زوجي المجنون خطب لاخوه عند امي

السلام عليكم يا بنات مبارك عليكم الشهر
العلم سلامتكم امي متسحره عندي ليلة شهر رمضان و كنت اطبخ السحور وكان زوجي قاعد معها وخطب منها اختي الصغيره حق اخوه المشكلة اختي عمرها ١٩ سنه واخوها داخل ١٧ رايح من اول ثانوي إلى ثاني وقايل ل أمي ان اخوي تربيتي وانا ربيته بعد ابوي وامي الله يرحمهم ويشتغل معي في الحلال وعنده حلال خاص فيه غنم وابل لها لحاله وبيسكن فوقي واني ابي قربكم و ما شفت مثل بنتكم وتربيتكم هي الي ملزمتني فيكم إذا بتوافقين انتي والبنت بنجي نخطب رسمي بعد كورونا امي اهي الي قالت لي وش رأيك في حماك الله حق انه محترم و مؤدب وعيونه في الأرض إذا مريت يمه ولا يفوت الصلاة وعقله زاكي وصحيح له حلال مع زوجي و اسمع دايم من زوجي يمدحه ويقول هذا ولدي تربيتي المشكلة رحت حق زوجي وقلت له ليش ما قلتي انا افاتح اختي في الموضوع ورد لك خبر قالي موب شغلك وانتي إذا رحتي بتخربين الدعوه وتقولين معيه قلت انت عارف كم عمر اخوك اخوك توه بزر ما بعد حتى يدخل مرحلة المراهقه واختي اكبر منه قال انا ابي احفظه من الحرام ودام عنده حلال وخير يتزوج لا يقعد والصراحة انا ابي اختك لأخوي قلت له طيب قلي عطني خبر موب تخليني مثل الأطرش في الزفه آخر من يعلم قال انا والله اعرفك بتنشبين لي على سالفة العمر وانا ابي الخير لأخوي ولاختك ولا فيه فرق كبير بينهم اكبر منه بسنتين يعني بيشيبون سوا وإذا كأنك بتساعدين باقناع امك واختك بيض الله وجهك المشكله يا بنات انا متوهقه أخاف ارد على امي بمواصفات حماي و يوافقون ويتم الزواج وإذا صارت مشكله انا الي باكلها ويقولون لعبت علينا والحين انا محتارة يا اني انطق الحق والصدق يا اني اكذب عليهم المشكلة حماي ناقع ٢٤ ساعة مع اخوه حتى ما له أصدقا واخويا يروح لهم يعني انا تقريباً احتكاكي معه اكثر انا في حيرة يا بنات شورو علي المجنون هذا اخلفني من صيامي واتعبني معه