الله يقويك ويكتب اجرك ويسهل لك امورك والله يعاوضك ان شالله بالراحه في الجنه فرزني ياقلبي فرزني حق اسبوع والحلا حطي نوعين وتكون في بايركس كبير تكفي ليومين وثلاث ايام والسمبوسه فرزنيها في اليل حقت 3او 4ايام في الفريزن وقسميها في اربع علب كل يوم حمري علبه فيها 30 حبه سمبوسه واصابع الجبن فرزنيها من الليل بعد وقسميها في اربع علب كل يوم طلعي علبه واذا بتحطين بشمل سوي كشنة الدجاج وكثري الكشنه والدجاج عشان الباقي تستفيدين منه يوم ثاني واحفظيها من الليل في الثلاجه ومن بكره تسلقين بس المكرونه وتحطين الخلطه وعلى الفرن والشوربه سوي في قدر كبير وحطيها في الثلاجه ل3ايام ولاتحطين بهارات عليها الا اذا دفيتيها من بكره حطي بهارت عشان تكون كانها طازجه وان شالله البنات يفيدونك والسحور خليهم يجيبون من برى واطلعي كملي اللي ناقصك واحتسبي الاجر في كل شي تسوين حتى اقل شي

كتبتلك رد طويل وطار المهم بقلك كلمتين اذا ماحطيتي لنفسك قدر واحترام ماحد بيحطو لك لا تفكري إلا بمصلحتك

مشكورين على ردودكم جزاكم الله خير
امس صلحت لهم شوربه وسمبوسه وعصير ومهلبيه بس وماعجب زوجي قال وين الباقي قلتله هذا اللي عندي ما راح اسوي غيره اخذ الاكل ونزل عند امه
وبعد المغرب. صلحت صواني حلى صغار وكنت رايحه بيت اهلي الساعه 11 شافتني عمتي قالت ليش ماوديتهم من بعد المغرب عشان يمديهم يرجعون قال زوجي ماعليك مابنتأخر بعد ماوصلت قلتله لاتجي الا اذا اتصلت عليك جلست عندهم للساعه 1 وعمتي تتصل كل شوي تسأل متى ارجع وعشان امي نامت واختي تعبانه رجعت بيتي لقيت زوجي مطلع لي الدجاج عشان اصلح سحور صلحته عشانه وعشان عيالي كبسه مع سلطة زبادي بس والساعه 3 ونص عمتي احرقت جوال زوجي متى يجهز السحور وزوج سلفتي يسأل صلحنا والا لا المهم خلصت وجهزته لهم ونزل زوجي واولادي تسحروا معاهم
لاكن زوجي ماقال شي


والبنات اللي يقولون اجيب شغاله حاولت قالت كل شغله لها قيمه خاصه وتتشرط واصلا الفلوس مو ذاك الزود
وعمتي هي اخت ابووي وهو وصاني ما افرط فيها صعب اخلف وصيته بعد وفاته


وهي عايشه لوحدها ولدها توه جاي من سفر وزوجها متوفي من قبل ما امي تولدني يمكن من 30 سنه


وبالنسبه لسلفتي هي تطبخ بس ماياكلون من طبخها لانه مايعجبهم حسب كلامهم حتى عيالي مايعجبهم اكلها يقولون ماتعرف تطبخ وانا بصراحه ماذقت اكلها عشان احكم عليها
واهلي دخلتهم في الموضوع شكيت لهم وعمتي راحت عندهم زياره وامي كلمتها قالت عمتي ادري والله انا تعبناها معانا لاكن وش اسوي اولادي مايبغون طبخ دلال اللي هي سلفتي وتقول هي قالتلهم انا بطبخ لكم قالولها لا تكفين طبخك مايصلح عمتي ماتعرف تطبخ كثير يادوب عصيده وخبزه وقهوه
وبنات عمتي الحمدلله والشكر متطمنين اني اسوي السحور كل يوم


وانا والله العظيم ماهمني الا عمتي ماودي ازعلها مع انها قشره معي بس عشان وصية ابوي ما اقدر اخالف


