زوجك ما يحترمك ؟ اهله مايحترمونك ؟ اتكيت التعامل معاهم .. تفضلي

زوجك مايحترمك ؟ اتفضلي .
السلام عليكم
اذا كان زوجك ما يحترمك ويقلل من شأنك ويصارخ عليك حتى بين اهله والناس ،
وتبغينه يصير مثل ما تتمنين .
في امور لو التزمتي فيها حتى لو صار لك دهر متزوجه راح يحترمك ويقدرك ولا تستلمين لفكرة ( انه تعود خلاص وانا مليت واستسلمت ولازم اتأقلم ) .
لا . لا تستسلمين .. للفكره هذه نهائي .
المهم .
وش لازم تسوين عشان يحترمك ..
تنبيه ( اذا حاولتي تجربين هذه الخطوات استمري عليها واذا حاسة انك ماراح تقدرين تستمرين اصرفي نظر عن التجربه ، لأن ماينفع تجربين ومن يقولك كلمه تخقين وترجعين مثل اول ، وعشان لا يتعود على تقلباتك المزاجيه ويطنشك حتى لو تغيرتي ).
اهمممم شي لازم يكون عندك صبر لخوض التجربه عشان تحصلين نتايج غير متوقعه .
اول شيء لازم تكونين باردة اعصاب ، يعني اعصابك خليها بالثلج
اذا جاء معصب ويصارخ وهو يكلمك ، حتى لو غلط عليك.
لا تبينين له انك معصبه او متضايقه ولا تستفزينه او تتحدينه
او فيك حزن ولا تبينين له انك خايفه منه
حتى تعابير وجهك خليها عادي
كأنك تردين على شخص يسولف معاك عادي .
اجل كيف تمارسين برود الاعصاب اذا بينتي له ان اسلوبه اثر فيك .
خلك عادي ريلاااااااااكس طبيعيه جدا جدا .
عشان اساعدك اكثر تخيلي نفسك دكتوره بمستشفى الاعصاب وعندك مجنون وما تاخذين على كلامه .
والله العظيم هو راح يتصور نفسه كذا .
يقول في نفسه انا جاي اصارخ واهزأ وماهزيت فيها شعره راح يشوفك انتي العاقله وهو التافه (راح يتصور نفسه انه طفل او مراهق طايش امامك وانتو عارفين الرجال مستحيل يحب يشوف نفسه صغير )
طبيعي راح يرجع لك ندمان و حاس بخطأه ومدى تفاهته مو شرط بنفس اليوم راح ياخذ وقته لين يتعود على شخصيتك الجديده ، احتمال ياخذ ايام واحتمال اسابيع واحتمال شهور .. على حسب شخصيته وعلى حسب المساحه والمده الي سمحتي له فيهم يتمادى عليك .
اذا جاك يسألك انتي زعلانه .. معظم الحريم يخقوووون
لا ما ازعل منك .. انا احبك وما ازعل منك .. برافوو خليه يتمادى اكثر واكثر وما يحس بقيمتك ولا يثمن كلامه .
انتي تشوفين نفسك طيبه صح وهذا الصح انتي طيبه بس هو
ما راح يشوفك طيبه بصراحه .. راح يشوفك مثل الهبله مافي احساس .
و يعود نفسه يفرغ طاقات الغضب فيك حتى لو مو انتي سبب في اي مشكله تجيه.
اذا جا سألك انتي زعلانه اسكتي لا تجاوبين وتقولين اي زعلانه وتتناقشين معاه .. لان راح يبرر تصرفاته حتى لو هي غلط هذه حركاتهم .
لا تردين اسكتي اسكتي اسكتي ... وغيري الموضوع .. بس اخذي لك ٣ ايام .. تكلمينه بحدود اكثر واكثر .. كل ما سألك .. عن شي قولي مادري
حتى لو تدرين قولي مادري والله ..
كلمك عن شي يخصه .. قولي .. اي ... اي .. اها ..
يبغى رايك في شي قولي مادري ..
ردي عليه بكلمه او كلمتين ..
و اذا احتجتي غرض للبيت او شي كتبي له وتساب ..
لا تطلبين منه بشكل مباشر ..
لا تكتبين يابو فلان تقدر تجيب لي هالغرض وهالغرض ..
لا انتبهي
اكتبي له دايركت ..
هلا
البيت ناقصه اشوي اغراض .. (وكتبي الي ناقص)
العيال ناقصهم شوي اغراض ..(وهكذا)
واذا شي يخصك .. اكتبي
ابغى (.اي شي تحتاجينه.....) ..
