زوجي اناني ، كيف أتعامل معه

السلام عليكم
خواتي بعرض لكم مشكلتي
انا متزوجه لي سنه وشهرين بس. ورزقت بطفل ، ومع حملي طلع زوجي على حقيقته اذا زعل ولا قلب علي مزاجه قال انا مو مرتاح معك ، انتي تحبيني وانا مااحبك ابد ولا تطلبين مني حب او رومنسيه حتى بوقت العلاقه انا ما أقدر اعطيك رومنسيه او اعبر لك عن حب اعذرينني مااقدر
مع انه ايام الملكه يقول احبك ومن هالكلام الحلو فجأه تغير علي وبقوه.
ممكن شبع واكتفى مني ومل. كذا افكر
واخر شي اكتشفت انه طايح ببرامج المحادثاات والتواصل يغازل بنات كثير مو وحده ولا ثنتين. واذا سألوه ليه تغازل وانت متزوج وتخونها. قال انا مو مرتاح معها مع انها ماتقصر معي ابد وهي تحبني. ويعطيهم انواع الكلام الحب والاهتمام ،وانا ولا شي خ
بس يزعل علي قال انا بتزوج. اذا حبيتي تبقين ابقي. لكني متزوج متزوج الشرع حلل اربع
ومره فتحت ايميله ولقيت مرسل لكل بنت عنده انه بيتزوج ويبيها توافق وكاتب لهم عن نفسه يعني سيره ذاتيه كامله وانه متزوج مسبقا واللي بتتزوجه راح يسكن معها بالمنطقه اللي متوظف فيها. مع اني ياما ترجيته اسكن معه بنفس المنطقه اللي متوظف خايفه عليه من طول المسافه ، واخرتها يبي يتزوج بنت من النت وياخذها معه ويتركني بشقتي انا وولدي. وهو قال لي مره انا بتزوج وباخذها معي وبخليك عيشي بشقتك معززه مكرمه وعيشي حياتك و عيشي جوك على انك تحبيني (اناني ). تخيلوا وقتها ماكملت سنه ولا فرحت اني عروسه او اني حامل ،وهو ينفس ويتقلب مزاجه علي ويقول بتزوج. خاصة اذا تكلمت معه وبصراحه. ويزيد علي اذا قلت طلعني نغير جو مع بعض لو قريب من عندنا أبي اتقرب منه واحببه فيني وأونسه مايعطيني فرصه أبد . على طول يعصب ويقول لاتقولين طلعني انا لو ابي من كيفي اطلعك بس انتي لا تقولين ابد.ولو خليته من كيفه عمري ماراح يطلعني لان الطلعات والتمشيات له ولأصحابه يتونس ومايبيني اتونس ، ومره طلبته يطلعني للدمام لانها قريبه منا ابي الواجهه وابي البحر. فقلت له وسوى لي سالفه وكالعاده قلب علي. اخرتها يسولف مع بنت من البنات ويعلمها وهي اصلها تحب واحد ثاني بس هي تكلمه حسبي الله ونعم الوكيل فيهم. وقالت له طلعها عشاني مع ولدها. وفعلا طلعني وانا كنت جدا مبسووطه ولا كنت ادري ان هي اللي اقنعته. وبعد مارجعنا لقيت ايميل هالبنت بالصدفه وكلمتها وعرفتني وقالت لي انها اللي اقنعته يطلعني ويمشيني ذاك الاسبوع وانها بالزور اقنعته انه يطلعني. وانا ماقلت لها ابد اني ابيه يطلعني وهو رافض. وانا كنت ع نياتي ع بالي مطلعني من نفسه ومستانسه. اخر شي اكتشف ان اللي يكلمها وتحب غيره هي اللي اقنعته يطلعني ووافق عشانها مو عشاني. يقول ماارتاح لك ولا احبك وكل شي ينكره بعد ماعلقني فيه ايام الملكه بحبه بس مجرد مااطلبه طلعه ولا مشوار. ولا اذا احتجت منه فلوس.

بنااااات حوا انا التجأت لربي وصرت ادعيه يصبرني واحس اني ماصرت احبه وهو يحسبني اموت عليه مثل قبل. ماصرت احبه خاصة لما اكتشفت عن الايميل اللي ارسله للبنات اللي تتزوجه وتقبل فيه وهو متزوج. ماصرت احبه لانه طلعني عشان خاطر وحده راعية مكالمات تكلمه وتكلم غيره. لا وفوق ذالك يقوول لها اذا وافقتي والله اجي اخطبك واتزوجك. شوووفوا كيف. !!!!! شي يقهههر.
واجهته وقلت ليه تغازل صار ينكر بعدها قال لاني مااحبك ولاارتاح معك اغازل واي واحد مو مرتاح بيسوي مثلي.

انا مقهوووره منه. الحين له اسبوعين طلع دوره تدريبيه ومايدري اني شفت ايميله واللي ارسل الرساله اللي يخطب فيها اللي عنده. بس شااك.
لما يكلمني مااكون بحماس وشووق له مثل قبل ولا اهتم فيه. ويستغرب. واقول له عادي تعودت على غيبتك. واللي مايهتم ولا يفكر فيني مااهتم له. ويرد يقول مايخلونا نكلم بالجوال ممنوع بس بالزور اكلمك عن طريق واحد.
مايدري اني مجرووحه ومقهوره منه ومن حركته البايخه.
بنااات كيف اذا رجع من الدوره ماني متحمسه لرجعته. كيف بستقبله بدون شوق ولاحب. مابي اقول له شفت الايميل. عشان مايقول عادي الوضع عندها ويتمادى ويشوفني مجروحه وساكته. علمت اهله القريبين منه وبعدها ماكلمتهم وحبيت اثبت لهم صدق كلامي وارسلت لهم الايميل الي في بريده لهم. اتوقع خجلوا ولاعاد كلمتهم بالموضوع. هم عايله محافظه. ولا يحبون ان اي من عيالهم يتزوج وحده تكلمه ومتعرف عليها.
طولت عليكم لكن ابي نصيحتكم. كيف راح اقابله لما يجي.
لاتقولين اهلك ابوي متوفي واخواني متزوجين وهم من امي. وكل واحد لاهي بحياته ولا راح يساعدوني. لاني اعرفهم.
ادعوا لي ان ربي يفرج علي همي. كنت ابي انبسط لما تزوجت انجرحت من اولها.
ارشدوني كيف اتعااامل معه الاناني ؟؟؟