السلام عليكم
شخباركم ياحلوات مع الدايت يالله شدوا الهمة.. الرشاقة ماتجي الا بالعزم والارادة >>> يعني جبتي شي جديد اخلصي :angry2:
موضوعي باين من العنوان.. هذا الدايت لزوجي فديت قلبه اذا زاد وزنه وحب يضعف
هو باول الزواج كان 95 بس شكله ضعيف و وزنه الحلو 100.. لأنه ماشاء الله عنده عضل وكمان طوله تبارك الرحمن فوق 185
لما يآخذ راحته بالأكل ومايعمل رياضة يوصل 120.. خاصة منطقة البطن بلاوي من الكبسات والحلويات (هذي بيت القصيد) هو يقول انا ما احب الحلويات بس من تزوجتك صرت آكلها>>> ياويلي ع هالملاحظة
فبكتب لكم كيف ينزل 20 كيلو
بعد صلاة الفجر يشرب كاسين ماي لابارد ولا حار
الفطور
عادي يفطر اللي نفسه فيه حتى الشبع يعني مافيه اكل معين
بس الخبز اسمر الجبن خالي الدسم.. البيض يفضل مسلوق او مقلي بزيت خفيف والشاي سكره قليل هو كذا يحبه لأنه يحب يضيف العسل عالخبز
يروح الدوام وممكن هناك يآخذ قهوه او شاي بس سكره قليل او ماي
الغداء
يجي من الدوام تعبان فيآكل تفاحة (بس) وينام >>> ممنوع النوم يابانات والكرش مليان
تصير الساعة 5 يجهز نفسه للرياضة يلبس ويروح
الرياضة: اول يعمل تمارين تسخين وفك.. ثم يمشي ثم مشي سريع (هذا بربع ساعة) ثم يركض ما شاء الله تقريبا من نص ساعة الى ساعة الا ربع حسب لياقته.. اذا كان صار له فترة منقطع عن الركض يبدأ بالتدريج.. وبعدها تمارين استرخاء للعضلات وتمارين للبطن.. وخلاص>>> انا مرات اروح امشي معه فاراقبه
يجي عطشااااااان فيشرب كاسين ماي.. ومرات بعدما يجي من صلاة المغرب يجمع عياله على صحن فواكه غالبا يركز ع البرتقال ومرات الشمام والعنب (مفعول العطش)
العشاء
لازم يتعشى قبل صلاة العشاء او بعدها مباشرة هو صح جوعان بس عبى بطنه سوائل
اغلب الاحيان صحن كبير سلطة ومعاه تونة (سلطة بالتونة)
مرات التونة تكون مطبوخة بخضروات وبجانبها صحن سلطة
مرات مشاوي (مايحب اللحم كثير) فيكون دجاج مشوي من برى وكمان يآكل معاه سلطة
ومرات نفس الفطور وهكذا
وخلاص مايآكل شي وهوغالبا يحب السهر (ينام بعد العشاء باربع او خمس ساعات).. بس حتى وقت النوم ممكن يشرب عصاير وطبعا اللي من دون سكر (انانس، عنب، برتقال، رمان، كوكتيل).. وغالبا نشتري ماركة سيرز (Ceres)حلوة وتجي منها كوكتيلات انواع واشكال (مو سيزر انتبهو).. اللي ماتعرفه تكتب بجوجل (Ceres Fruit Juices) وتشوفه
وبشكل عام مايحرم نفسه من شي بس المقاضي كلها تصير خالي او قليل الدسم والرياضة يوقفها خميس وجمعة.. طبعا الرز ممنوع او شبه ممنوع .. ومرات يآكل يوم الجمعة عشان اللمة عند الوالدة ومايحب يكسفها (الله لايحرمنا منها قولوا آمين) بس يقلل ويكثر سلطة وفاكهه والرز طبعا بسمك
يستمر على ع هذا الوضع 3 شهور وينزل ال 20 كيلو.. مرات بالبداية ماينزل بس بعدين خلاص ينزل بشكل فضيع
ولا شاي اخضر ولا قرفة وزنجبيل ولااعشاب ولايحزنون.. حسرة علي اذا بغيت اسوي رجيم حطيت فلوسي بالعطار وهذا خطأ المفروض نآكل الاكل الصح ونمارس رياضة
آسفة طولت عليكم.. بس حبيت اشارك بتجربته
بنات بليز اللي عجبها الموضوع وكمان اللي ماعجبها الموضوع
تدعيلي الله يسر دراستي ويجعلها سهلة وخفيفة على قلبي ويحفظ لي زوجي وعيالي واهلي ويجمعنا ويلم شملنا .. ويسدد ديوننا.. اللهم آمين
واذا حبيتو تدعولي زيادة مافيه مشكلة
:42:
ولك بالمثل
اللهم ارزقني العفو والعافية
:26:
بندق ولوزة @bndk_oloz
عضوة فعالة
يلزم عليك تسجيل الدخول أولًا لكتابة تعليق.
رومآنس
•
ماشاءالله
الصفحة الأخيرة