و اذا اتصل فيك لا تردين في نفس الوقت
الشي الثاني . لاتجبرينه ولا تترجينه على شي ابد ابد ابد ..
يعني طبختي حب ياكل .. ياكل .. ماحب براحته هذا مثال لا تجبرينه سويتي حلاوه قلتي له ذوق قال ما ابي قولي براحتك
مو ذوقها عشاني .. حتى لو انتي مسويه الحلاوه مخصوص عشانه.
بعض الازواج يتدلعون على حريمهم في كل شي لان هو يدري بتترجاه .. تعال تكلم معي تعال اكل معي تعال عطني رايك بلبسي اهتم فيني ... دلعني الخ
ولا تسألينه .. انت تحبني ؟ وش كثر تحبني ؟ ..
لا تاخذين رايه في شي يخصك .. علمي نفسك ان انتي تسوين وتحبين الي انتي مقتنعه فيه
لا تسألينه وش رايك بالطبخه .. وش رايك بلبسي .. وش رايك بشكلي .
لان بهذه الطريقة انتي راح تفتحين له المجال يتعود ينتقدك في اي وقت .
و اذا كان عاجبه شي تلقائيا راح يمدح بدون ما تسألين .. عموما منتي بحاجه الى هذي الاسئله ماراح تستفيدين ولا شي .
ثالث شي اذا جا ينتقدك على لبسك او ستايلك او مكياجك وشعرك ، ارجعي الى نقطة برود الاعصاب لا يأثر عليك ولا يضايقك .
اسكتي .. وبيني له كأنه عاجبك
يعني اوقفي قدام المرايه وسوي حركات الثقه ان عاجبك لبسك
بس مو بطريقة مستفزة ولا ملحوظة ..
بيني له انه عاجبك كأنك واقفة تضبطين حالك اكثر واكثر في اللبس .. ترتبين شعرك اكثر واكثر وتلمينه .. انتو وشطارتكم .
ولا تغيرين اللبس .. والبسيه مع الوقت اكثر من مره .. في الشهر ..
اذا سألك عن لبسه ..
قولي رايك الحقيقي .. انتبهي من غيرررررر تجريييح ولا تبالغين في المدح ..
اذا عاجبك قولي .. حلو .. اذا مو عاجبك .. قولي احس لو تغير هالقطعه بيكون افضل .. بأسلوب حلو لطيف .
مالها داعي المجامله
واذا جابلك شي .. قولي له شكرا .. يعطيك العافيه
كلمات بسيطه ..


مو لازم شكرا يابعد عمري ياروحي الله يزيد خيرك ياقلبي ياعمري .... يعني في حريم لو يجيب لهم زوجهم لوح شوكلاته كنه جايب لهم طقم الماس ...
تشكر فيه طول اليوم .

الشي الرابع
احنا كلنا نحب ازواجنا نموووت فيهم
وين مايروحون ويتحركون في البيت عيونا تلاحقهم .. بإعجاب
ولكن .. بطلي تناظرين فيه .. اذا مايدري اوكي .. واذا يدري لا تناظرينه .
الشي الخامس اي شي تحتاجينه اكتبي له وتساب ..
اذا شفتيه متضايق او يبغى يذلك
عشان يوديك السوق او يسوي لك اي شي ..
اصرفي نظر عنه من اول مره .. ولا تتراجعين اذا مالك حاجه ضرورية
يعني مثلا اذا كتبتي له وتساب .. ابغى اروح السوق وجاك يتكلم او كتب لك كلام .. اصرفي نظرررررررر ..
الا اذا احتجتي حاجة ماسه حق السوق .. اذا بغى يذلك اجلي الطلعه ولو لزم وحاول يغير رايه قولي لا خلاص .. وكل ما حاول يذلك على شي بإستطاعتك اتأجلينه .. اصرفي نظر عشان يستحي يذلك
صحيح بتحرمين نفسك اليوم .. بس بكره والي بعده والي بعده راح يوديك للسوق وهو ممنون لك وحاضر ..
وبعد ماتصرفين النظر قولي له
ليه تبين تروحين السوق ...
انا قلت بروح السوق عشان اخذ اغراض للعيال ..
اغراض للبيت .. واصري على رايك انك مابتروحين .. حتى لو حاول معاك .. بس مبدأيا لا تحسسيه انك محتاجه السوق لك انتي .. حتى لو كان لك فعلا .
