زوجي جاب عسل من الجنوب ( عسل يمني اصلي ) شوفوا وشسوى ببشرة بنتي الصغيرة ماشاءالله ..

السلام عليكم ورحمة الله وبركاته

زوجي لما رجع من السفر قبل فترة جاب معه عسل يمني اصلي
من الجنوب من منطقة جازان واجبرني بالقوة استخدمه لعيالي
مع انه مفيد بس الكسل الي فيني هو الي خلى زوجي يحلف علي
اني استخدمه لهم المهم اني استخدمته لهم ولاحظت بعد اسبوعين
في البداية انه فتح شهيتهم للاكل طبعا بعضهم معصقلين وماشاءالله
سمنوا شوي معه طلعت لهم زغيديدات يعني خدود ( ينفع للي يبون
يتفخون خدودهم ) والله من جد بين في الوجه اكثر من الجسم
والحين لهم اكثر من شهر .. ولدي الصغير بطل ما عاد صار ياخذه انغث منه
وبالطقاق اعطيه اياه كل يومين او ثلاث اما بنتي الصغيرة اعطيها برضاعتها
وبسم الله عليها ربربت شوي معه مو مرررة بس طلع وزنها ممتاز لاسمينة ولانحيفة
واما بنتي الوسطى الي هي اكثر وحدة فيهم نحافة وعصقلة والي كانت عظامها مبينة
من شدة نحافتها ماشاءالله الان ربربت وطلع لها لحم بس مازالت نحيفة تهئ لكن افضل من اول
يعني صار اللبس والملابس تراكبها مو مثل اول .. وهي بصراحة من سنتين كانت تعاني من
حبوووووب بوجهها مخرب شكلها وبالاخص عند منطقة الانف والفم ونص الخدود وكانت بشرتها
جااااااااااافة جداااااا وقبل فترة استخدمت لها حبوب حمض الفوليك وتعدلت بشرتها وصفت ثم رجعت
من جديد تخرب وحتى الحبوب ماعاد تنفع معها وتركتها وماعاد تستخدمها لاني خفت عليها
من هالمكملات الي بدون استشارة ..المهم بشرتها انعدمت من فترة طويلة ومع استخدام العسل
والله ثم والله ثم والله انه بشرتها بدأت تصفى والحبوب نشفت وتقشرت وباقي منها كم حبة
وحتى بشرتها بدأت تنعم وتصفى وتفتح لونها والخدود ربربت ماشاءالله تبارك الله وعرفت انه
من العسل لانها ماتستخدم غيره .. والحمدلله العسل مذكور بالقرآن والسنة وفوائده كثيرة
وجمة وناوية باذن الله اخلط مع حبة سوداء عشان اضرب عصفورين بحجر ومنها يستفيد منهم
الجسم والعسل والحبة السوداء شفاااااااااااء من كل داااااااااء ..
ححبيت افيدكم بتجربتنا وان شاءالله تستفيدون ..
ادعوا لي بالشفاء العاجل وللمسلمين وادعوا ان ربي يسخر لي زوجي وعيالي
واهلي والناس اجمعين ,, واسفة جدا ع الاطالة ..