زوجي دكتور وبيتي بينهدم ساعدوني .

السلام عليكم
اخذت يوزر صديقتي لما قالت لي اشرحي مشكلتك بحواء فيه بنات ردودهم تساعدك كثير
يابنات انا متزوجة من سنة جراح وسمعته طيبة ويحب مساعدة الناس ويحب شغله ويخاف الله وانسان شخصيته قوية مرة ولا يحب قليلات الادب والغبيات واللي بدون علم
بداية زواجنا شخصياتنا مختلفة مرة وصبر علي وصبرت عليه لين فهمنا بعض وماكنت اغار عليه عشان اخلاقه ولاني فاهمته زين
بعدين صار عنده ضغوط ومشاكل مع اهله ، وصار عصبي ويحط حرته فيني وكنت اتصبر وادعي له وكذا لدرجة عادي يمر شهر بدون مايطلب حقه ولا ينتبه لمحاولاتي واذا انفجرت فيه صار يتعذر بسوء نفسيته واني انانية وانسان مايحب يجلس فاضي لا راح المستشفى وصار يساعد الناس تتغير نفسيته للافضل وكنت اشجعه مايأخذ اجازات عشان يخليني اهتم بنفسي ونفسيتي لانه صدق يوجع قلبي
المهم مرة طلعت مع قريبات اختي من ابوي وكانت معهم ممرضة تشتغل بنفس المستشفى اللي يشتغل فيه زوجي ولما قلت لها عنه قامت تمدح فيه وكذا وانصدمت انه زوجي حسيت تبي تقول شي ، خليت اختي بعدين تجرجرها بالكلام وقالت لها صح الولد خجول بس كل المستشفى يحبونه عشان شغله وبنات كثير يحاولون يشبكون معه بس مدري اذا له علاقات باحد ، وتسولف لي عن الممرضات هناك اقسم بالله شي يفجع القلب ، استرخاصهم لدينهم ولحياهم ، انا لعب ابليس براسي وسويت اكبر غلط وخليت وحدة تروح له ولا تكلمه بمجال الشغل ، والصدمة الكبيرة انه استقبلها عادي وقالت له اسولف معك بعدين قالها حياك الله بأي وقت !!
هنا عجزت اصبر زعلت وطلعت وعلمته انهرت نفسياً اقسم بالله يابنات اني احبه حب عظيم وصابره على بروده وكلشي رغم انه ماينقصني شي والمشكلة ماهو من النوع اللي يهتم بالاشكال كثر عقليه الشخص
راضاني ورجعني للبيت وحلف لي على المصحف انه مايسوي شي غلط ولا يخوني ولا عاد يكلم البنات الا بمجال الشغل ، بس لعب بي الشك تعبني وساكته وبس ابكي وهو حاس فيني ، تهاوشنا مرة ثانيه بخصوص بروده وحقي الشرعي وكل شي ، تخيلو فالنهاية قال خلاص ادري اني معذبك معاي ولا اعطيك حقوقك وادري اني بارد و و و وكلام كثير .. انا هنا بغيت انجلط ، قلت له اسآلك بالله فيه وحدة ثانيه ؟ قلت لو نظره لو اعجاب بس ؟ قالي ايه فيه وحدة ثانيه بس يحلف لي ماقد كلمها ولا حتى يعرف اسمها ولا ولا ، وسبب انه بيتركني لانه مو قادر يسعدني بأبسط حقوقي رغم يشهد الله ماني متطلبه واصبر على سوء تعامله وبروده
هنا بغيت اموت حتى هو خاف علي يتركني لحالي وجلس يترجاني انو لا ابكي ووكلي امرنا لله ولا راح يتركني ولا راح يلاقي مثلي بالحريم ، حتى اهله يحبوني ويصبروني دايم على بروده وعصبيته ويقولون لي مافيه بنت بتصبر عليك زي زوجتك
صرت انام على قرآن وماقدر انام من غيره ، واذا صحيت بس على سجادتي حسيت بودع من الغيرة والالم ، لدرجة ورب الكعبة تنزل دمعتي بين الناس اذا تذكرت ، والله لا صرت لحالي بغرفتي اضرب بنفسي واناقز على السرير من وجع بقلبي اقول ياربي بوشو قصرت به ؟ وش يبي مني اكثر ؟
والبنات هناك ورب الكعبة مايخافون الله الا ماندر لا بزينه ولا ب تدلع ومياعه ولا بالكلام مع الدكاتره
المشكلة مستمر على بروده والله من يوم حصلت السالفه لنا اكثر من ٣ شهور هاجرني بفراشي صرت ما اطلبه خلاص ، اقوم بواجباتي كلها واوقف معه واسانده واطلع له بمظهر حسن ومتكله على الله
اول اقول بالطقاق بكل مكان اختلاط ، لكن فرق لما زوجك يشوف انسانة عابره تعجبه وفرق لما يشوفها كل يوم قدامه ومعه ، تعبت نفسيتي صدق مدري ابقى معه ولا اتطلق