كيفكم يالغاليات
..................
اولا اشكر كل متابعاتي من كل قلبي على ردودهن اللطيفه وكلماتهن الرائعه اللي تشجعي على الاستمرار والعطاء
واتمنى انزل لكم كل يوم حلقه لكني ابغى الموضوع ياخذ حقه من المشاهده وياليت تساعدوني برفع الموضوع حتى انزل لكم الحلقات بسرعه
.................
وهذه الحلقه لكل اللي طلبو تكون عن السلايف
وعذرا على التأخير واتمنى تعجبكم
...........
الساعه 8 مساء
مشاري قاعد بالصاله ورايق
ميساء تقدم الشاي لمشاري : مشموشي ممكن طلب
مشاري وهو يبتسم : مشموشي !!!!!!
ميساء بدلع : خلاص ميشو
مشاري : خير
ميساء: حبيبي تعرف اجازه وطلعات وروحات وانا ملابسي صايره قديمه ومااحب اكون اقل من غيري
مشاري : من الاخير
ميساء : ابي السوق
مشاري : زين ,بكره بعد العشاء .
ميساء : زين
.............
اليوم الثاني الساعه 4 عصرا
على التليفون
ريم: كيفك ميساء وش قاعده تسووين
ميساء : اسوي فطاير وميني بيتزا لمشاري
ريم : ماهي العاده
ميساء : بنروح السوق
ريم :وش دخل الفطاير بالسوق بتكشتون هناك
ميساء : ههههههههه لا بس انا مااروح مع زوجي السوق الا وانا ماكلته والا في نص السوق بيقعد معصب ويبي نطلع واول مانركب السياره يوقف عند اقرب مطعم
ريم : ممكن ,ماجد كذا نلف ساعه ونص الا وهو معصب يبي يطلع من السوق,
تدرين انا بعد محتاجه السوق بروح اكلم ماجد يوديني, الله يعيني بحاول اقنعه مايحب روحه السوق
ميساء : مدري ليه الرجال مايحبون روحة السوق
.............
قلتو لي ليه الرجال ما يحبون روحة السوق
لان مخ الرجل يختلف عن مخ المرأه
الرجل لايستطيع التركيز على اشياء كثيره في نفس الوقت
عكس المرأه التي تستطيع التركيز على اكثر من شي في نفس الوقت
مثلا تطبخ وتكلم بالتليفون وتراقب اولادها وووو
الرجل لااااااااا
والسوق بما يحويه من صخب وتنوع والوان واشكال يشتت فكر الرجل فيشعر بالاستياء والضيق.
..........
عرفتو ليه الرجال مايحبون يودونا السوق
وانا افضل اللي عندها اخت او جاره ممكن تروح معها السوق افضل من زوجها الا اذا اضطرت والله يعينا احنا الحريم
............
نرجع لقصتنا
.............
ريم : ماجد ابي السوق
ماجد : توك رحتي
ريم : بكره كلنا بنجتمع ببيت اهلك وماعندي لبس حلو
ماجد : بشوف
ريم : اليوم ضروري
ماجد وهو مكشر : زين
...........
راحت ميساء السوق بعد ما اكلت هي وزوجها الفطاير والبيتزا
واشترت كل اللي تبيه وعدى المشوار على خير
...........
وريم كالعاده بنص السوق وماجد بدا يعصب ويبيها تخلص بسرعه
وهي تضايقت منه ورجعت وما خذت كل اللي بخاطرها
...........
اليوم الثاني راحت ريم لبيت اهل زوجها
وهناك قابلت سلفتها ام فيصل زوجه نايف اخو ماجد الكبير
عندها فيصل عمره 7 سنوات
وكانت حامل بنهايه التاسع
ام فيصل قليلة الحظ من الجمال
وعلاقتها مع زوجها دايما متوتره
هي تحس انه ما يحبها
وله علاقات مشبوهه مع البنات على النت
ويحب بالصيف يسافر لوحده ويحطها عند اهلها
...........
