..............
الخميس الساعه 9 مساء
ريم : الو هلا ميساء
ميساء :هلا حبيبتي
ريم:شفتي الكابتشينو اللي مسويته امس ام سلمان خطييييير احلى من اللي بستار بوكس
ميساء: صدقتي روعه
ريم :انا بسويه اليوم لماجد عشان يعرف انه محظوظ فيني ,وامه دعت عليه انه اخذني ,اقصد دعت له
ميساء: ههههههههههههههه وانا بعد بسويه لمشاري
...........
يوم الجمعه الساعه 10 صباحا
صحت ريم غسلت وجهها بسرعه ولبست روب واتجهت للمطبخ تسوي الكابتشينو بالطريقه اللي اعطتها اياها ام سلمان بالتفصيل
وماجد صحى واخذ دش وراح عالمطبخ يشوف وش تسوي ريم
ماجد : صباح الخير ياحلوه
ريم : صباح الخير حبيبي
ماجد : اش تسويين
ريم : بسوي لك كابتشينو ماذقت قبله ولا بعده
ماجد : تعرفين ؟
ريم :اذا انا ما اعرف اسوي مين اللي يعرف .
ماجد: خلاص بنتظرك,وراح للصاله وفتح التلفزيون يشوف اخر الاخبار.
ريم خلصت بسرعه وحطت الكوبين على الطاوله وناولت واحد لماجد وهي مبتسمه
واخذت لها واحد
وبعد ما ذاقوه ساد الصمت على المكان
ريم بخجل : الله يهديكي ياام سلمان ما اعطتيني الطريقه صح
ماجد وهو يحس بقشعريره في بدنه : هذا اللي لا قبله ولا بعده هههههههه هذا بعده كثيييييييييييير
ريم ساكته وخجلانه
ماجد: اليوم رايحين لاهلي تجهزي
ريم : زين
.................
في الشقه المجاوره
ميساء صحت من النوم غيرت قميصها ببيجامه بناتيه خفيفه ولمت شعرها على فوق كله وحطت كحل خفيف ازرق
وراحت تحضر الفطور
وبعد ما طلع زوجها للصلاه راحت عالمطبخ وسوت لها كابتشينو بطريقه ام سلمان وكمان هي ما ضبط معاها تحطمت ,الا وجوالها يرن,
ريم : شفتي ام سلمان ما اعطتنا الطريقه صح سويته وطلع وووووووووووع وتفشلت من ماجد
ميساء : ههههههههههههه حتى انا ما ضبط معاي بس سويته بعد ماطلع مشاري,اكيد فيه غلطه سويناها انا بتصل على ام سلمان واتاكد.
............
راحت ريم لبيت اهل زوجها
دخلت وسلمت وقعدت تسولف مع ام زوجها وطلعت لخواته بالغرف وسوالف وضحك
ريم داخله معاهم بقوه كانها في بيت اهلها
ام زوجها : كيف اهلك ياريم اش اخبارهم واخبار خواتك
ريم طبعا على نياتها ربع ساعه اعطتها كل اخبار العايله
بالذات ام زوجها ماتخبي عنها شي عشان تبغاها تحبها وتعتبرها زي بنتها.
وتعامل اخت زوجها وسلايفها كانهم خواتها.
اخت زوجها قربت منها : متى شريتي البلوزه هذي ماشفتها لما كنا ببيتك
_ ريم لما يجو بيتها توريهم كل اغراضها الجدد _
ريم : اهدتني اياها اختي
ام زوجها : ليه ماجيتي يوم الاثنين انا قلت لماجد يجيبك ,عندنا خالته وكانت تبي تشوفك
ريم انحرجت : كنت تعبانه شوي وما قدرت اطلع من البيت
ام زوجها وهي تلف بوجهها عنها وماهي مصدقه : سلامتك
اخت زوجها : رحتي سيتي ماكس اللي بجنب بيتكم
ريم : ايوه
اخت زوجها : طيب ليه ما قلتي لي ما قلت لك اذا بتروحين كلميني بروح معك
ريم : نسيت والله
ام زوجها : بنت خالك سعود انخطبت ؟
ريم : ايوه
ام زوجها: وليه ماقلتي لي
ريم : باقي الموضوع ماصار رسمي
ام زوجها : نص المملكه درو وماصار رسمي.
ريم انحرجت وماقدرتت تتكلم.
...........
حست ريم بالضغط من التدخلات والاسئله اللي ما لها داعي
وتتساءل ليش مركزين عليها كذا وسلايفها الثانيات محد يقول لهم شي
.........
طبعا علاقتها بسلايفها راح يكون لها حلقه خااااااااااااااااااصه
..................
بالسياره
ريم : افففففففففففففففففف
ماجد :خير
ريم : طفشت
ماجد: من اهلي؟؟؟؟؟؟؟؟؟؟
ريم : ايوه احس انهم يتعمدون يضايقوني
ماجد : وش صار الحين
ريم : مافي شي بس اسئلتهم ما ادري
ماجد التفت عليها بنظره ذات مغزى وهو ساكت
ريم : احس اني ما ارتاح ,اسئله وتدخل واش شريتي ووين رحتي وليش ما قلتي وليش ما جيتي
ماجد : كلام فاضي انا قلت مسويين فيكي شي كبير
ريم : تقول كلام فاضي طبعا لانهم اهلك
ماجد : ايوه اهلي ولا عاد تجيبين سيرتهم على لسانك فهمتي
ريم : انا اش قلت اصلا انا ما بعد قلت شي
ماجد : خلاص سكري الموضوع
ريم : بدال ما توقفهم عند حدهم تقول لي سكري الموضوع
ماجد عصب : اوقف مين ,أمي ,انتي ما تستحين هذي مثل امك المفروض تستحملينها وتجاملينها
ريم في نفسها : ياالله بيذبحني ماهو حاس فيني ابدااااااااااا
.............
كمان ميساء راحت يوم الجمعه لاهل زوجها
ميساء دخلت وسلمت على خالتها وباست راسها
خالتها يعني ام زوجها
خالتها : كيفك وكيف اهلك
ميساء : تمام
خالتها : سمعنا ان بنت عمك اللي بالطايف قاعده عند اهلها ليش ؟زعلانه من زوجها؟
ميساء : ما ادري
خالتها بتعجب : كيف ماتدرين ماتعرفين اخبارها
ميساء : احنا سمعنا مثل ما سمعتو بس ما نحب نتدخل باحد اذا هم ماتكلمو مانسالهم
خالتها: امممممممممم
ميساء : وين البنات
خالتها : فوق اطلعي لهم
ميساء : لا خليهم براحتهم بنتظرهم هنا
خالتها : كيف جيرانك
ميساء : طيبين يسلمون عليكي
...........
كانت رسميه معها كثير لانها تعرف قبل ما تتزوج مشاري انها تحب تتدخل بالناس ولسانها طويل شوي
............
لو سمحتو يابنات عالم حواء لاحد تجي تكتب لي ليش مصوره اهل الزوج انهم سيئين
بقول لكم فيه اهل ازواج مثل العسل على القلب
وفيه مثل العلقم
اللي مثل العسل ما نحتاج نصايح للتعامل معهم
فنجي للجانب السيء ونمثله عشان ننصح ونوجه
واعرف ان اغلب اهل الازواج طيبين وقليل هم اللي على شاكله من في قصتنا
..............
نرجع لميساء حبيبتنا الحلوه
نزلو اخوات زوجها وجاو سلايفها وقعدو يسولفون وهي تشارك بمواضيع عامه وتحاول تحط حواجز من الاحترام والتقدير بينها وبين كل الموجودين
وما تسمح باي تدخل او تطفل بحكمه منها وذكاء
لكنها كانت لطيفه وكلامها زي العسل
.........
اخت زوجها : ليه غيرتي لون شعرك ما يناسبك الاول احلى
ميساء بابتسامه ودلع : مشاري طلب هاللون
اخته : وعجبه؟
ميساء : مررررررررررررررره
...........
