..................
الساعه 7 مساء
ريم في زياره لميساء
ريم: اه ياميساء يااختي زوجي كأنه ساكن لحاله بالبيت
ياكل ويشرب وينام ويطالع التلفزيون وهو ساكت
ولا كأني موجوده بالبيت
ميساء :تصدقين عاد حتى مشاري كذا
عايش حياته كأنه عزوبي
طلعات مع اصحابه وروحات ويرجع يقعد ساكت يشوف التلفزيون وينام
مليت مررررررررررره ياريم ما تعودت على مشاري كذا
ريم : وانا بعد مليت متعوده على ضحك ماجد واستهباله وسوالفه
تقولين اش فيهم
ميساء : مدري يا اختي
ريم : انا شكيت بنفسي قلت اكيد زعلته بدون ما اقصد
ميساء : وانا حاسه اني ماعدت اثير اعجابه وماادري وش اسوي له عشان يرجع لي
ريم : انا كل شي سويته لماجد ومافي فايده
قريت كل مواضيع الرومانسيه والتواصل
وكل يوم اطبق فكره
وليله حمرا وزرقاء وخضرا وهو عنده عمى الوان
ميساء: هههههههههههههه
ريم : والله ياختي ولبس وكشخه واهتمام وعطور وحكي وماجد لا ارى لا اسمع لا اشم
ميساء: ههههههههههه
ريم : من جد يا ميساء مادريت من وين اجيه ماادري اش الحاله اللي هو فيها وما يبي يطلع منها
ميساء: انا بعد احاول اتقرب من مشاري وهو جامد ولا يلتفت
يحاول ينشغل عني وصار باااااااااااارد ماعاد يسال عني ولا يعلق علي ولا شي
كاني موعايشه معه بنفس البيت
ريم : ياخوفي خلاص ملو رجالنا منا ويبون يتزوجون علينا
ميساء: انتي كل شوي تقولون يبون الزواج يبون الزواج ماعندك تفسير صاحي ؟
ريم : طيب ليه كذا
ميساء :والله مدري
لحضه ياريم
لحضه ياميساء
لحضه ياحوائيات
لا تروحون بعيد وتاخذكم الافكار وتجيبكم
انا ادري وش فيهم رجالكم
............
يمر الرجل بدوره عاطفيه يحتاج فيها الى الانسحاب المؤقت من حياته الزوجيه
ينسحب ليشبع حاجاته الى الحريه والاستقلال
وفي هذه الفتره تبدا المراه بالشك في نفسها وتبدا باصلاح بعض الامور فيها والتقرب اليه
في الوقت الذي يجب عليها فيه ان تتفهم حالته وتتركه ياخذ مداه من الانسحاب حتى يعود اليها اكثر استعدادا للحب والعطاء
وعلى قدر الحريه اللي ياخذها في انسحابه يكون استعداده للحب والموده والتواصل
اما اذا اصرت الزوجه على موده مستمره وظلت تجري خلفه فانه يبتعد ويحاول ان يهرب بنفسه وبعدها لا يجد الحافز لكي يشعر بشوقه وحاجته للحب من جديد
................
نرجع لابطال قصتنا
رجعت ريم لبيتها
وتركت ميساء وفي راس ميساء الف علامه استفهام
...........
ميساء جلست عالنت تبحث حتى وصلت لموضوع عن انسحاب الرجل
وهنا تفسر لها كل شي وحست براحه
وبدات تشغل نفسها عن مشاري
راحت بيت اهلها وباتت عندهم
وراحت السوق مع اختها
وسنترت في عالم حواء تقرا مواضيع وتقيم وتشارك بردود ايجابيه
وعزمت صديقاتها
...........
اما ريم فما اقتنعت بكلام ميساء
وماقدرت تتحمل الوضع وصارت بينها وبين ماجد كم هوشه ولا تغير حاله
وهذا زاد من حقدها عليه
.............
انتهت الفتره العصيبه وعدت فتره الانسحاب على خير
ورجع كل واحد لطبيعته
...........
ماجد راجع البيت وهو يفكر بريم
حس انه كان جاف معها الفتره الاخيره
وكان ناوي ياخذها لمطعم راقي ويعشيها
وياخذ لها هديه
في هذا الوقت ماجد كان مستعد للعطاءو للحب وللغزل ولو طلبته ريم عيونه بيعطيها
وفي هذا الوقت كان سيسعد بحركات ريم الرومانسيه ومفاجأاتها
دخل بهذي النفسيه ولقى ريم جالسه بالصاله
ماجد بكل حنان : مساء الخير ريمو
ريم : هلا
ماجد : كيفك
ريم : ................
ماجد قرب منها ويحاول يمازحها ويلطف الجوعارف انها ماخذه على خاطرها منه
صدته ريم بقسوه ورجعت لورا
ريم : هيه انت انا مولعبه عندك متى ما بغيتني تلقاني واذا لا, كاني قطعه اثاث بالبيت
وانفجرت ريم وطلعت كل اللي بقلبها على زوجها
ماجد وقف مصدوم منها
شي ما توقعه ابد
ويشوف انه ماغلط عليها بشي يستاهل كل اللي تسوييه فيه
ماتكلم ماجد ابدا ولا رد عليها
راح لغرفه نومهم وحاول ينام
دخلت ريم بعد فتره
وسوت نفسها بتنام
التفت عليها ماجد وحط يده على يدها وابتسم لها
سحبت ريم يده واعطته ظهرها
...........
