زوجي الاول يبيني ارجع بعد طلاقي من زوجي الثاني !وعيالي نقطة ضعفي

السلام عليكم ورحمة الله وبركاته

انا وحده قدر الله لي اني اتطلق مرتين والحمدلله على كل حال

زواجي الاول كان عمري حوالي 18 سنه واستمر حوالي 10 سنوات والله رزقني ببنت وولدين الله يحفظهم

وطوال فترة زواجي كنت اعاني من المشاكل والسبب الرئيسي فيها كان ام زوجي واخته الله يسامحهم + عصبيته الزايده
لكن رغم هذا كنا نحب بعض هدت امورنا فتره لكن في السنتين الاخيره زادت المشاكل بشكل كبير

حاولت كثير احافظ على بيتي وعيالي وصبرت على امور كثير منها الضرب وسوء المعامله

لكن وصلت لمرحله انهارت فيها صحتي ونفسيتي استخرت وقررت اترك البيت والعيال وطلبت الطلاق كوسيلة ضغط عليه وتنبيه له لكن النتيجه انه طلق بكل سهوله وبعد شهر من الطلاق تزوج .. لكن قبل ماتنتهي عدتي بأيام راح للمحكمه وطلب يرجعني لكني رفضت رغم معاناتي وقتها لكن كرامتي كانت مجروحه وماكنت راح اقبل الرجوع مهما كانت الاسباب ومهما كنت اتعذب

مرت تقريبا 3 سنوات تقدم لي اكثر من واحد لكن كنت رافضه الزواج بشكل قاطع

وعيالي عاشوا عند ابوهم وزوجته وكانوا يقولون لي ان ابوهم لاجلس معهم وزوجته مو موجوده يذكرني بمواقف او يقولهم اني الى الان بقلبه
في مره بنتي قالت له ( شفت عند ماما صور لك واوراق انت كاتب لها كلام حلو عليه ) تقول بعدها سكت ووجهه تغير قالت له بابا وش فيك قال لها فيني هم وحزن .. انا ادري ان امكم للحين تحبني وانا احبها .. كنت افرح بالكلام هذا كنوع من رد الاعتبار لي

جات فتره وكنت خلاص ابغى اتخلص من مشاكل اهلي وضغوطهم علي ووافقت على واحد متقدم لي وكانت اكبر غلطه غلطتها بحياتي
واحد لاصلاه ولاصوم وافلام اباحيه ووساخه وانعدام غيره

غشني وخدعني في امور كثير والسبب الرئيسي لزواجه مني انه كان يبي يأدب ام عياله

ماقدرت اتحمل الوضع جلست معه شهرين وطلبت الطلاق وتركني معلقه اكثر من سنه

وبعد معاناه فالمحاكم الحمدلله تطلقت



هنا تبدأ مشكلتي الجديده


عيالي بلغوني ان ابوهم لما عرف اني تطلقت فرح كثير وقال لهم قولوا لامكم ترضى تتزوجني ؟؟

قالت له بنتي انا قد سألت امي وهي قالت انها لو بترجع لك تسكنها بشقه لحالها وانك ماتتدخل فيها ولاحتى تتكلم معها بس تجلس تربينا

وهو قال لهم انه موافق ,,


بلغوني عيالي بالكلام الي دار بينهم وبين ابوهم بس مارديت سكت قلت يمكن يكون كلام قاله بلحظه وخلاص

وسكتنا ع الموضوع شهر

في زيارتهم لي هالمره قالوا لي انه رد سألهم مره ثانيه وقال لهم : امكم وافقت .؟ قالت له بنتي ماادري بسألها

والحين انا محتاره كثير ماادري هو جاد ولا ؟

عيالي ساكنين مع ابوهم بمدينه ثانيه اشوفهم مرتين بالشهر

ودايم عندهم مشاكل مع زوجة ابوهم حتى الغداء يرجعون من المدرسه مايلقونه

مرات اقول عيالي صغار ومحتاجيني لازم اضحي عشانهم .. بس يمكن هو مو جاد بالموضوع

ومرات اقول اجل دام اني برجع وش فايدة كل الي صار عالاقل قبل كان زوجي لي لحالي وبيتي لي لحالي

الحين زوجي عنده زوجه ثانيه وعيال والبيت صار لها ؟ تعذبت اربع سنوات ع الفاضي !

ومرات اقول خلاص عيالي تعودوا على هالوضع

بس والله ان بالبرد احاتيهم وبالنوم احاتيهم من يغطيهم وباكلهم كلوا ولا ماكلوا

ويوميا اكلمهم واحاول اكون معهم كل وقت واحاول ماقصر معهم بشي واذا جو عندي احاول اسعدهم بكل الطرق \

محتاره كثير واحس نفسي تااااايهه

ماادري ابدي راحة نفسي ولا عيالي

مع اني مو مرتاحه لبعد عيالي عني وبنفس الوقت ماعاد لي طاقه ارجع له واتحمله واصبر عليه

ومرات اقول اكيد ربي بيعوضني خير انا الحين عمري 33

بنتي عمرها 13 سنه وهي الي تذاكر لنفسها ولاخوها بأول ابتدائي وولدي الوسطاني عمره 10 سنوات


من حقي ارتاح بعد كل التعب اللي شفته بزواجي الاول والثاني

وبنفس الوقت تفكيري بعيالي

انا كنت خلاص تعودت على وضعنا كذا لكن لما فتح موضوع رجعتي له بديت اتخيل حياتي مع عيالي اني راح اكون معهم واتابع دراستهم وامورهم كلها بديت اتخيل راحتهم معي واهتمامي فيهم واني ماخلي شي ناقصهم عشت بخياالي تفاصيل يومي معهم كيف راح يكون وهذا الي الي تعبني وخلاني ابتدي افكر بشكل جدي بالموافقه

طبعا انا راح اظل استخيررررر وادعي ربي يوفقني للي فيه الخير لي ولعيالي

حطوا نفسكم بمكاني وش راح تسوون ذبحني التفكير :44: