بنات عالم حواء ..
مواضيعكم دائماً رائعـــــــــــــة وأكثر من رائعــــــــــــــــــــــــة ..
بالنسبة لي أنا لي خمس سنوات ما حملت ،،
بس ما أكذب عليكم كان فيني شوي برود بالنسبة لهالموضوع يعني كنت اقول ماني مستعجلة وخاصة أن زوجي من النوع اللي ما يحب الإزعاح والحوسة .
بس هالوقت اتمنى اني احمل وانشاء الله يرزقني ربي بالذرية الصالحة قولوا آمين
وكنت حاطة في بالي فكرة لما أحمل عن طريقة إخبار زوجي بالموضوع , وهي أن اشتري أغراض بيبي وأحطها في علبة حلوه مع كرت صغير اكتب فيه كلمات رومانسية حلوه واهديها لزوجي وفي الأخير أكتب توقيع زوجتك الحامل .
أنشاء احمل واسويها واكتب لكم وش كان رد زوجي

اللهم لا تذرني فرداً وأنت خير الوارثين .. اللهم أرزق كل محرومه فرحة هذا اليوم .. آميييـــــن ...

والله ذكرتونا باليام الحلوة ... مب عارفه كيف أوصف موقفي .. بعد زواجي بعامين .. حملت والحمد لله .. وأختكم مثل المهوسه كل ما تتأخر علي الدورة يومين أجيب إختبار حمل وأحلل .. والنتيجه طبعاً :06: ( سلبيه ) ..
وكل مره أخبر فيها زوجي .. والمرة الأخيرة وأنا طالعه من الدوام مريت الصيدليه وأنا متحركصه .. أسوي التحليل وإلا لا .. والساعه 10 بالليل سويت التحليل وطلعت النتيجه سلبيه ومن الغصه رحت راميه التحليل في الزباله ..
ولما وصل زوجي شاف الإختبار في الزباله وراح مطلعه وشايف النتيجه .. وجه وسألني إنت مسويه تحليل حمل قلت : لا إتذكرني خلاص هذي آخر مرة .. وطبعاً إبتسامته شاقه الويه .. وقال : لأنج حامل !!
ما عطيت كلامه أي أهميه ( على بالي يطنز ) وراح جاب الإختبار في إيده وأنا ما كنت مصدقه لحد ما رحت العيادة وإتأكدت من الدكتورة ..

ما تتصورون فرحت :arb: وألحين صار لنا 4 سنوات ننتظر مثل هذي النتيجه ..
سامحوني طولت عليكم ..