زوجي حيجنني في قراراتو الفردية

السلام عليكم

انا متزوجة من ٣ سنين وعندي ولدين الكبير سنتين والصغير سنة


عمري ٢٥ سنة وزوجي برضو ٢٥ سنة بس انا اكبر منه بـ ٤ شهور

طيب وحنون وانا احبه والله واعرف انه يحبني

بس بيتعامل كانه طفل يحب السيارات وطلباته الاهم واحنا بعدين طلباتنا تتاجل ويشيل هم الفلوس لطلباتنا لكن لو شي لنفسه يدبر الفلوس بسرعه

يعني دحين نقلنا في بيت جديد ووعدني انه حيأثث البيت كامل الى الان لنا ٣ شهور ما ركبنا ستاير ولا نجف ولا عندنا فرشات وسجاد لانه قال يبغى يحوش ونشتري سيارة عشان نرتاح من التكاسي

والحمدلله من اسبوعين اشترينا سيارة مستعملة رخيصة بس شغاله وتمشي الحال وفرررررحت اخيرا لاني راح ابدا في ترتيب البيت
والسيارة اخذها باسمي لان عليه مخالفات مايقدر يطلع باسمه

المهم اتفاجا امس انه بياخذ هويتي ورايح يبيع السيارة قلتله ليش كدا
يقول عشان لقى سيارة احسن وبيشتريها في نفس اليوم بيقابل صاحب السيارة
اتضايقت بس قلت مدام جايب البديل اوكي
هوا يتمنى يتاجر في السيارات
المهم رجع يقول انه باعها باقل من سعر شراءها ب ١٥٠٠
والمفاجاة ان اللي وعده يقابله عشان السيارة الثانية ما جا وصار يماطل واتواعدو اليوم وبرضو ماصار يرد

دحين انا مرة متضايقه وخايفه اننا نقعد في موال السيارات ده على طول ولا حنشوف طلبات بيتنا
عندنا البيت يحتاج سباكة والمكيفات محتاجة تصليح كلها مؤجلة عشان نشوف موضوع السيارة وهوا ولا على باله كل همه قاعد على موقع السيارات ع النت ويقرر ستري ويبيع ولا كانه عنده عيله


امس صارحته ووعدني وبس كلام طبعا

ما اقدر افضفض لاحد من اهلي
بس حابة اعرف رايكم واخذ من تجاربكم ونصايحكم
لاني حاسة اني تعبببببت ومني قادرة اتصرف