السلام عليكم ورحمة الله انا صاحبه الموضوع
شفتوا يوم يقولون يعجز اللسان عن الشكر وهالفلسفه؟ اول مره احس بمعنى هالكلمه احس يوم شفت ردودكم لساني انربط ومع اني مو صياحه ولا اعرف اعبر الا اني فعلا فعلا صحت يوم شفت ردودكم ووصلني احساسكم وقهركم علي يمكن لان كلامي طلع من القلب طلع من قهر شديد واللي من القلب يوصل للقلب بدون استئذان
الله يشهد الله يشهد الله يشهد الله يشهد ان اللي شفته مع اهلي اكبر من اللي كتبته بكثير انا تقريبا لو يسألوني وش اكثر قدر انكتب عليك ومو قادره تتأقلمي معه بقول وبككل ثقه ان اهلي هم اهلي
انا بس ودي اعرف كتبت لكم جزء وانحرقت قلوبكم لو اكتب لكم كل شي وش بتسوون ؟ انا فكرت بالانتحار كثير عشان خايفه لازوجي يدري وبعدين اصير تحت رحمة الاثنين زوجي واهلي ادعولي بالستر الله يستر عليكم
طبعا كثير منكم سألوني ليه مو قادره تنسي ؟ لان الاهل لايمكن ينفصلون عنك انفصال كامل
اي نعم انا صرت اعاملهم نوعا ما برسميه وبتحفظ لكن حتى التحفظ له حدوود عشان زوجي لايحس وبنفس الوقت التحفظ والرسميه الزايده راح تخلي اهلي يحقدون وبعد الرسميه شووي صاروا يحترمون انفسهم لكن لازالت العايله تكره بعض ابوي يكره امي ويخااااف منها موووت وامي تكره ابوي واثنينهم يكرهوني ومايعاملوني برحمه او ابويه يعاملوني كأني وحده تعرفوا عليها عند الجيران
بوقت قريب حصل موقف تافه وسخيف لكن عشان اوريكم نفسية امي وابوي معاي بالرغم من سخافة الموقف بس انتو خذوا الزبده تخيلوا مره زوجي قال لامي فلانه (يقصدني) فنانه فنانه بالاكله الفلانيه تخيلوا امي ناظرت فيه وخلته يكمل المدح وبعدين قالت اهاا وسكتت ! زوجي ناظرني وعيونه طاااااااااااارت قام قال لامي ترى جد اكلمك؟ قالت ايه طيب ولو تشوفون وجهها وهي تقوله ايه طيب كان (تفلتو عليه االله يكرمكم) ماعلقت ولا ابتسمت ولا ضحكت ولا قالت كفو ايه متعودين على طبخها ولاشي . انا وجهي طااح وقلت ان شاءالله زوجي مالاحظ ركبنا السياره قال امك وش فيها مو مقتنعه يوم اقولها طبختك الفلانيه تجنن؟ قلت يمكن ما انتبهت قال عينها بعيني وكررت الكلام مرتين كل ذا وما انتبهت؟ انا سكت
ولا كأني كنت انا شغالة البيت وحسبي الله ونعم الوكيل كنت الشغاله بمعنى الكلمه مو مبالغه كنت اطبخلهم واغسل المواعين واغسل الملابس وانشرها واخواتي على جولاتهم وياليت الفرق بيننا بالعمر كبير كلنا بنفس الجيل وكلنا تجينا الدوره وكلنا بسن زواج لكن افتراء امي ماراح انساة لها ماحييت وبعد كل هذا يوم زوجي يمدحني ولاتعلق يعني خدمتهم واخرتها استكثروا فيني حتى المدح
وبيوم كنا انا وابوي وامي ومعانا زوجي وفجأه امي قالت فلانه (قصدها اختي) فلانه صارت تصلح الاكله الفلانيه من اروع مايكون انا ضحكت لان قبل زواجي كانوا ابوي وامي يطلبوني اسويها انكسرت يديني كثر ما سويتها لهم المهم انا ضحكت وقلت لابوي لا بس ابوي يحبها من يديني انا وتجي الصاعقه انقلب ابوي جاد وقالي لااااااا اسمحيلي من يد اختك فلانه ولا بلاش ؟ انا صرت مابين صدمه ومابين القط وجهي ومشاعر متضاربه قلت لابوي من جدك يا ابوي ولا تمزح مو كنتوا تطلبوها مني دايم وشبه يوميا ؟ وكنت مبتسمه طبعا قال معليش استريحي اختك بس اللي تتقنها (( للمعلوميه ترى يوم كنت عروس زوجي قالي بالفم المليان ابيك تطبخين لي الاكله الفلانيه سمعت عمك يمدحك فيها )) يعني حتى عمي اخو ابوي علم زوجي وقاله ترى زوجتك فنانه بالاكله الفلانيه بينما امي وابوي لاحس ولا خبر ولامدح ولا ذكرى ولا تقدير اني كنت عالاقل الوحيده اللي تخدمهم بينما خواتي مايشيلون منديل من الارض والله هو حسبي ونعم الوكيل ويوم جا الطاري وابي يمدحوني باللي استاهله واستحقه فشلوني وطيحوا وجهي قدام زوجي وكفى بالله وكيلا حتى ماهان عليهم يقولون (كنتي كذا وكذا يعني امدحوا الماضي عالاقل) لكنهم الغوا الماضي والحاضر بكل جبروت
ادري المثال سخيف وتافه وبسيط ومو مستاهل والله العظيم ادري لكن عشان اوريكم عقل وكراهية ابوي وامي وان الرحمه منزوعه ومنهم والخبث متأصل فيهم مع بنتهم في ابسط الامور فما بالكم بالاشياء الكبيره؟
واللي يوصوني انتبهي لايدري زوجك اكييد لاتوصون حريص انا اكثر وحده حريصه ان زوجي ما يدري لان مو من صالحي انه يدري لاتخافون ما انجنيت اسلمه رقبتي ومع ذلك ابشركم انه حـس اننا عايله غير مترابطه يشوف ابوي يذب على امي وامي تذب على ابوي ومره قالي احس ابوك وامك يكرهون بعض موت قلتله يتهيأ لك ! شفتو شر اكثر من كذا؟ حتى زوجي الغريب لاحظ ان ابوي وامي يتكارهون مع اني مانطقت حرف بس الشمس ماتتغطى بمنخل قدام عيونه شايف الشر ورمي الكلام على بعض
بالنسبه لعلاقتي بزوجي جيده الحمدلله بس القلق لايدري عن اهلي اكيد منغص علي تنغيص كبير لان ذولي اهل (وبكل اسى اني مضطره اسميهم اهل) مو جيران اقدر اتخلص منهم ومن وجودهم بحياتي

