زوجي

السلام عليكم
ادخل في الموضوع على طول
بنات نهاية هذا الشهر حندفع نص ايجار البيت والمشكلة زوجي الين دحيم ماعنده الا 600 ريال فقط
وانا ما عندي الا طقمين ذهب وقال حنبيعهم او نبيع واحد منهم عشان ندفعا لايجار وانا بصراحة مترددة
الحمدلله على كل حال ظروفنا المادية صعبة وانا ما طلعت في الدنيا الا بهذي الطقمين
وقال بعد الحج حجيبلي طقم احسن من اللي عندي
وانا استخرت بس لسة مو مقتنعة بس في نفس الوقت ما ابغى ازعل زوجي وما ابغاه يدين لان عنده ديون من اول
ايش اسوي انا محتاارة ابغى اسمع رأيكم

وابغى اقول على حاجة تانية
زوجي يداوم من 7 الصباح الى 2 الظهر ومن 4ونص العصر الين 11 واحيانا 12 في الليل مع العلم انه مدير فنادق
يعني حر نفسه واحيانا احسه ما عنده شغل بس ما يبغى يجلس في البيت ويتعذر بالشغل
وكم مرة كلمته ان ما يصير زي كدا تجي البيت بس عشان تنام وماتجلس معايا ومدري ايش
واليوم لمن جاء الظهر اتهاوشنا قلتله هي كلمة وحدة يا تشوفلك حل مع شغلك هذا او كل واحد يروح في طريقه
وسكت ما قال شي وقال افا تبعيني ومدري ايش وانا اشتغل على شانك وقلتله لا ما تشتغل على شاني تشتغل عشان نفسك وبس وطلعتله دموع وقالي يا خوفي هذي الدموع تصير في النهاية ماتطلع واصير قاسي عليكي ورحت اعتذرت منه لان مررة حزني
ولمن اي احد يسأله ايش عندك اليوم وزي كدا يقول فاضي ولمن انا اقوله يقول مشغول مثلا اخته امس قالتله وديني للسوق في الصباح وقالتله اذا مو مشغول وقال لا عادي بس عندي شغلتين بسيطة وراح وداها ورحت معاهم ورحنا 8 الصباح ورجعنا 11 ونص الظهر وبعدها راح لشغله رغم اني امس سألته عندك شغل الصباح قال ايوة وحروح 7
وكمان شي تاني هو يقول راتبه 2000 ريال بس وانا ما صدقته تعتقدو كم راتب الاجنبي او السعودي اللي يكون مدير فنادق اللي عندها احد يعرف ياليت تقوللي
ومشكلة تالته كمان
ان عنده اخت وحيدة و6 اخوان رجال والمشكلة اخته هذي زوجها مريض وفيه شلل نصفي الله يشفيه
ومن وقتها وزوجي هو اللي يوديها لمشاوريها
والمشكلة طلباتها ما تخلص كل يوم تقريبا تدق عليه وتقوله وديني المشوار الفلاني ووديني السوق العلاني وكأنه ناقصني هي المشكلة اني ما اشوف زوجي بسبب دوامه الطويل وفوقها اخته ليل ونهار وفي الصباح وفي الليل تطلب منه واحيانا طلبات بسيطة زي مثلا جبلي خبز او جبلي الغداء وزي كدا
انا مقدرة شعورها ان مافي احد يوديها لان زوجها مريض وهي كمان ترى طيبة وحبوبة وعلى نياتها بس اكذب عليكم اذا قلتلكم ان عاجبني هذا الوضع بالله عليكم حطو نفسكم مكاني وكمان شوي ويخليني اكرهها لان يعشقها ومايرضى عليها ولا يرضى يرفض لها طلب
تخيلو لدرجة ان يجي 2 تعبان من شغله ويجي يبغى ينام وتقوم تدق عليه وتقوله تعال وديني المكان الفلاني
ويقوم لها حتى لو كان تعبان وهلكان
استغفر الله والله تعبت من هذا الوضع
اليوم مثلا قالتله تعال وديني المستشفى اللي جنب بيتها واقسم لكم بالله ان المستشفى 3 دقايق مشي على الرجول وتوصل للمستشفى وقلتله خلاص خليها تروح برجولها المستشفى مررة قريبة قال احترمي نفسك ومالك شغل في اختي اوديها ولا ما اوديها المهم اني ما اقصر معاكي في شي
هو بالفعل مو مقصر معايا بس دوامه جداااااا طويل وهذا الشي ما اتحمله ايش اسوي والله مو بيدي
ومن كثر شغل صارله 3 ايام ما طلبني من كثر شغله مع العلم زوجي xxxxxxومن النوع اللي لازم كل يوم على الاقل مرة يطلبني مهما كان تعبان
اسفة طولت عليكم وقلت كل اللي في قلبي
انتظر ارائكم