زوجي تعبني وقررت اتغير |دعوة للنقاش

السلام عليكم

كيفكم يا بنات حواء

اليوم انا جيتكم بموضوع جديد يختلف عن مواضيعي اللي كنت اكتبها قبل
قبل كنت اجي واشتكي من زوجي وانانيته واهماله و اسلوبه المستفز
لكن اليوم انا جايبه قهوتي وصحن حلى وابغى نجلس جلسة نقاش حلوة :pinklove:
احس انكم يوم شفتوا يوزري قلتوا وش عندها مصيبة هالمره بعد :hahaha:
الحممدلله على كل حال
المهم

اليوم جيت اقولكم اني اكتشفت ان سبب مشاكلي مع زوجي هو في الحقيقة .. أنا !

ايه انا السبب لا تستغربون

قريت قبل فترة مقولة معناها ان تعامل الناس معنا هو مجرد رد فعل لاسلوبنا معهم , يعني الشطارة هي انك تعرفين الافعال اللي اذا سويتيها رح تتلقين رد الفعل اللي انتي تبغينه
وهنا كانت نقطة التحول في معاملتي مع زوجي


قررت اتغير معه بشكل جذري وابدا استراتيجية جديدة في التعامل معه
واللي يتذكرون آخر مشكلة طرحتها لكم كنت افكر جديا في الانفصال
فقلت بما انها ما عاد صارت تفرق معي اذا رح اكمل معه ولا انفصل ما رح اخسر شي لو تغيرت

صرت اعامله بالشكل اللي هو يستحقه مو بالشكل اللي انا اتمنى يعاملني فيه
لاني اكتشفت اني كلما اعطيته حب وحنان ورومانسية كل ما حس انه خلاص قدر يسيطر علي وما يحتاج يبذل معي اي مجهود او يجذبني له اكثر !

قريت في الشخصيات وفي البوصلة الشخصية واكتشفت اني كنت اتعامل معه بطريقة كنت اظن انها صح وانها مثالية ما كنت ادري اني كنت قاعده انفره مني اكثر واكثر !

تذكرت كلام امي الله يطول عمرها كانت تقول ترى 99 بالمية من الرجال ما يحبون الا الزوجة اللي تتمنع واللي ما تكون ملهوفة عليهم
وكنت اقول بخاطري لا هالكلام غلط وهو سبب الجفاف العاطفي ما كنت ادري ان فيه شي مثل الجفاف العاطفي اسمه الغرق العاطفي وهو قاتل بعد للحياة الزوجية :a_smil08:


فيه كلام للكاتبة أحلام مستغانمي تقول فيه :

" لا حب يتغذى من الحرمان وحده ,بل بتناوب الوصل والبعاد , كما في التنفس .
إنها حركة شهيق وزفير , يحتاج إليهما الحب لتفرغ وتمتلئ مجددا رئتاه . كلوح رخامي يحمله عمودان إن قربتهما كثيرا اختل التوازن , وإن باعدتهما كثيرا هوى اللوح ... إنه فن المسافة ! "


يعني لا تقربين منه مرره ولا تبعدين مرره .. افهمي كيف تلعبين بالمسافة وكيف تعلقينه فيك
تعطينه يوم ويوم تحرمينه .. يوم تقربين ويوم تبعدين

انا لما قريت اكثر عن التعامل مع شخصية زوجي عرفت ان الحب مو انك تعبرين عن مشاعرك بكلام وتصرفات بسس لا .. الحب هو انك تعبرين عنها ب " فن "

قريت كتاب الرجال من المريخ والنساء من الزهرة و لقيت انه يقول احيانا لما الزوجة تعطي زوجها وتغدق عليه بالمشاعر الزوج عقله الباطن يفكر انه مسوي واجبه واكثر معك عشان كذا انتي قاعده تعطينه هالحب كله حتى لو انه مقصر !
فيقولون لو كان زوجك اناني او جاف انتي بعدي عنه و اسحبي عليه بالعربي عشان تعطينه فرصة هو يعيطك

الرجال ما يحب الانسانة اللي يكون هو محور اهتمامها الوحيد وكل حياتها تدور حوله وكيف ترضيه

المهم ...

قررت اني بتغير من نواحي كثيييرة اولها اني ما رح اخليه محور اهتمامي الوحيد
انا موظفة و عندي هوايات وصديقات وللاسف بعد الزواج سحبت على كل شييي وصار تفكيري الوحيد فيه اذا قفل علي اقعد شايله همه واذا تضايق من شي ما انام الليل واذا ضايقني بكلمة ما اداوم من الهم !!!
لدرجة انه زاد علي الربو وبدا معي القولون بعد الزواج من الهم :(

صرت اهتم فيه بالشكل المطلوب مني شرعا ما اقصر عليه في حقوقه لكن الاشياء والمثاليات اللي كنت اسويها كلها تركتها

رجعت اهتم بصديقاتي واجتمع معهم واروح مع عماتي وخالاتي للاستراحات والجمعات وانا اول ما كنت اروح اقول بجلس الويكند معه حتى لو كان يطلع ويسحب علي :44:

رجعت اهتم بوظيفتي ورجع ادائي يتحسن وتقييمي يرتفع

رجعت اهتم بهواياتي وادخل النت واشارك فالمنتديات مثل ما كنت قبل الزواج

صرت ما عاد اتعب نفسي في التفكير فيه .. منفس ؟ على نفسه < لا تقولون لي ليش ما تسألينه وش فيك لاني مثل ما قلت في موضوعي الاول هو يخبي علي ولا يعلمني

ضايقني بكلمة ارد عليه باسلوب حلو في وقتها واقوله وش تقصد او ترى كلامك هذا واسلوبك يزعلني وما اخليها بقلببي

متضايق وسألته وش فيك وما علمني ؟ كيفه هو الخسران هو اللي بيتعبه الهم وهو ما فضفض :biggrin:

صرت ما عاد اعلمه بكل تفاصيل يومي وكل شي يصير معي ولاحظت انه صار عنده فضضضول يعرف وصار يسأل وكذا وصار اذا سأل ما اقول له كل شيي بالتفاصيل لان احيانا الكتاب المفتوح ما يخلي الشخص يتحمس يقراه مثل الكتاب المغلق والغامض (وشرايكم في الحكم اليوم ) :cool:

اذا سافر لاهله وطول ما دق علي ما اسأل عنه واذا دق بعد يومين وهو ساحب ما اعاتبه ابدددا
آخر مره قال لي ليش ما دقيتي يوم ما دقيت انا ؟ قلت وانت ليش ما تدق طيب ؟ قال انشغلت قلت بكل بساااطة اجل اشوا اني ما دقيت اشغلك وانت مشغول :35:
طبعا هو استغرررررب
وللحين وانا اشوف نظرات الاستغراب في عيونه من التغير المفاجئ اللي صار لي :huh:

المهم اني شريت راحة بالي وتحسنت نفسيتي كثيير لما صار هو مو اول شي في قائمة اهتماماتي

وشرايكم في هالاسلوب ؟
تتوقعون ناجح ولا كلها كم شهر واكتب لكم موضوع اني سبب طلاقي :laugh2:

يلا المايك لكم تناقشوا :icon29: