زوجي حارمني من امي انصحوني شسوي

السلام عليكم ياجماعه هذي سالفة خويتي وهي عندي اليوم سهرانه وجلست تتابع قصص ومشاكل البنات وهي اليوم مسيره علي لان زوجها مسافر وعندها مشكله قد قالتها لي وانا عرضت عليها انها تكتبها لكم وتاخذ رايكم لاني وبصراحه احترت اعطيها النصيحه فلاتبخلون عليها خليتها تكتبها بالوورد وتنسخها عشان ماتطول عليكم لان ماعندها نت بالبيت

==========================================================

السلام عليكم ورحمة الله وبركاته
الله العالم ماخلاني اتجرا واعرض سالفتي الا لثقتي بهذا المنتدى وبمحرراته وعضواته
اسمحولي ابتدي سالفتي وارجو من يكون لديها النصيحه اللي راح تفيدني ان لا تبخلي علي فيها لاني بحاجتها ولو بالدعاااء واعتذر مقدما على التطويل

سالفتي من 3 شهور كنت بزياره عند اهلي طبعا ازورهم بالسنه مره احيانا اجلس شهر او 3 اسابيع ماعمري جلست اكثر من شهر والسبب زوجي يقول اطفش طبعا زوجي ساكن بنفس المنطقه اللي اهله فيها (( ملاحظه : لي سبع سنوات متزوجه وخلال هذي الفتره ماعمره راح معي لاهلي كنت اروح دايم لحالي انا وعيالي عندي بنت وولد وحاليا حامل بالثالث )) وعدنا بالعايله ان البنت اذا ولدت تولد عند امها الا انا ولدت بنتي وانا بكريه عنده وولدت ولدي عنده بعد والسبب اختلاف بسيط بينه وبين ابوي اول زواجي هي اللي ادت الى الفجوه بينهم الاثنين فزوجي في بكري رفض الا اولد عنده والله العالم وش كان حالتي وقتها جبت لي خدامه مؤقته ولحالي اهلم الله يسامحهم ماكان فيهم خير ولا احد كان معي يعني انا كان باستطاعتي اني اعاند والزم اني اولد عند اهلي بس مراعاة لمشاعره ( زوجي ) انه مايبي يحتك مع ابوي قبلت اني اولد بنتي وولدي عندي وبعدها اروح ازور اهلي لحالي بعد
المهم قبل 3 شهور زرت اهلي واوضاعهم كانت متوتره كون الوالد الله يهديه له فتره متغير على امي واخواتي والسبب بنات الحرام والله العالم فكنت دايما بنقاش مع الوالد الله يهديه كنت ادافع عن امي واخواتي طبعا الوالد بطبعه حار الله يسخره لامي واخواتي فيوم من الايام احتدم النقاش بيني وبينه لدرجة انه مد يده علي وطردني وانا ماصار لي عشر ايام عندهم طبعا مااخذتها بعين الاعتبار ولا رجعت لبيتي جلست لاني ادري انه شيطان دخل في نفس ابوي حاولت ماابين لامي واخواتي اني زعلانه او متضايقه طبعا امي انهارت من طريقة ابوي معي لكن حاولت ابين لهم انه عادي وانه ابوي ومستحيل نكبر عليه ووووو بمعنى ابي ابين لهم اني مو مهتمه وعادي ولا فكرت اطلع او ارجع لجل عيونهم لكن اللله العالم وش كان بخاطري من هم وغم كون ابوي عزوتنا نلاقي منه هلمعامله