ام زوجها : ليه ما طلعتي معنا الاستراحه يوم الاثنين
ميساء بثقه : الاثنين دوريه الجيران وما احب افوتها
ام زوجها : الجيران جنبك اي وقت بتلاقينهم
ميساء : احنا مانلتقي ببعض الا الاثنين وانا كل اثنين ما ارتبط باي احد عشان الجيران. مرررره قعدتهم وناسه
-ميساء اوصلت لخالتها رساله انها مستقله ولها راي وماهي تابعه لاحد وهذا من حقها مثل ماهو من حقهم يكونو احرار بطلعاتهم ولقاءاتهم مع جيرانهم او اهلهم-
..............
ميساء كانت تحب اهل زوجها وسلايفها حتى وان كانت تكره منهم بعض التصرفات واحيانا تتمنى تدخل معهم اكثر وتسولف باريحيه لكنها دايما ترن في اذنها كلمات امها الحكيمه اللي جربت الدنيا من قبلها
-ياميساء يابنيتي اهل زوجك مهما كانو طيبين خليكي معهم رسميه لا تهدمين حاجز الاحترام والهيبه بينكم والا بتفتحين على نفسك ابواب صعب تتسكر وبتاثر على علاقتك بزوجك وترهقك -
..............
انتهت الزياره
.........
بالسياره
ميساء : مساء الخير
مشاري : مساء الخيرات يامياستي, شلونك ان شاء انبسطتي
ميساء: الحمد لله
مشاري :شلون امي معاكي
ميساء: دامها امك اكيد عسل
مشاري: وخواتي؟
ميساء :فديتهم كل الوقت اتذكرك فيهم تتشابهون كثير
مشاري : ههههههههههههه انا اشبه البنات
ميساء : خواتك !!!!!!!!!
............
بعد اسبوع من التجارب اتقنت ميساء وريم الكابتشينو اخيرا
بس الفرق انه في بيت ريم كله تحت عين ماجد الله يعينه كل يوم كابتشينو غير
اما عند ميساء كان كل شي بسريه حتى يوم الجمعه الثاني
.............
يوم الجمعه الساعه 10 صباحا
مشاري توه مصحصح وقاعد بالصاله الا ميساء تدخل وهي شايله صينيه وفيها كوبين من الكابتشينو وشكلهم روعه ومشهي
وتمد واحد لمشاري وتاخذ لها واحد وتجلس تتفرج على التلفزيون ومسويه نفسها عادي مومهتمه
مشاري يناظر ومومصدق: انتي اللي مسويته
ميساء: ايوه
مشاري يشرب شوي ويلتفت عليها : الله طعمه خيال يجنن تسلم ايدك
ميساء : بالعافيه حبيبي
مشاري : خلاص مافي روحه للمقاهي كل يوم عندك
ميساء :ههههههههه
......................
ماجد وهو يشرب الكابتشينو اللذيذ : اخيرااااااااااا
ريم زعلانه : بدال ما تقول تسلم ايدك
ماجد : ياشيخه كرهتنيني بالكابتشينو كني فار تجارب كل يوم مرتين ثلاث
ريم : لا تبالغ
ماجد : اقل لك شي بس لاتزعلين
ريم بغيض : ايش
ماجد: صرت اذ شفت مقهى يجيني غثيان
..................
سؤال لكل حوائيه
انتي ريم ام ميساء
..........
انتهى
.................
عزيزتي اذا عجزتي عن الرد لا تعجزي عن الرفع
روابط الحلقات السابقه للي طلبوها
الحلقه الاولى
httpum.hawaaworld.com/showthread.php?t=3161730
الحلقه الثانيه
http://forum.hawaaworld.com/showthread.php?t=3163755
الحلقه الثالثه
http://forum.hawaaworld.com/showthread.php?t=3168694
الحلقه الرابعه
http://forum.hawaaworld.com/showthread.php?t=3172113
والا نخليها عن شي رومانسي اكثر