على نفس السرير
ماجد يتقلب وكانه على جمر
وريم معطيته ظهرها وتحس بنشوه الانتصار
وتقول في نفسها: حس بالجفا ياماجد والالم اللي تسببه لي
.........
ترك ماجد الغرفه وراح الصاله وفتح اللاب توب الخاص فيه وقعد عليه الى الساعه 3
..........
معلومه : في فتره العوده من الانسحاب اذا لم تشبعي زوجك وتحتويه فانك تعرضين نفسك لخيانته او تفكيره الجاد بالزواج وسيكون زوجك فريسه سهله للفاتنات سواء على الانترنت او غيره
لانه يصبح كالجايع الذي يبحث عن اي شي يسد به جوعه
.........
نسيت ريم او تناست تحذير نبينا محمد عليه الصلاه والسلام
فداه نفسي ووالدي وولدي
الذي امر المراه ان تجيب زوجها ولو كانت على التنور
لا ينطق عن الهوى
الله الذي خلق الرجل ويعرف طبيعته
وامرنا بذلك
وان احتراق الخبر في التنور اهون من احتراق الاسره
........................
عزيزتي حواء
تفهمي زوجك
اعرفي متى يريد الحب ومتى لا يريد
متى يستطيع العطاء ومنى يعجز
لا تضيعي على نفسك وزوجك لحضات الموده بدعوى الانتقام والكبرياء
وتذكري حالك يا اختي في وقت ماقبل الدوره كيف تكون نفسيتك ومزاجك وقدرتك على العطاء وتقبلك له
.............
اما ميساء فكانت تنتظر عوده مشاري لها بشوق
اعطته مجال واسع للانسحاب
وهي انشغلت باشياء مفيده لها
وعرفت انه سيعود لها بكل حب وشوق
ورجع لها مشاري واحتوته بكل حب
وتبادلا الحب والشوق والوصال
وهنا تفنتت ميساء باللبس والحركات والكلام
وعاشو لحضات رائعه مع بعضهم وطلعو وتمشو وانبسطو
...............
في اليوم الثاني
صحى ماجد ومزاجه متعكر
راح لعمله وهو متضايق ومتوتر وماهو قدر يتحمل احد ولا يسيطر على انفعالاته
وحصلت بينه وبين مديره بالعمل مشاده كلاميه ورجع لمكتبه متضايق,
رجع للبيت تعبان ويحس انه ضايع ومشتت
كان احوج مايكون لريم
يبيها تحس فيه وتشيل عنه همومه وتريحه
دخل البيت وريم ما زالت زعلانه وعلى حالها
سلم عليها وردت ببرود
ريم : ابي توديني السوق اليوم
ماجد : ابشري
ريم : المغرب زين؟
ماجد : او كي
تغدو وريم ساكته ودخل ينام لوحده
والمغرب طلعو السوق
...........
اه منك ياريم
زوجك في هذي الحاله وتودينه السوق
مرتع الشياطين
...........
كلنا عرفين المولات هالايام
البنات الكاشفات
والمغازلات
والعبايات والملثمات
والحريم اللي ما يستحون ويغازلون الرجال قدام زوجته
...........
وطبعا ريم اذا زعلانه او متكدره ماتحط اي شي من الزينه بس بيجامات او قمصان قديمه
على بالها ينكد على ماجد وتنتقم منه
.........
راحو السوق وريم حايسه بيت المحلات وتدورومحتاره وش تختار
وماجد ماقصر يطالع ويطالع بهالبنات عن يمينه ويساره
ويمتع ناظريه بحسناوات الاسواق
_ ماجد وسيم وجذاب وانيق - وهذا الشي خلى كثير بنات يحاولون يتقربون منه ,
اخيرا لقت ريم فستان اعجبها وراحت لماجد بتاخذ رايه
وشافته وهو يناظر بوحده وعلى وجهه ابتسامه خفيفه
التفتت الا تشوف هذيك البنت اللي لابسه عبايه مخصره وكاشخه على اخر شي وريحه عطرها فايح
وقاعده تناظر بماجد بنعومه
تركت ريم كل شي بيدها وطلعت زعلانه
وماجد وراها
.........
وفي السياره انواع الهواش والتجريح وانتهى السوق بمشكله
...........
راحت ريم وفتحت النت ودخلت عالم حواء قسم (حياه اسريه سعيده )
وكتبت مشكلها كالتالي
..........
(بنات انا اسوي لزوجي كل شي ليالي رومنسيه ولبس ودلع وهو ما يناظر فيني ويوم رحنا السوق يتلفت على البنات ويبتسم
ليه يفتنونه البنات اللي برا وانا لا ؟
لاتقولون انتي مقصره انا مااقصر معاه ابدا
احس الرجال ما يستاهلون نسوي لهم شي اش رايكم
).................
الله يعينك ياماجد على مابلاك
............
انتهت القصه
الله الله بالردود
......
اعتذر لاخواتي اللي طلبو حلقه السلايف عن التاخير
لاني باقي ماجمعت معلومات كافيه عن الموضوع
انا ماعندي الاسلفه وحده وعايشه بالخارج يعني ماعندي تجارب بس احاول اجمع من تجارب صديقاتي عشان يكون الموضوع واقعي ومفيد
انتظروني قريبا
اتمنى تعجبكم حلقه اليوم
ويارب يرزقكم جميعا السعاده في بيوتكم ومع ازواجكم