قولي للعيال او للبيت ..
هنا اتخليه يحس ان طلعاتك مهمه ..
مع الوقت .. اذا بدأ يحس بقيمتك ..
عادي تقولين له سبب روحتك للسوق هو لغرض لك انتي ..
وبكل ثقة .
الشي السادس .. ابدعي في تنسيق لبسك حتى لو كانت عندك عيوب ف جسمك .. سواء كنتي ضعيفه حيل او سمينه .. خلك واثقه كل الثقه وتزيني وحطي لك ميك اب خفيف .. ونااعم
وريه انك حابه نفسك وواثقه من نفسك خلك مررررررتبه مرتبه ..
وريحتك حلوه ..
تنامين بلبس حلو ..
حتى لو كنتي تنظفين خلك لابسه لبس حلو وشعرك مرتب ومعطره
خلي بيتك تفوح ريحته بروايح حلوه .. نظفيه حتى لو مو تنظيف دقيق وعميق المهم يكون نظيف .. لاتتركيه يحصل عليك نقطه ..
حتى طريقتك بالاكل ..
حاولي تخلينها تصير كيووت واذا طلع اكلي براحتك مثل ماتحبين ..
لا يسمعك تعصبين على عيالك .. وتصارخين عليهم .. لان هذي الامور تدمر الانوثه قدام الرجال ...
اذا كنتي معاهم لحالك براحتك هههه من الافضل تهدأين حتى معاهم
وعلى فكره حتى اذا شافك تعصبين على العيال راح يسمح للكل يعصب عليهم
واذا شافك تعاملينهم بلطف ما راح يخلي احد يتجرأ عليهم .
زيني عيالك دلعيهم .. قدامه .. واذا قدرتي من وراه بعد افضل لان هذول صغار محتاجين للراحه والحنان مثل ما انتي محتاجه لها
حتى لو يجلطونك .. احبسي الغضب .. خلي الامور ريلاكس ..
والله عن تجربه .. لاني انا كنت اعصب على عيالي .. صار الكل يعصب عليهم .. ومالي حق اتكلم بس من اتبعت هذا الاسلوب لاحظت الفرق الشاسع ..
الشي السابع
اذاذا جا يتمسخر او يستهزأ فيك لا تضحكين ..
ولا تسمحين له يمزح معك .. يعني مو القصد انك تتخانقين معاه وتقولين له لاتمزح معي ومابسمح لك لالالالا ...
القصد من هالشي انك لاتضحكين واذا استهزأ فيك طالعي فيه بإستغراب واسكتي لا تردين عليه وكلميه جد جد جد قدر الامكان
وحتى لو مزح معك مزاح عادي قال لك نكته لا تضحكين ..
اذا كانت تضحك ابتسمي بس .
هالامور كلها بتحتاج وقت لين يليييين ويتغير
اذا بدأ يلين وصار مثل ماتبين ... ابدأي ليني معاه ولكن لا تعطينه وجه بزياده .. لاتعطينه المجال يرجع مثل ما كان ..
ولا تقصرين بحقوقه .
اذا تغير وضمنتي انه تغير
اذا صار طيب معاك صيري اطيب .. لكن استخدمي هذي الاساليب ولا تجعلينها علاج مؤقت ..
وبكذا تكسبين زوجك وتكسبين قلبه
واهله تعاملي معاهم بنفس الطريقه .. اذا كانت عندهم مشاكل معاك ..
ملاحظه هذي الطرق تطبق مع الرجل المهمل لزوجته .. مع الرجل الي ما يحترمها واللي مايعرف قدرها ..
والمتبقين اذا انتي وزوجك متفتاهمين الله يتمم عليكم خلص مالك حاجه في الموضوع
الازواج اللي يحبون حريمهم ومايرضون عليهم .. السبب كله يرجع الى ماذكرت ..
الامور اللي ذكرتها تحتاج لصبررررر ... وكل شي تخلون فيه صبر ومجهود بالحياة تلاقون النتايج المرضيه لازم ..
كل ماذكرت مايعني ان الزوجه تحتقر زوجها او تبين له انها كارهته .. بس تخليه يحس بقيمتها ويحترمها .. هي ماراح اتأذيه .. قايمه بواجباته كلها ولكن تخلي حدود مع زوجها حتى تعيش مرتاحه
وباختصار الكل يحترم الشخص الواثق من نفسه والثقيل سواء الزوج او غيره .
وبالتوفيق للجميع ..