مساء الخير على خواتي الحوائيات
موضوعي طويل مره ما ادري من وين ابدا
تزوجت تقريبا من 3 سنوات ورزقني الله بطفلين
ولله الحمد
زوجي يحبني زياده عن اللزوم يعني غيور وشكاك
لدرجه ان الثقه معدومه كل مره اصبر واسكت عشان عيالي
ومازلت صابره ولله الحمد والشكر لعل الله يبدل حاله ويتغير
بس كل ماله يرجع للأسوء
لدرجه انه يشك في اخوي ويقول انك .......... ما اقدر اكتب هالكلمه
حسبي الله عليه من رجال وانا الحمد لله متربيه احسن تربيه ولاعمره شاف علي شي
ولايقدر يمسك شي لاني اخاف الله قبل كل شي
بس معروف اللي له سوابق يحسب كل البنات مثل اللي يعرفهم سابقا
من تزوجت ماله علاقات ابد ماعمري شفت عليه شي والله الشاهد
والله يابنات ان سلامي لاخواني سلام عادي مافيه شي مثل الناس
هو الله لايبلانا اذا سافرت اخته ورجعت من السفر شفت سلامهم
ماسكته بقوتها وضامته لصدرها بصراحه انصدم من هالحركات وكلمته كذا مره
يقول اختي مشتاقه لي يعني ادفها لين جت تسلم علي
وفوق هذا لاشغله ولا عمله لدرجه ان بطاقتي الصراف معه
ومحرومه من الروحات والجيات عشانه يغار علي على قولته وهو يكذب عشان يشك
فيني ولايثق فيني ابدا يخليني اروح مع اهله وامه واخته بس اهلي لاااااا
حتى روحتي لاهلي يجلس معي لين نرجع ساعات ودي استشير امي وابوي في مواضيع
ودي اسولف مع اخواني تعرفون البيوت اسرار هو لا لازم يعرف كل صغيره وكبيره
واذا جيت اكلمهم يجلس معي لين تخلص المكالمه وجالس بالبيت 24 ساعه
واذا قلت له ودني لاخوي والا لخالتي اطفش من مقابلته جالس عند التلفزيون يدخن
ويتفرج على العربيه والاخبار قال البسي عبايتك وجلس يدور بالشوارع
واخته تقول اخوي كل يوم يطلع حرمته ويوسع صدرها ويداريها ويحبها
مره طاح بوكي بسياره اخوي وجلست ادوره مالقيته وجلس يهزأ فيني ويقول كلام يسم البدن
كله عشان بوك يقول انا خايف على بطاقه الاحوال والا الباقي ماهمني وبالاخير كلمت اخوي وقلت له يمكن طايح بسيارتك دوره وكلمني قال لقيته صار عقب ولدي مرمي اغراضي بالسياره يقول لي وش كنتي تسوين مع اخوك عشان يطيح البوك لاحول ولا قوة الا بالله
وقبل فتره جاب لي خاتم قال هذا لك قلت لا اسأل اختك او بناتها يوم سألها قالت ايه خاتمي
ودي اني سألته بس ماتجرأت لأني ماتربيت على هالكلام الرديء ودي قايله له وش انت مسوي مع اختك عشان يطيح خاتمها بالسياره
وفوق هذا كله طايح بحركات انه يدخل على صديقه بنت اخته يسوي نفسه مايدري وانا احلف بالله انه داري لانه يسمع الجرس يرن وتروح بنت اخته تفتح الباب لصديقتها وتدخل للمجلس وهو يوقف عند الباب ويطالع فيها هذي السالفه ماكنت ادري عنها بس علموني فيها بنات اخته لانهم يتضايقون من خالهم واخته ماشاء الله عليها اتوقع عاجبها الوضع قالو لها بناتها ترا خالي قليل ادب قالت وش اسوي به لاتعلمونه ان صديقاتكم فيه ولا لاعاد تنادونهم بالبيت بالله هذا رد تقوله كان المفروض تمسكه وتهزأه بس الحمد لله البنت تقول حرمته كانها بنته وحلوه وصغيره وهو كبير عليها وفوق هذا جالس يناظرني انا توني صغيره ولايفكر فيني ويوم الخميس اللي فات كانت عندهم بالبيت ونزلت انا عندهم شوي بس مادخلت على البنات تخيلو وش قال لي
سألني عنها بالاسم فلانه الفلاني جايه انا تعالو شوفو طار عقلي قلت وش دخلك تسأل عن صديقاتهم وش معني هذي بالذات قد شفتها اجل وهي عاجبتك يعني قال انتي صاحيه والا مهبوله شايفتني بزر مراهق اروح اطل على بنات الناس ودي اني قايله له عندي خر بس اخاف على بنات اخته لانهم مره حبوبين معي اخاف ينزل ويسوي لهم شي
يابنات اخته هذي كأنها زوجته لاتفهمون غلط بس اقصد يعني اذا قالت نبي نروح للمكان الفلاني قال ابشري
وانا ماعمري طلبته وقال لي ابشري ولا ان شاء الله واذا قالت وش رايك تشترون كذا قال ذوقك حلو ورايك حلو مره جالس تتناقش هي وبناتها قالو بناتها احيانا ذوقك مايعجبنا بالملابس يمه لاتزعلين بس لولا اختلاف الاذواق لبارت السلع عصبت امهم وجلست تهزأ فيهم تخيلو وش قال زوجي المصون لاخته
يكفي انتي ماليه عيني واشوفك قمر وذوقك حلو وكلك على بعضك حلوه ياختي لايهمونك هالمبزره
يتغزل باخته بصريح العباره لا ويناديني دائما باسمها نادرا مايناديني باسمي عصبت عليه قلت لي اسم لي اسم ياولد الناس كم لي عندك من سنه الى الان ماحفظت اسمي المفروض ماتنساه لان اسمي وامك مثل بعض واللي بعد حارق قلبي يبي يسمي بنتي عليها متخيلين معي شلون حبه لاخته حسبي الله عليه رحت وقلت لاخته انا اعزك واقدرك بس ما ابي اسمي بنتي باسمك لاننا كلنا في بيت واحد وكلكم نفس العائله انتي وبنت اخوك قالت عادي قلت لها طيب انا امها وودي اسميها اسم حلو مثل بنات اخواني اساميهم بنات هالجيل قالت لا والله اسمي حلو انتي ليش تحبين تعاندين اخوي قلت ماعاندته بس مابي اسمي بنتي بهالاسم بنتي وانا اللي اسميها قالت ماعلي منكم شفتو كيف نذالتها وهي لو تطلبه عيونه قال فدوة لك بس شكلها هي اللي قالبه راس اخوها ومخليته يسميها عليها قلت خلاص سموها باسم وانا باسميها باسم ثاني
قالت بيمشي اسمي غصب عنك لانها تنزل عندنا دايم ومحد مناديها بهالاسم الا انتي قهرتني فورت دمي يعني بيسمي الاسم على اخته قلت له حبها قدرها احترمها مو تنادي حرمتك باسمها ومفضلها علي مليون الف مره وبتسمي بعد بنتي عليها
بنات انا محتاره وضايعه وتايهه احس اني بدوامه
تكفون انصحوني وشلون اتعامل مع هالرجال المريض لان الشك مرض نفسي
لاتجي وحده وتتفلسف وتقول احمدي ربك انا اقول الحمد لله على كل حال
وشلون اعلمه اني دريت عن سوالفه ونظراته لصديقة بنت اخته
حالتي صعبه بالحيل يحب يدخل اخته بكل مواضيعنا شفتي وش سوينا
مره شريت مفرش لغرفتي راح يوريها اياه وطلعته من كيسته حلو مره من وين شريتوه
قلت له اذا تبي تشتري مثله خلها تاخذه ماصدق اني قلت له كذا راح يركض مع الدرج ينزله لها تبين ترا زوجتي تقول يفداها قالت لا والله مابيه
امس كنت بالحمام وانتو بكرامه ووولدي نايم بغرفتي على سريره
رقت هي قالت وين الحلو قال نايم بالغرفه قالت ودي اقومه قال روحي وملابسي الداخليه وروبي على السرير شلون افهمه ان غرفه النوم محد يدخلها
يقول عادي وحتى غرفتي ماعليها مفتاح تقول مره رقيت عليكم وناديتكم مالكم صوت طليت لقيتكم نايمين
فيه اوقح من كذا وهالدلخ اللي عندي يقول هي حرمه مثل قلت امي وهي امي اغلى ماعندي ماعمرها تجرأت تدخل علي وانا نايمه شلون هالتصرفات مع اهلك يمكن لاني طيبه بزياده عن اللزوم صارو يتدخلون بكل شي مايردهم الا غرفتي لا واللي يزيد الطين بله خالتي تسألني كلتي حبوب منع الحمل قلت ايه باكلها خمس سنين ورجاء خاص لاحد يفتح معي هالموضوع
لان عيالي جبتهم ورا بعض ماشاء الله وبنتي تعبانه الله يشفيها قولو امين
اسفه كلامي كثير ومو مرتب فرصتي كتبت الموضوع لانه مو موجود بالبيت
ما اقدر اقول لاهلي عن هالكلام مابي اضيق صدورهم
شايله كل هالهم بقلبي
شكواي لربي حبيبي
وحبيت افضفض لكم ياخواتي
اللي عندها نصيحه الله يجزاها خير
واللي تبي تقول كلام ماله سنع تحتفظ بكلامها لنفسها لان اللي فيني مكفيني
السموحه طولت الكلام عليكم
نواااااارهـ @noaaaaaarh_1
عضوة نشيطة
يلزم عليك تسجيل الدخول أولًا لكتابة تعليق.
@لسعة شقاوه@
•
الله يكون في هونك ويهديه
دووووودو
•
حبيبتي حاولي تكسبي زوجك وتقربيلو اكتر لانو يمكن مصاب بالوسواس وبالنسبه لاختو الله يعينك حاولي تنقلي من الشقه
ماتجي ذي يحبك زيادة عن اللزوم وثقتة منعدمة فيك انتي تلعبين على نفسك
اللللي يحب يثق في حبيبة
اللللي يحب يثق في حبيبة
الصفحة الأخيرة