دائما تقارن بين زوجها وبيم اخوه ماجد
ماجد شخص محافظ ومرح وما يسافر مكان الا مع ريم
...........
كل هذا ادى الى غيرتها الشديده من ريم
وطبعا قبل هذي الاسباب كلها
لان ريم جمييييييييييييييييله وهي لاااااا
...............
بالمجلس
ام فيصل , ريم, ام ماجد
ام فيصل : كيفك ياريم صارت جياتك قليله لاهل زوجك
ريم : لا بالعكس انا كل اسبوع اجيهم
ام فيصل : قليل كل اسبوع
خالتهم : اي والله قليل ما بيننا الا شارعين وكل اسبوع نشوفها
ريم : الدنيا مشاغل
ام فيصل : ايه مشاغل لاعيال ولا وظيفه وش مشاغله
ريم : ................
الخاله : كم باقي على ولادتك ياام فيصل
ام فيصل : مابقى شي هالاسبوع ان شاء الله
الخاله : ان شاء الله تجيبين سميتي
ام فيصل : اكيد مافيها حكي , وتلتفت على ريم
الا ريم ليه ماحملتي للحين لك حول السنه متزوجه
ريم : متى ماكتب ربي بحمل
ام فيصل : روحي للمستشفى شوفي نفسك في امل تحملين والا لا
وتلتفت على خالتها : اكيد خالتي متشوقه تشوف ولد لماجد حبيبها
الخاله : اي والله ودي اشوف عيال ولدي ماجد واضمهم
ريم ساكته ماهي عارفه اش تقول وعيونها امتلت دموع
ام فيصل : والا الله يعينكم ياخالتي تدورون له اللي تجيب العيال
ريم انصدمت : وش دخلك بالموضوع انتي
ام فيصل : انا وحده من العايله وماجد مثل اخوي وخالتي مثل امي اشلون مااتدخل بالموضوع
ريم حست انها مخنوقه وموقادره تتكلم
ام فيصل : وش صار يا خالتي على الجماعه اللي جونا يشوفون ملاك
ملاك تكون اخت ماجد
الخاله : ماعاد ردو علينا !!!!!
ام فيصل : غريبه مع ان البنت اعجبتهم كثييييير
وتلتفت على ريم : اكيد احد قايل لهم شي وهونو
هنا ريم تركت الغرفه واتصلت على ماجد
ريم : ماجد تعال بسرعه ابي ارجع البيت
ماجد : خير وش فيك
ريم : تعبانه
...........
في نفس الوقت حست ام فيصل باعراض الولاده وكلمت زوجها وجا اخذها للمستشفى
وريم رجعت لبيتها مع ماجد
وطول الطريق ساكته
وماجد نزلها البيت وراح مشوار
وهو راجع البيت بالليل اتصلت امه تبشره ان مرت اخوه جابت بنت
............
ماجد : مرت اخوي جابت بنت قبل شوي
ريم ببرود وعيونها حمرا من البكي : مبروك
ماجد : اش فيكي
ريم : مافيني شي بس انا ماراح ازورها بالمتشفى ولا بالبيت ,انا بقطع علاقتي فيها
ماجد : خير وش صاير
قالت له ريم باللي صار وطبعا تعرفون راي الرجال في كلام الحريم
ماجد : مهما صار هذا اخوي وهذي زوجته لازم تسووين الواجب ومايصير تقاطعيهم
ريم : انا ماني مستعده اتعب اعصابي واقعد اسمع كلامها المر .وماراح ازورها
ماجد : وش بيقولون عليكي اهلي
ريم :انت ماتفكر الا بكلام الناس انا مااهمك , انت لوتحبني ماتفكر باي احد ولا تجبرني ازورها
ماجد:عشان اثبت لك اني احبك اسايرك بالغلط ؟؟؟انتي لوتحبيني ماتحطيني بهالمواقف
ماتسووين قطيعه بالعايله عشان كلام فاضي
ريم : يعني ايش
ماجد : يعني بتروحين لها وتسووين الواجب, واذا قالت لك شي ردي عليها والا طنشيها
ريم : مااقدر استحمل كلامها وما اعرف ارد عليها ,فيه كلام يخليك مصدوم وينربط لسانك
هي تبي تكره اهلك فيني وتوريهم انها احسن مني
وقعدت هي وماجد في نقاش وهواش انتهى بزعل كبير بينهم
وطلع ماجد ينام بالمجلس
وريم قعدت تبكي وتقول في نفسها : بدال ماتواسيني يا ماجد وقفت في صفهم ضدي
الله لا يوفقك ياام فيصل مشاكلنا من تحت راسك وانتي نايمه ومرتاحه
.........................