بالنسبه لابوي ضعفه وخوفه وجبنه قدام امي خلاه حتى يخاف يوقف معي لو بيني وبينه حتى يوم نكون لوحدنا انا وياه يرمي علي كلام اني ما انظلمت ولا عشت اي معاناه! ولو ربي اراد بكتب موضوع عن هالنقطه وابشركم بعد كم سنه من زواجي صار يذلني بالوقفه البسيطه اللي وقفها معي (( الوقفه عباره عن فضفضه وصريخ صرخته عنده اتصلت عليه وقلتله بفضفضلك على سنين عمري ومالي احد يسمعني )) وهو سمعني وتعاطف معي بعد كم سنه صار يذلني انه سمعني فقط وقالها لي مليون مره انا سمعت ووقفت معك بوقت اللي الكل تخلى عنك والله قالها فوق 15 مره ليومكم هذا ويوقولها بهدوء بأسلوب دق تحت الحزام يعني لدرجه صرت اشوفه هو وامي واحد (وهذه الحقيقه هم وجهان لعمليه وحده) لان من رعبه منها صار مضطر يوقف بصفها ولا هو قادر ينصفني ولا بشي لا ويكرر ويعيد ويزيد بموضوع اني ما انظلمت من امي ولابشي وان انتي واخواتك قدركم واحد ومكانتكم وحده وبعطيك اهتمام نفس ما اعطيهم ماتزيدين عنهم بشي لانكم عشتوا نفس الظروف! الحين انا واخواتي صرنا عايشين نفس الظروف؟! بس الله موجود