المهم بعدها جاء يوم سفرنا انا وعيالي امي حاولت انها تخلينا نجلس بعد لكن زوجي اصر علينا بالرجعه وجاء يوم السفر ورحت انا وعيالي للمطار من هذاك الوقت وامي طايحه بكى وصياح كلموني خواتي بعد ماوصلت لبيتي وقالولي اني امي تعبت من رحتي وانها جلست تبكي مقهوره عليك انك جيتي ولا تهنيتي عن\ اهلك كون الوالد جلس ينكد علينا جمعتنا انا وامي واخواتي الصغار كوني انا المتزوجه واختي اللي اكبر مني كانت مسافره مع زوجها ما كانت معنا بعدها يقولون امي تعبت وكلمتها حاولت اسمح خاطرها وابين لها اني انبسطت وهي لبى قلبها مقهوره عشاني تقول جيتي تبين ترتاحين من مشاكلك مع زوجك (( لاني قبل لاجيهم زياره كنت متهاوشه مع زوجي بفتره وتراضينا بس الالم والجرح اللي سببه لي زوجي لازال وامي تعرف بهلشئ )) فكنت ابين لها اني بالعكس ارتحت ووو ابي اريحها بعدها بيوم ياجماعه كلموني خواتي قالولي امي تعبانه حيل وودوها المستشفى وطلع فيها جلطه بسيطه تاثرت ايدها ولسانها بس بشكل بسيط مو كبيره الله يعافيها يارب وربي ماتتخيلون ياناس وش كثر تالمت وتعبت مو مصدقه امي اللي اربعين سنه قويه تطيح بجلطه كنت احس اني انا اللي تسببت بهلشئ كانت تبيني اجلس وانا كنت استعجل باالرجعه لبيتي بعدها خبرت زوجي قلت ابي اروح لامي طبعا مالي الا كم يوم راجعه وهو قام يتعذر بالحجوزات وانه ضغط مافي امكانيه وكنت امشيها تنومت الوالده اسبوع وبعدها طلعت ولمى طلعت قال زوجي مو لازم خلاص ان شاء الله انها طيبه وبخير وفعلا ياناس امي بعد الجلطه كانت تمشي وتتكلم وترد علينا كانت امورها زينه محد يصدق انه جاتها جلطه بعدها باسبوع امي صارت تتعب اكثر واكثر وكل مالها تتعب وصحتها في اقل مو زرد وزوجي يشوفني شلون نفسيتي تعبانه ابي اشوف امي وهو كل يوم طالع لي بعذر يقول وين نحط العيال بالرغم عندي خدامه وخدامتهم كويسه معهم اقوله ناخذهم معنا او نحطهم عند اهلك او نخلي احد من عماتهم ينام عندهم كون بيتي وبيت زوجي جنب بعض وهو يتعذر لا صعبه العيال حرام نخليهم اقوله ناخذهم يقول ماعندي ميزانيه سكت وانا نار بصدري على مويميتي خواتي هناك مايقصرون بس كنت لمى اكلمها تجلس تبيكي تقولي تعالي لي وربي ياناس ماتتخيلون وش كثر انقهر واتالم وانا اسمعها تقول تعالي صرت اتحجج لها اقول يا والدتي ان شاء الله راح اجيك بس عندي مشاكل بالحمل والدكتوره محذرتني من السفر بس بجيك اول ماتسمح لي دكتورتي الناس زاروا امي من كل مكان واانا بنتها لا الناس كلا يسال وين فلانه ماجات كانوا خواتي يتعذرون لي مره يقولون مالقت حجز ومره مشاكل بالحمل وانا ولله الحمد ماعندي أي مشكله اسبوع ورى اسبوع وامي كل مالها تتعب لدرجه الان حتى دورة المياه اعزكم الله ماتروح لها الا بمساعده صارت مثل الطفل لايمشي ولاياكل ولا يتروش الا بمساعده خواتي خواتي الصغار كل يوم يكلموني وهم منهارين مو عارفين وش يسوون معها وانا قلبي يتقطع على امي وخواتي مو عارفه شسوي يكلموني يترجوني اجي وزوجي مو عارفه ليه مايبيني اروح كل مره يتعذر بالمادة ويقول ميزانيتي ماتسمح وهو وانا متاكده ان ميزانيته تسمح بس عشان يحرجني ولااكلف عليه اللي خلاني اكتب لكم السالفه ان امه تعبت وكشفوا عليها وطلع عندها ورم الله يعافيها يارب وراحت للرياض تسوي عمليه استئصال ورم حميد بالمبايض تخيلوا قام وحجز يومين عشان يزور امه وانا جالسه مقهوره لي 3 شهور ابي امي تعبت نفسيتي وانا حامل صحتى تدهورت بهلسبب وهو اوجب ببر امه مني انا بامي وربي قهر يا جماعه احس اني كرهته من حركته هذي خواته هناك اتركوا عيالهم عند ازواجهم وراحوا لامهم اسالكم بالله هل هذا حق اسالكم بالله لو مكاني وش تسوين زوجي بيرجع بعد يومين ابي موقف معه واعتذر عن الاطاله.