زوجي تهاوش مع اخته وانا تضايقت شوروا علي

السلام عليكم
بدخل بالموضوع على طول لاني مره متضايقه من امس
السالفه امس على صلاه المغرب كنت بغرفتي وزوجي توه جاي من الدوام ونايم و على اذان المغرب سمعت صوت ولدي يصيح صياح مو طبيعي يشاهق انا كنت منغثه لاني حامل وتعبانه ولو انه صياح عادي كان مانزلت او لو انه سكت بس هو مستمر قلت بنزل اسمي عليه هو عمره 3 سنوات نزلت الا القى خالتي ام زوجي وبنتها جالسات بالصاله ويتحلطمون يقولون هذا بس يصيح وملقوف مافيهم اللي قامت تسمي على الولد او تسكته مو زين الصياح مع المغرب ابد ولا همهم ماكانه ولدهم
واللي قطع قلبي اكثر يوم شفته حاط يده على راسه ويشاهق طالع قلبه سالته شفيك قال عمتي ضربتني مع راسي روحي ياماما اضربيها وسالت الشغاله قالت هو جلس على مكتب جده وفتح اللابتوب حتى ماشغله بس فتحه وتجي هي عمته وتهاوشه وتضربه مع راسه مع انها ماتمد يدها على عيال اختها ابدا ابدا وهم جنوووووون واصلا ياويل اللي يكشر بوجيهم لكن ولدي بس تضربه من حتى وهو صغير بالمشايه تصفقه وانا ساكته لها
وسكت لها الحين مع اني كنت بنفجر عشان ولدي بس مسكت نفسي وقلت اخوها يكلمها احسن ولمى قام اخوها سالني وش فيه قلتله السالفه قالي طيب بنزل اقولها ماعاد تمد يدها حرام صغير وكذا المهم قبل مايكلمها اخوها انا وقفت على الدرج انادي الشغاله وسمعتها تتطنز علي وتقلد صوتي هي نفسها اللي ضربت ولدي وسكت
ولمى نزل اخوها وكلمها انا كنت فوق ومانزلت بس اسمعهم هو قالها ليه كذا حرام على الاقل مو حزه المغرب والا كان سكتيه وهي تنهبل وتصرخ وترفع صوتتها وترادد وشوي تقول والله مالمسته وشوي تقول عادي حتى انت مدري وش اخذت منه وصاح وش فيها لضربته وخالتي ماسكتتها وخلتها تتاسف لخوها لا بالعكس قامت تهاوش معاه تهاوش زوجي عاد زوجي طلع راح برا عند صديقه
واسمع خالتي تقولها فلانه قايلتله والبنت تقول بأعلى صوتها تاكل تراب هي وياه وتجلسس تضحك وتلعب ولد اختها
وجا ابوها راحت عنده للمجلس وجلست تصيح وماتت من الصياح وتقوله ان الولد ملقوف وانا ماسويت له شي واخوي الكبير رفع صوته علي ومدري ايش
تبيه يهاوش اخوها وبس
عاد خالي كلم زوجي ان ليه كذا على اختك هي متزوجه توها وحامل ورحلتها اليوم الصبح وخالي قاله ماودي انها تروح وهي متضايقه وبس
مع انه هي الغلطانه ماده يدها وتسب وتتطنز وترفع صوتها على اللي اكبر منها وترادد وعقبها تضحك وعادي المفروض هي تجي قبل تسافر تحب راسه وتعتذر منه وتقوله موقصدي وكذا وبسسس
عاد انا متضايقه ماودي هالشي صار بس والله هي اللي كبرتها بالصراخ