زوجي رفض يودي بنتي المدرسه سبب جواريب .. ساعدوني

السلام عليكم


بنات طبعا اغلب عارف مشكلتي او مشاكلي من كثر المواضيع اللي انزلها وبحاول اتكلم باختصار


زوجي طيب حدا لكنه عصبي جداً وديكتاتوري لابعد حد


ظروفه الماديه سيئه احاول اساعده باللي اقدر عليه وفتحت مشروع طبخ بالبيت وساعدته لو انه للحين الاقبال قليل جداً


وساكنه بعيد عن اهلي واهله


وطول وقته دوام وطلعاتنا قليله


المهم
اليوم بنتي بتروح المدرسه عمرها 9 سنوات بثالث ابتدائي ولبستها وجهزتها وهي مبسوطة طبعا هي عندها حاله خوف من المدرسه واحنا نحاول نشجعها وكذا والحمدالله رب العالمين صارت احسن وانا بعدل لها الجزمة وانتوا بكرامه
شاف جواريبها السبورت القصيره مره وهو شاري لها حواريب طويله عشان تبدا تلبسسهم وعصب عليها وانه ماتروح المدرسه ولازم تبدلهم او مافي طلعه وهي قامت تصيح وهو بدل ملابسه وجلس ع السرير واقولها ابدلهم لك ماما بسرعه مو عاجبني اسلوبه ولا طريقته ابد بس اجاري الوضع واحاول فيها ماتبي بس تصييح وفي الاخير انسدحت ع الكنب وقالت انها مابتروح خلاص وهو بعد مابيوديها


انا عصبت خلاص وش هالمهزله لازم تروح المدرسه واكلمه مو راضي وهي بعد
قلت له بنزل تحت وبوقف ايه تكسي وبوديها مو انت بس اللي تفرض رايك وقالي والله ان سويتيها تطلعي برره البيت


وعصبت حيل وقلت كلام ماذكر شنو بس انه توها صغيره المفروض مو كذا وتعقدها طبعا الف مره ينقال اهااا هالكلام بس مافي فايده ويوعدني يتغير تعامله معنا ولا يتغير شي


ورجعت الصاله الا هي تبدل الجواريب ووداها وهي مره زعلانه حتى ماودعتها ولا سلمت عليها بس هي بالاخير رجعت لي وقالت لي ماما باي قلت لها باي وراحت مع ابوها


وانا قعدت اصيح على حالي من الصباح مشاكل وصراخ كل حياتنا معه كذا وبعدين على كل شي تحكم
ورجع ولا كانه مسوي شي مسح ع راسي وراح يفطر وانا ماكلمته ابد فطرت بنتي الصغيره بس وراح دوامه الحين ولارديت عليه ولا كلمته


بس احس اني مخنوووقه بموووت
راسي بينفجر مو قادره اتحمل ودقيت عليه وقلته الى متى وضعنا كذا وانت كل مسوي نفسك مو مسوي شي انا تعبت


قالي نعتذر منك وانا اسف بس قلت له وش اسوي بالاسف وسكر وقبل ليلتين صارت مشكله مثلها او اكبر عند اهلي كنا نازلين وتعبت مره وهو كالعاده يسوي نفسه مو مسوي شي والمفروض اسامح وامشي الوضع وانا فعلا اسامح لانه ماعندي خيار ثاني


ودي اتركه وارتاح
لان العيشه معه صعبه جداً مشاكل على اتفه شي وتعصب ولازم كلمته تنسمع واحنا تحت امره وانا صرت عصبيه جداً جداً جداً وحده ثانيه حتى كلامي صار صراخ كل شي ينعكس ع عيالي ونفسيتي ث
آه بس مدري شقول
فكرت اكلم امي ماودي اخوفهم علي دايم اسكت واتحمل عشانهم امي وابوي طيبين وياما وقفوا معي ومع زوجي مابي اضايقهم هم بدون شي شايلين همي لانهم عارفين اني مو مرتاحه بحياتي وكل مشاكل وحاله ماديه صعبه


بس تراجعت ولا كلمتهم


بنات شوروا علي شسوي معه وهل انا غلطانه وكبرت الموضوع


ياليت تساعدوني