ميساء راحت لاهل زوجها بعد
دخلت هي ومشاري واستقبلتهم عند الباب سلفتها الكبيره ام فهد ,طبعا بنقابها
ام فهد : حيا الله ابو عبد العزيز
ميساء في نفسها : ابو عبد العزيز !!!!!!!!!!! ماقد قال لي مشاري انه يبي يسمي ولدنا عبد العزيز وش دراها هذي
مشاري : هلا ام فهد
ام فهد دخلتهم الصاله وضيفتهم القهوه والحلا
ام فهد : خالتي فوق الحين بتنزل
وقعدت قريب من مشاري وتسولف هي وياه ولا كان ميساء موجوده
نزلت خالتها وسلمت عليهم
بعد ماسلم مشاري على امه قال: استاذنك يمه بروح زملائي منتظريني بالقهوه
ام فهد : والله ماتروح بجيب الشاي
ميساء تغلي من الداخل
جابت ام فهد الشاي وحطته على الطاوله
راحت ميساء بسرعه وصبت كاس لمشاري وحطت ملعقه سكر
ام فهد : حطي ثانيه مشاري يحب الحلا زايد
ميساء
ام فهد : ابشرك يابو عبد العزيز خطبنا لاخوي مساعد
مشاري: على البركه
ام فهد : بنت عمي سلطان ,بنت مثل القمر ,جمال واخلاق وتربيه ماهي حقت جامعات وكليات لااااااا
تشوف شغل بيتها وطبخها تقول هذي ام عشره
مشاري : الله يوفقهم , يالله انا رايح يمه تبين شي
ام مشاري : سلامتك ياولدي
............
ولما جاء مشاري يرجع ميساء للبيت راحت معهم ام فهد عشان يوصلونها بيتها لان زوجها مشغول
وطول الطريق سوالف مع مشاري وضحك وكانه اخوها ولا هي حاطه اعتبار لميساء
وميساء ساكته و حاسه انها غريبه بينهم
...........
بعد مانزلت ام فهد وعيالها لبيتهم
بالسياره
مشاري : تدرين ياميساء ام فهد هذي طيبه وقلبها ابيض
ميساء : مشاري
مشاري : هلا
ميساء: ليه تسولف معك كذا كانها اختك المفروض انها تستحي شوي
مشاري : هههههههه تستحي مني هذي دخلت بيتنا واحنا صغار يعني اشوفها زي اختي الكبيره
ميساء ماقدرت تتكلم وحاسه بنار داخلها
................
وصلو بيتهم
وميساء راحت جلست لوحدها تفكر
اش تقصد ام فهد بهذي الحركات قدامي
هذا زوجي مو زوجها
ليه تحاول تضايقني كل ماقابلت مشاري
-ماوصلت لنتيجه-
طيب اشلون اقنع مشاري انها تسوي كذا تتعمد تضايقني
وشلون اقول له اني اغار عليه منها
وهو يعتبرها اخته الكبيره
وانه عيب تمدح قدامه بنات الناس
وهل بيتقبل مني
يارب تكون بعوني
...........
قطع عليها افكارها دخلت مشاري
مشاري : اش فيكي حبيبتي من جينا من بيت اهلي وانتي متضايقه
ميساء : مشاري بقولك سالفه بس اوعدني تسمعني للاخير وماتقاطعني
مشاري : اوعدك
ميساء : تخيل اني لما اروح بيت اهلي اقابل ولد خالتي اللي من يوم واحنا صغار اعرفه ويعرفني
ويقعد يرحب فيني ويسولف معي و ينكت ويمزح, واذا كنت انت موجود يقعد يمدح بنفسه وباخوانه وانهم مافيه مثلهم بالرجال وكل شوي يقول ياميساء وياميساء
وش بيكون شعورك
مشاري : بذبحه
ميساء : ليه هذا ولد خالتي ومثل اخوي وطول عمرنا نعرف بعض ونتكلم كذا
مشاري : هذا قبل ماتتزوجين , لا وقدام زوجك بعد هذا قليل ادب
ميساء : لاااا هو طيب وقلبه ابيض
مشاري حس انها تقصده : ميساء وش السالفه
ميساء : شفت شعورك الحين يامشاري هو نفس اللي احسه مع ام فهد
مشاري: ام فهد حرمه كبيره
ميساء : وولد خالتي رجال كبير
مشاري سكت وحس فعلا باحساس ميساء
ميساء : مشاري حسيت فيني, انا زوجتك احبك واغار عليك
مشاري : طولي بالك عليها حبيبتي هي طبعها كذا ما بنغيرها
ميساء : انت تتغير مو هي , هي مالنا سلطه عيها
مشاري : وش اسوي مااروح بيت اهلي يعني !!!!!!!
ميساء: اذا تحبني حاول تتجنبها واذا صارت موجوده لاتدخل البيت روح وقت ثاني واذا صار وتواجتهتو حاول ماتدخل معها بسوالف بس كلمه وردها.
............
وانهت ميساء الموضوع وماانتظرت موافقه مشاري وماحبت تضغط عليه خلته يفكر بالموضوع بعد مابينت له احساسها
...........
بعد يومين
مشاري : انا بمر الوالده تبين شي
ميساء: سلامتك وش رايك نعزمهم بكره عندنا من زمان ماجونا
مشاري : زين
ميساء : خلاص كلم امك وشوف اذا فاضيين بكره حياهم الله
مشاري : زين وبكلم ابو فهد هو وعياله بعد
ميساء : زين
...............
مشاري : يمه انتو معزومين بكره عندنا
ام مشاري : وميساء تدري
مشاري : ايه هي اللي قالت لي نعزمكم انتو وبيت اخوي ابو فهد
ام مشاري : غريبه
مشاري مستغرب : ليش غريبه
ام مشاري : لانها تقول لام فهد ما احب اعزم اهل زوجي ببيتي كثير ويحوسون البيت, احب بس صديقاتي اللي ماعندهم اطفال
مشاري : ميساء تقول كذا
ام مشاري : ايه واسال ام فهد اذا منت مصدقني
...........
مشاري رجع البيت وهو معصب :ميساء انتي قلتي ماتحبين اهلي يجونا البيت
ميساء: لا والله ماقلته
مشاري : امي تقول انك قايله هالكلام لام فهد
ميساء : والله ماقلت كذا
مشاري : يعني الحرمه بتكذب عليكي
ميساء : ايه تكذب والله ماقلت لها شي
شوي الا ميساء تذكرت
ميساء : اخر مره تقابلنا عند اهلك سالتني عن ام سلمان جارتي
قالت لي تجيكي بالبيت
قلت لها لا هم عايله كبيره
انا اروح لهم انا خفيفه
بس هذا اللي قلته والله مازدت كلمه
..................
راح مشاري لامه وفهمها الموضوع
امه اتصلت على ام فهد
وام فهد انكرت كلام ميساء وقالت انها قالت مااحب اهل زوجي يجون بيتي
وام مشاري مصدقه ام فهد
ومشاري قال لامه انه بيزعل منها اذا ماجات بيته هي وكل اخواته واخواته ومنهم ابو فهد وعياله
................
