زوجي جنني وش الحل معه. 😩

صباحكم خيررر
معليش اعذروني ع الشكوى بس جد ارتاح ادا طلعت الكلام اللي بقلبي لاني ماقدر اقول لاهلي او اي شخص عن اللي يصير بيننا
دائما تصير بيني وبينه مشاكل بسيطه. وتنتهي ع طول ويرجع وضعناا طبيعي ماكأن شيء صار بيننا.
والحمدلله لنا فتره طويله مبسوطين ومرتاحين.
لكن الشهر هذا بديت الاحظ عليه متغير صحيح مايقصر في بيته وفي بنته بس تصرفاته و بعده عني وعن بنته شككني
اول شيء لاحظته اذا دخل الحمام يطول فيه ومعه جواله
طبعا هو له حمام الرجال يروح له ويطول فيه ومره جيت بروح لقسم الرجال طلع مقفل باب المقلط اللي يودي لمجلس الرجال والحمام وكان وقتها موجود ف الحمام الله يكرمكم
المشكله مادري ليه يسوي كذا بنته صغيره عمرها سنه والقسم مافيه اغراض شخصيه له يخاف عليهاا.
ماناقشته وطنشته.
الين الوضع زاد عن حده طلعاته صارت كثير يجي من دوامه طبعا هو عسكري وماعنده اجازات يعني اعذره واقول فاضي. المهم صار يروح لدوامه مواصل لانه برا مع اخوياه يرجع الفجر ويلبس ويروح لدوامه.ويرجع العصر واكون مجهزه غداه ولانني اسهر مع بنتي في الصباح كله ف اتغدا وانام واصحى المغرب.
يوم يرجع من دوامه توقعت ي بنات بينام لانه سهران من امس بس لا ينزل ملابسه ويطلع مع اخوياه وماعاد اشوفه الا ب اوقات قصيره يجي قبل المغرب يقول بروح اتقهوا عند اهلي اقوله طيب. ويجي بعد صلاة العشاء اجهز عشاه يقول خلاص انا بطلع وادا جهزتيه برجع ويرجع يتعشا ويقول بطلع ادخن ومايجي الا الفجر لدوامه وهكذا
واوقات نفس النظام بس اذا انا وبنتي صاحيين يروح ينام ع طول مايجلس معناا.
مع اني كل يوم اجهز لي جو قهوه وشاي وحلى بس مايجلس معناا
واذا صحى ع طول لدوامه ويرجع ويطلع ومانشوفه
لدرجة مليييت من وضعي واليوم قلت له بروح اسهر عند اهلي فجاة حلف ماتعدا باب البيت
وهو من العصر ماشفته وقبل شوي رجع ونام
والله مليت ي بنات طول والليل والصباح لحالي.
والمشكله موب متقبل اي سالفه مني
اوقات ابي اسولف معه مايبي يسمع مني شيء
وامس بعد مارجع من عند اهله كنت مسويه قهوه ولقيماات لانه يحبها. احاول اغير جونا الكئيب
اكل منها وهو ع جواله وطلع .
وله شهر ع هالوضع كيف اتفاهم معه موب متقبل اي نقاش وماكأنه مسوي شيء .
غير هذا كله هو احياانا متهاون في صلاته ويدخن.☹️
وفلوسه مادري وين تروح اوقات نطلب شيء ويقول مامعي. مثلا يكون معه 100 ف يوم تخلص ومايجيب شيء لبيته بنفس اليوم هذا. ولان عندي مصروف خاص فيني صار يأخذه مني
ويسحب من صرافتي كل يوم.ومايجيب شيء معه للبيت عشان اعذره
ف اللي خلاني اشك انه يعطي اخوياه ويشتري لهم دخان ع حسابه لانهم كلهم عاطلين بدون وظايف
من الجلسه الوحدانيه صرت افكر واوسوس بكل شيء ☹️💔💔💔
واعذروني طولت الكلام بس فضفضه ☹️