين الطويله ,,,,,,,,,,,,,, لا واساعدهم بالالوف كل شهر كأني اشجعهم


هل قراري في تزويجه عند امي ونلم الشمل المقطوع قرار صحيح ولا اخلي الحال على ماهو عليه لان الوقت راح

ومافيه فايده ؟