زوجي زير النساء بس على خفيف يعني ماوصل للعميق

السلام عليكم
مرحبا الغوالي
الموضوع ومافيه ان زوجي ياجعله للهدايه ممرضني الله يسخره يارب
زوجي يموووووووت على شي اسمه حرمه
هذا الموجز وجايكم التفصيل
ان شاف القواعد من النساء الاتي لايرجون نكاحا وحطوا تحت نكاحا 3خطوط يعني عجوز معرعره رجلن فالارض ورجلن في القبر
قعد يسولف معهم وياخذ ويعطي ويمي ويمي كن الدنيا مافيها الا هالعجوز
وهذا الصنف مامنه خوف خله يوسع صدره معهن وفيهن اجر ان شاء الله ويدعون له مير كود الله يصلح حاله


الصنف الثاني حريم نصف عمر يعني اربعين ثلاثين هذولي عاد يسوي فيها الفارس الشهم هبة الريح سوبرمان زمانه
اشي يدافع عنهم اشي يساعدهم اشي يوقف بصفهم ويخلص معاملاتهم ويسنعهم طبعا كثير منهم تصير بينه وبينهم اتصالات ومدري ايش بحجه انه يخلص لها شغلها
وهذي مقدور عليها والاجر على الله



نجي عاد للبني قويات الوجه الفهر العهر قليلات الادب الماصلات اللي مافيهم ذرة حيا الله يعافيهم ولايبتلينا
قدامي تعالي شوفي انواع التهزيء فيهم والشتايم والتمسخر عليهم
ومن وراي انوااااع الخيانات
مكالمات ماسنجر شات بلاك بيري انووووووواع محادثات الي فون
وهذا الصنف اللي كاسر ظهري الله يكفنيهم بما يشاء وهو السميع العليم

البنات بعمر اللي فوق بس محترمات
يسوي فيها الرجل الذرب المهذب الرومانسي الطيب الخلوق المحترم المربي الفاضل يعني يحب يلفت نظرهم والا غصب باعجبكم
وهذي بعد اقول ان شاء الله انهم محترمات والله يكفيني شر من فيه شر



نجي للشغالات والممرضات يعني العاملات عموما
وخاصة الشرق اسيويات مسوي خفيف ظل ويمزح معهم ويضحك وينكت وعلى باله الموضوع عادي
بس الحمد لله من تزوجت وقفته عند حده مع الشغالات وفهمته ان هذا الشي مايرضي الله ولا رسوله ولا يرضيني ابدا مرات شغالات خواته او اهله والا انا ماعندي
وهذا الشي اللي مخليني اتردد مليون مره اني ما اجيب شغاله مع اني في امس الحاجه لها عندي طفل معاق ومتعب جدا جدا بس للحين ماجبتها

والموقف اللي خلاني اكتب الموضوع
قبل امس كنت بالمستشفى مع ولدي المعاق كان متشنج وحالته صعبه مره
دخلوه سوووه تخطيط مخ واشعه رنين مغناطيسي ومخدرينه كامل وخايفين من البنج عليه يعني حالته كانت صعبه وهو قاعد يتضوحك مع الممرضات بدون اي داعي ولا حصل مو قف يضحك
وانا مو في حاله اني بانصحه والا بتفاهم معه ولدي بين الحيا والموت ولاهيه معه
وعاد الحين الحمدلله خف ولديي بس متضايقه جدا من موقف زوجي كان شكلي جدا سخيف بس هم ماهمموني وانا واثقه من نفسي بس ماكان لي داعي بجنبه وعند راس ولدي وهو يضحك معها
حسبي الله ونعم الوكيل بس

طبعا غير قريباته صح هو محرم لهم وما اقول شي بس يحب مجالسهم واذا كنا باستراحه او جمعه يطلع من مجلس الرجال ويجي عند الحريم وخاصه فيه كثير يتغطون عنه ويتضايقون واكلف ماعليه يتنحنح وياولد

طبعا لاتعطوني حلول لاني فاقده الامل وكل يوم خيانه شكل يوم اواجهه ويوم اتمشكل معه ويوم اروح لاهلي مررررررات اسفهه ولا كاني شايفه وانا اغلي غلي من جوا بس ساكته عشان ولدي المعاق محتاج مستشفيات ومواعيد الله يشفيه بس

اللي ابيه منكم دعوه من قلب لعل منكن من تكون مستجابه الدعوه ان يصرف قلبه عن النساء ويعلق قلبه بالمسجد وان لايرى امراة غيري

لاني بصراحه تعبت والغيره كلت قلبي والحريم مو زي اول
الحين دلع ومياصه وهياصه وترقيق الصوت والعطور يعني حتى مثلا وحده بيخلص لها معامله او شي بتجيب له اواق او كذا تكون كاشخه ومتعطره وخذي الصوت بس كيف يكون حتى وهي كبر امي

الله يجزاكم خير طولت عليكم بموضوعي
نسيت اقولكم لاتقولون اكشخي والبسي ومدري ايش معه من عشر سنين ماقد شافني مبهذل الحمد لله يارب
بشهادته وشهادة خواته يجوني فجأه ويلاقوني بلبس مرتب وحلو ومكياج ناعم وشعري مسرح بشكل حلو

دعواتكم يا اخواتي لي وترى الموضوع للفضفضه ودي اطلع حرتي ومالي الا انتم