رجع لميساء وقال لها كل اللي صار
..............
ميساء تكلم امها بالتليفون وتبكي
ميساء : يمه تكذب علي عند خالتي والكل مصدقها
امها : ماعليكي يمه ربك بيكشفها اهم شي زوجك مصدقك
ميساء : ايوه مصدقني وطاحت من عينه ويقول حتى لو قلتي لها شي ليه توصله لامي , هذي وحده فتانه
امها : خلاص يابنيتي ماعليكي بيجي يوم وكل شي بيبان
ميساء : يايمه وربي مقهوره ومشاري عزمهم بعد كلهم, انا بقول له لاتدخل بيتي ولا اروح بيتها يكفيني ماجاني
امها : لااااا انتبهي يابنيتي ماراح يطاوعك بس بتخربين اللي بينك وبينه, يايمه لا تحطين زوجك بموقف اختيار بينك وبين احد من اهله وهذي مرت اخوه
ميساء : يمه ماني طايقها اشوف وجهها شلون استقبلها ببيتي بعد اللي قالته
امها : ماعليه يايمه تحمليها عشان زوجك واكسبيه وربي بيعوضك خير
ميساء : الله يعيني ادعي لي يمه هذا مشاري جا مع السلامه
................
مشاري : كيف الحال
ميساء: تمام
مشاري : باقي زعلانه
ميساء : وليه ماازعل وهي تكذب علي وتفتن علي عند امك وكلكم مصدقينها
مشاري : لااااااااا انا ماني مصدقها , بس انتي لازم تنتبهين مره ثانيه بكلامك معاها ماتعطينها فرصه تلف كلامك لصالحها
ميساء : اصلا ماراح اكلمها ابدا وبستقبلها ببيتي عشانك انت بس عشان ماتصير قطيعه بالعايله
مشاري : كل يوم تكبرين بنظري اكثر واكثر ياقلبي, وصدقيني مهما الواحد مثل الطيبه والحب وهو عكس من الداخل بيجي له يوم وينكشف , وانتي لاتشيلين هم احد اهم شي اني انا عارف انك صادقه وطيبه ومايجي منك الغلط
ميساء حست براحه من كلام مشاري وحمدت الله ان ام فهد ماوصلت لمبتغاها من انها تفرق بين مشاري وبينها بل صار العكس زوجها حبها اكثر وكبرت بعيونه , وقررت تتحمل اي شي عشانه
وهي واثقه بالله ان لكل ظالم يوم
............
اما ريم فخضعت لامر زوجها مكرهه وراحت زارت ام فيصل بالمستشفى بعد ولادتها بيومين
كان عند ام فيصل زوجها وولدها فيصل
لما دخلت ريم طلع ابو فيصل وقعد مع ماجد برا
ابو فيصل : زين جيت يااخوي زوجتي كتبو لها خروج الحين وسيارتي اخذها عبد الرحمن يرجع امي للبيت
ماجد : ولا يهمك حبيبي
وركبو السياره جميعا
ماجد وابو فيصل قدام
وريم وام فيصل وفيصل والبيبي ورا
ودار هذا الحوار
ماجد : كيفك فصول
فيصل : طيب عمي
ماجد : مارحت المدرسه اليوم
فيصل : ايه
ماجد : مبسوط صار عندك اخت حلوه
فيصل : لا مو حلوه ,تشبه امي , مافي احد حلو الا عمتي ريم
تبون تشوفون وجيه اللي بالسياره كيف صارت بعد جمله فيصل الاخيره -فديته-
ماجد
ابو فيصل
ام فيصل
ريم
فيصل بعد ماقرصته امه
ماقلنا لكم كيد الظالم في نحره
وسلامتكم
...........
الحلقه الجايه تبونها عن ايش ؟
شاركوني بافكاركم
...........................
رابط الحلقه 6 للي طلبوه
http://forum.hawaaworld.com/showthread.php?t=3198591