زوجك سمى بنته باسم زوجته الاولى ... وش السواااه/يرجى عدم رفع المواضيع القديمه

مراحب الجميع


شلونكم خشه خشه ....:)



بقولكم سالفه .... وحقيقه وواقع ....


تزوجها عن حب كبير ..... وحاول المستحيل عشان ياخذها .. لان ابوها كان رافض

والولد مافقد الامل جاب جاهة وثنتين لبوها ... ووافق ...

وتزوج من حلم عمره .....


وعاش معها وجاب منها اربعه عيال ... ولدين وبنتين

فى ولادتها الاخيره .....


ماتت اثناء الولاده :44:

وفقد الزوج عقله ..... ماصدق ....


يقول انا جبتها للمستشفى بيدى شلون تقلون ماتت ....

واستلم الزوج طفله المولود من غير امه .... الى راحت بعز شبابها الله يرحمها ,,,,


وظل تسعه شهور بعالم ثانى ....


عايش بدون روح ....

ماتصور انه يفقد زوجته فجاءه ....

عياله الاربعه

تفرقوا ....

وتعرفون اللى ماله ام حاله يغم ...:(

الجده اخذت البنتين معها ...

والخاله اخذت المولود الصغير الى راحت امه وهو مافتح عينه للدنيا:icon33:

والولد الثانى ... عند عمته اخت ابوه ...


والابو ,,,, بعالمه الحزين ....


قالوا له جماعته وربعه ...

الى انت فيه مايرضى الله

ماتت وهذا يومها ... الله بيحاسبك على عيالك اللى كل واحد بديره

الاخوان متفرقين ... حرام كذا وهم صغار ..,,

طلبوا منه يتزوج ....


وقال : شلون اتزوج ,,, عقب فلانه

الحريم عقبها حرام .... الحريم عقبها ماهم حريم ....

وعشان عياله الى كلن بديره

قرر يجمع عياله عنده

ويتزوج ....

ماكان مهتم من بياخذ

ااى وحده والسلام ....

المهم ترضى بظروفه

وتقبل بعياله الاربعه

وكلهم صغار

اكبرهم بنت عمرها سبع سنين

واصغرهم ابو تسعه شهور ماتت امه بالولاده فيه ...

قال : لاخواته مابى حلوه

ولابى اى شروط

ابيها مصليه ومسميه .... وتخاف الله بالصغار

وفوق كل هذا وهذا ابيها تعرف

ان قلبى مات مع زوجتى الاولى ومافيه حريم تسد مكانها ....

قالوا خواته : من بيقبل فيك ؟

عيالك اربعه

وبعد قلبك مات ....


وبعد مده ... سمع عنها ...

متدينه ... وبنت حلال ,... تزوجوا كل خواتها الى اصغر منها واللى اكبر منها..

وبقت هى ....

حظها من الجمال قليل ,,,,,

بس بشهاده الى حولها قلبها ذهب .... وتخاف الله ....

فكر فيها بشكل جدى ...

وقال هذه هى ....

وتقدم لها رسمى ...

وقبل عقد الزواج

طلبها وتكلم معها من وراء حاجز وقال لها ....

يافلانه ,,,,


انا وضعى كذا وكذا

ويعلم الله مالى هوى بالحريم

وشرح لها ظروف عياله

وقالها فكرى .. وشورك بيدك

يافلانه ... انا ماراح اوعدك بحياه رومنسيه واحلام ورديه

انا واقعى مر ... بتكونين عندى معززه مكرمه لك حشمتك وبيتك

وعيالى قبلى بكل شي مابى كلمه تزعلهم ...

او احد يقسى عليهم ...

وانصرف من عندها ....

وجاء الرد بالموافقه ....

وتزوجها ....

وجمع عياله عنده فى بيته ...

واستلمت زوجته عياله كلهم

من البنت ام سبع سنوات

الى الولد ابو تسعه شهور

وكانت بشهاده الجميع

ام لهم ....

كلها حنان وطيبه معهم ...

واهتمت فيهم ...

والبنت تدرس عندها وتهتم فيها

وحملت الزوجه الجديده ...

وجابت بنت .....

وهنا ....


طلب زوجها منها ان يسمى بنته ....

وابتسمت زوجته

وقالت : انت ابوها وتمون ...

وسكت الزوج خجل منها ...

وفهمت زوجته الى بقلب زوجها

وقالت : له

روح يابو فلان وسجلها بالاسم الى فى بالك

انا عارفه ...

وفعلا سجل اسم بنته باسم زوجته اللى ماتت ...

والزوجه الجديده كانت راضيه كل الرضى ....


والله ياخوات ....


شفتها من فتره قربيه بعرس ... وكان معها عيالها الخمسه

الاربعه عيال زوجها

وبنتها الى اسمها اسم امهم ,,,,
وكان لبسهم قمه وصحتهم ما شاءالله
وكانت بقمه السعاده ...

ولما سالتها وحده


كم عندك عيال ؟؟

قالت عندى خمسه الله يخليهم لى ...

وجلست معها جلسه منفرده

وحييت فيها الامومه ... والاجر

قالت : ابى عيال زوجى يحبون اختهم بنتى

ولا يشفونها من زوجه ابوهم

وافقت اسميها باسم امهم

عشان اكسب محبتهم لختهم

وادرى ان قلب زوجى مانسى ام عياله

ومن حق عياله يظل اسم امهم بينهم موجود...

وانا معها

جو العيال عندها يركضون

وكلهم يقلون ماما ... ماما ....


_________________________________





هل تقبلين وانتى زوجه

زوجك يسمى بنتك باسم زوجته الاولى

او مطلقته الى قلبك ...

او حتى اسم وحده كان يحبها او خاطبها قلبك

تقدرين تجاوبين ..