زوجي حرمني فرحة العيد..والسبب

كل عام والجميع بألف خير وصحة وسلامة...
الحمدلله على بلوغ العيد ونحن بصحة وعافية
غصة وحسرة بقلبي وألم بسبب زوجي
حرمني فرحة العيد
الموضوع هو
ان اهلي يجتمعوا بالعيد من اخوات و عمات وبنات العم وهو الخ في بيت اهلي
فطور جماعي ووناسة
بيت اهل زوجي بس اخواته واخوانه وحريمهم
زوجات اخوانه ينتظروا الى يفطروا أزواجهم و ينتقلون إلى بيت أهاليهم او يروحوا قبل


انا رحت مع زوجي لا اهله ونحن طالعين بغيته يوديني بيت اهلي وعنده خبر
رفض
يقولي تعبان اوديك لهم في الليل أو بكرة
قلت له نحن جمعتنا صباح العيد وبعدها كل إنسان حسب جدوله
انا زعلت
وهو قلب علي ليه زعلت زعل مايكلمني يقول في العيد ممنوع الزعل
طلع من بعد المغرب رجع اذان الفجر
بالعلم طلع دايرة اهلي يوجب ولايفكر يقولي اوديكم
بعدها انا كلمته قلت له ودي اطلع الملاهي او اي مكان امشي العيال ونحس بالعيد رفض
وضاع علي العيد وانا بالبيت
مقهورة واحس بحرقة في صدري
جيت اليوم لاهلي ولكن بعد فوات الأوان مافي احد الكل لاهي انا بروحي موجودة
العيد فرحته بأول يوم في الصباح
قلبي زعلان عليه وماودي حتى اطل بوجهه من القهر
واهلي زعلانين ليه ماجيت بس ماقلت لهم انه رفض
قلت لهم مشغول
لي الحق اني ازعل اولا ؟؟؟
وهو له الحق يزعل او لا؟