زوجك من اي نوع ادخلي عشان تعرفين ؟؟؟؟؟؟

السلام عليكم

اولا الموضوع منقووووووووووووووول

واعجبني لان ايضا فيه نوع من الطرافه لاكن غير ت السؤال لاني اعتقد انه مكرر وهو هل تؤيدين دخول زوجك معك الى غرفه الولاده
وسؤالي هو من اي نوع زوجك
الموضوع

معنى الولاده بالانجليزي Delivery
لذلك بعض الازواج السعوديين ( تلخبط ) بين كلمة Delivery الولادة و Delivery التوصيل ..
لذلك اكتفى ان يكون دورة في ولادة زوجته ان ( يخبط ) بها بالمستشفى
إقتداء بموظفي البيتزا Delivery

ويروح يخلص اشغاله .. ويقول لهم إذا صار شيء مهم أو
( احتمى الطلق ) اتصلوا علي


تقول له الممرضه : اجلس ممكن زوجتك تحتاج عملية قيصريه ..
يقول لها بكل برود : إذا احتاجت .. ( أنتم ابخص )..
تقول الممرضة : بس نحتاج موافقتك في حينها ..


يقول بصوت واحد ضايق صدره ومستعجل : خلاص خلوني اوقعها من هالحين
وإذا احتاجت كملوا البيانات انتم.

وفي هذه الاثناء تكون ام عياله ( بين الموت والحياة ) وتمر بتجربه من اكثر الأمور ( إيلاماً ) في مقاييس الالم العلمية.
وأخينا في الله جالس في الدوام يشرب شاهي ويأكل ( حب و سيسبان ).

وإذا جاء العصر جاء الأب ( المزعوم ) عاطفيا ، والمقبول ( رسمياً )
( يسحّب ) رجليه ودخل المستشفى ، وعلى راسه كرتون فيه
( عصير سن توب ، ماء ، شيكولاته ( الكيلوا بعشره ).. شاريه من محل ( كل شيء بريالين .)
ثم يسأل الممرضات ..
فيه مدام أنا وش فيه يجيب ؟ >>>>>>>>> وعلى باله انه يتكلم فلبيني بطلاقه.

الفلبينية : هادا بابا انتا فيه مدام جيب ولد ..... وتغمز له يعني عطني المقسوم ..
انا اللي بشرتك بالفلبيني ( بان آن يااان دوي طاو بلنقاقووو ).


وتأخذه الممرضة للحضانه لكي يرى ( ولي العهد )


وبعد ان يراه ويلاعبه من وراء زجاج غرفة الحضانه
ويقول له : قل بابا .. يا كليلوووو .. امووووح ..ويطبع قبله على الزجاج .

يلتفت الزوج على الممرضة ويقول : هااه كيف مدام ؟ ما فيه موت الحمد لله ..
الفلبينيه : ايوا بابا .. مدام كويس كويس .. >>>>>>>> آخر شيء فكر فيه المدام.


وتكون ولادة الزوجه فرصة له ان يشتري ( دفتر ابو اربعين ) وكل يوم يقطع ورقه ..
لانها ايام جميله بالنسبة لهذا الزوج .. ( يسهر ، ويسافر ، ولا فيه احد يقول له وين انت رايح ؟ ولا وين انت جاي ؟

بالمقابل نرى بعض الازواج على النقيض من الزوج اعلاه ..
اول ما تقول المدام في البيت ( آآآي .. الطلق الظاهر انه بدأ ) ..
يطمر ويلبس ثوبه على بيجامة النوم المخططة
و يشيل المدام ولاقرب مستشفى ..
وطول الطريق ماسك يدها ويقرأ عليها قرآن ..
ويسمي عليها .. ويحسب ان الولادة تجي ( بدقيقه ) ..

يدخل المستشفى وهو يزاعق ( زوجتي بتولد )

فترد الممرضة ببرود: اركد اركد ! زوجتك مو اول وحده تولد
بعدين يبي لها ساعات وساعات لين تولد ..وتزحّر وتحقرص وتمقرص لين يفرجها الله .

يجلس الزوج قلقاً في الممر يروح ويجي كأنه اسد في قفص...وبعد ساعة يقرر
ان يذهب لرئيسة الممرضات ويقول
( ودي أدخل عند زوجتي وهي تولد )..

تاخذه الممرضة وتدخله غرفة الولادة..
( تكرمش وجهه ) يوم شافها تصارخ من الالم ..

ويستمر هذا الصراخ ساعات وساعات ..
ينفتح الرحم خلاله .. بالتدريخ .. سنتمتر .. وراء سنتمتر.
والزوج ماسك يد زوجته .. ويقول لها اصبري .. تصبري .. انا السبب انا السبب

يقول لها : هانت .. وهي تصارخ باعلى صوتها .
إلى ان ينفتح الرحم 10 سم .. يشرف ولي العهد ( رأسا على عقب).
ويصرخ ويصرخ .. واااا .. واااااا ... واااااااااااا ...



يفرح الاب بسلامة الأم وابنها
ويفتح ذيك الابتسامة الله وش كبرها ..
ويطلع ويشره كل الممرضات بالمقسوم
بعدين ( يطمر ) للصيدليه ويشتري( حفايظ ، وحليب .. ورضاعات ... الخ من احتياجات المولود ).
8
8
8
أشياء عمرها ما كانت بقائمة المشتريات.

ويروح العصر ويشتري بوكيه ورد كبيرررر وكوره.. وسيكل صغير >>>> بدري على السيكل يا اخينا.
بس لا تلومونه من الفرحه بأبنه الجديد.

الخلاصة :
ان هناك بعض الآباء لا يشعرون بمدى المعاناة التي تتعرض لها الزوجه في الولادة ، و ( أكلف ) ما على الزوج ان يقول .. " نبي نجيب ولد هالسنه " .. وكل سنه .. وش ورانا .. وكأن المدام ( عنز )..
غير مبالي بما تسببه عملية الحمل والولادة من آلام اثناء الولادة ..و آثار على جسم المرأة بعد الولادة ..

بالمقابل نجدي على الطرف النقيض بعض الآباء محدد النسل بعدد معين من الأبناء ، ويترك بينهم سنوات معينه .. حسب ظروفه .ويتعاطف مع المرأة ويكون معها قلبا وقالبا من بداية الحمل إلى ان تضع في غرفة الولادة


اذا سؤالي وبكل صراحه هل زوجك من نوع التوصيل السريع :30::30: ولا المتعاطف معك
:06::06:



الموضوع منقول من ساحه الاقلاع