وعيال عمتي الثانيه واحد موظف ماقدر يسافر مع امه والثاني توه جاء
وانا اول رمضان اطبخ لهم الرمضانات اللي فاتت كنت اعطيهم من اكلنا احيانا مو دايم
والحين من اول يوم في رمضان وانا افطر واتسحر لحالي شكيت على زوجي من هذا الحال قال عادي انزلي افطري معانا يتريق على كلامي
وزوجي الحمدلله من قبل وهو طيب معاي ويحترمني بس كانت مشاكلنا كثيره الحين قلة عصبيته ومايتنرفز مني ابدا مهما سويت
مع اني اهملت بيتي مكركب احاول ان عيالي يساعدوني بس ما الحق على الشغل وماعد اهتميت في نفسي لبسي وشعري وسلفتي لابسه وكاشخه ومدلعه نفسها هي عندها شغاله تساعدها حتى في الطبخ هذا اذا ماكانت الشغاله اللي تطبخ كل شي
بعد كلام امي مع عمتي جت اختي قالت مايحبون الا طبخك ارضي ربك في مساعدتهم واحتسبي الاجر وعمتي كبيره في السن وبناتها يجونها مره في الاسبوع او كل 4 ايام مره

الله يقويك ويكتب اجرك.
وعوضي نفسك بسووق اشتري وتدلعي

وسلفتي اذا طلبتها شغالتها تجي تساعدني ماترضى تقول مشغوله او نايمه
واللي يقولون انا عودتهم انا طبخت اول يوم ماتوقعت ان زوجي راح يسوي فيني كذا كل يووم
واليوم اللي بعده قالي صلحي فطور وكثري شوي عشان الشباب
مادريت انه راح يفطر معاهم تحت على طول
والسحور نفس الشي مايجلس معاي ابدا واذا جاء على المسلسلات ويطلع


فكرت اطلب فرزنات من وحده اعرفها بس ماحصلت رقمها قبل رمضان ووقت رمضان ماتسوي


واذا فرزنت انا زوجي يشوفها ويزعل وترى زوجي يحب يدخل المطبخ ويشوف كل شي حتى القدور والفرن يفتحها يشوف وش فيها يجي يسأل وش اسوي وايش اسم الطبخه وايش مقاديرها ان عجبته قال تسلمين ياسوسو واذا ماعجبته قال خليها لك هذي مانبغاها والا قال ماتصلح
والحلى والكيك زوجي يحبه ويطلب كل يوم اسوي
وعلى كذا اذا احد من عيالي بكى قالوا ليش وزوجي يجلس يصايح سكتي ولدك والا سكتي بنتك والا يقاطعني في نص شغلي يقول لبسي الاولاد وشيكيهم عشان ينزلون معي تحت لاني لو نزلتهم في بجايم يشرهون واني مبهذله عيالي وما اهتم فيهم
وولدي الصغير له يومين بس يبكي ما ادري اذا هي اسنان عنده او شي ثاني حتى السريلاك معد ياكل من امس العصر للحين يادوب رضع 120 مل حليب ورضعته من صدري بس رافض الاكل ويلف وجهه ويقفل فمه اذا جيت اكله نفسيتي زفت وتعبانه وولدي زاد همي
قبل بسم الله عليه ياكل فواكه وخضار وشوربه وزبادي وسريلاك وعدس وجبنه وزبادي وعصير وكل من يشوفه يقول ولدك دبدوب ايش تأكلينه علمينا نأكل عيالنا
و
من امس تغييييييير قلة شهيته ومايتبرز وبس يبكي
اعطيه مويه كل نص ساعه ما ادري هو امساك عنده او ايش بلاه 😟 احيانا اشك انها عين صرت موسوسه وقلقانه ومرهقه
اعذروني دخلت موضوع في موضوع ثاني بس من قهري على ولدي ومن تعبي حتى الحمى جتني وزوجي مارحمني يطلب ويتشرط هذا طبعه من يوم عرفته كان يتشرط على اخواته قبلي


الله يعيني وكل من طلبت مني ادعيلها تبشر والله لادعيلها من كل قلبي وعسى ربي يسعدكم دنيا واخره ويحقق امنياتكم يارب.