انا من هنا خلاص غسلت يدي منهم اثنينهم واكرههم اثنينهم وما اتوقع لو ماتوا بزعل بالعكس بصير مو مجبره اوصل ناس هم مابروني عشان ابرهم المفروض انا بنتهم والله لو اني مجرمه المفترض يموتون علي فكيف وانا ماسويت لهم شي غير ان جيت على وجه الدنيا وربطتهم ببعض مدري مين اللي يزعل فينا ؟ انتم اللي تشوفوني النحس اللي ربطكم ببعض ولا انا اللي انولدت بين اثنين مجرمين والمفروض انهم احن البشر علي؟ كرهتوني بنفسي وبشي اسمه والدين

وابشركم بدأت ظروفهم تتحول لتحت وكأن انتقام الله ابتدأ الان لان من كم شهر صارت عندهم مصيبه من العيار الثقيل الثقيل وعرفت ان انتقام الله يصير ولو بعد حين هذاك اليوم نمتتت من قلب مو شماته لكن الظلم يحررق فما بالكم يوم يجي من الناس اللي المفروض ارحم الناس

واذا ربي كتب لي عوده بموضوع اخر واذا اتأخرت فأكيد بسبب ظروف لكن فعلا فعلا الحين تأكدت ان الطيبه مو بالدم انتم اطيب ناس ومايحتاج اعرفكم يكفي دعائكم لي ووقفتكم ومازرتكم لي وزعلكم علي يشهد الله اني احبكم في الله ودي اكتب اسمائكم كلكم خايفه انسى وحده وتزعل
الله ينول كل وحده منكم مرادها الله يرضى عليكم الله يفتح لكم ابواب الرزق الله يشفي مرضاكم الله يرزقكم من حيث لاتحستبون الله يمتعكم بالصحه والعافيه الله يدخلكم الجنه بلا حساب ولا سابق عذاب الله يستر عليكم دنيا واخره الله يسهل عليكم كل صعب الله يبدل احزانكم فرح ويبدل همومكم فرج الله يحقق لكل وحده منك كتبت وردت وانحرقت عشاني امنياتها واحلامها المستحيله الله يرزقكم ماتتمنوه الله يسهل اموركم الله ينور حياتكم
الله يعطي كل وحده فيكم اللي بقلبها واللي مايعلم فيه الا الله
الله لايبدل حالكم الا لاحسنه وافضله ياحي ياقيوم
ومهما قلت لكم ودعيت لكم اظل مقصره مقصره مقصره فسامحوني يا اخواتي في الله احبكم

اسأل الله ان يفرج همك ويعوضك عن سنوات حزنك فرح وسعادة

اختي ولله هذا القهر و الظلم و ذكريات صعبة راح تجيب لك بالامراض...انصحك تحصلين وظيفة و تنشغلين فيها وربي ان الانشغال هو افضل علاج...تنسين كل شي و تركزين بحاجة، و تجيب لك انجازات و تزيد ثقتك بنفسك...انا قصتي متشابهة لقصتك بس انا انشغل لكن كيف كنت ابكي و انقهر مثلك، في الإجازات لان اجازة اكون فيها فاضية و اتذكر و انقهر و هالذكريات تجذب لي طاقة السلبية ف في الاجازات تكثر مشاكلي و مواقف ظلم و قهر....أتمنى فهمتي نقطتي و تفكرين فيها

قلبتي علي المواجع .. مو بعيدة عن معاناتي اللهم ان ابوي و2 من اخواني كانوا ف صفي .. ومشيئة الله فوق كل شي اتوفوا ثلاثتهم .. وقالت الوالدة لا اشوفك تعتبين البيت اللي كانوا يعززون لك وواقفين معك راحوا .. ولي الآن سنة ونصف م دخلت بيتهم .. الله اللي خلقني وخلقك م ينسانا وعدالة رب العالمين مصيرك تشوفينها طال الزمن ولا قصر .

ياليت تقدرين تتركين اهلك وللابد ،، وجودهم نقمة علي