زوجي شعرهـ مره طويل.. / تم الــرد

بسم الله الرحمن الرحيم
السلام عليكم ورحمة الله وبركاته
اخباركم وش مسويات عسى اموركن زينة بس ..؟
اعشقق هالمنتدى عشق مب طبيعي ولا توقعت انه بيجي يوم وبضطر اسجل فيه .. كانت عندي عضوية فيه قديمة بس مع التجديد للمنتدى ماقدرت ارجعها العضوية لها اكثر من 3 سنوات تقريبا ..
مو مشكلة بطب دايركت بالموضوع ..

اول شيء عندي شروط بسيطة عشان يكون الموضوع زين واستفيد منكم وتستفيدون مني :-
1- مانبي ردود عادية او تمشي الوضع نبي ردود من قلب الحدث تردين من قلب عشان ندعيلك وتفيديني واستفيد منك وافيدكم بعدين >>حشى لغز مهوب شرط ذا
2- نبي اللي عندها تجربة بالموضوع هذا وا قد مر عليها شخص تعلمنا ولا حياء .. عادي نتعلم ونستفيد ..
3- اتمني تساعدوني المشكلة بسيطة بس ابي ارآئكم ..
..

موضوعنا اليوم هو زي ماهو مكتوب قدامكم عن الشعر الطويل وعارف ملينا من كثر مانتكلم عن هالنوعيات وغثونا واتعبونا واتعبوكم .. لكن موضوعي اليوم عن زوجي وابي ارائكم وتجاربكم ..

زوجي يوم خطبني كان شعره لكتفه وبداية كتوفه .. بعدين طال لين صار يغطي نص ظهره ..الحق ينقال زوجي ماشاء الله عليه اخلاق وماقصر معي ومحترم لا يدخن وكان يشيّش بس وقف الشيشة .. لكن المشكلة شعره .. عن نفسي مادام شعره حلو وكثيف ويهتم بنظافته عادي بس المجتمع اذا طلعت معه يحسسوني اني طالعة مع واحد خاطفني او مع رئيس عصابة :فيس وحدة خايفة :والحمدلله ماهوب يستشور شعره او يفرده لانه مايحتاج لو بيستشوره او يفرده بنتفه بس دامه زين وزوجي بسم الله عليه ماقصر معي عادي الزوج اهم من الشعر ..

احاول اقنع فيه يلمه ويربطه اذا طلعنا عشان الانظار تقل عليه مرات يطيعني ومرات يتعيجز يقول ماطولته عشان اخبيه عن الناس ..
اللي ابيه ارائكم :-
يعني اذا طلعنا وش ممكن اسوي بشعره بحيث يقل انتباه الناس له ..ومن ناحية القص قبل ماتنقزين ياوخيتي وتقولين قصيه او احلقيه ماكينة مانبي قص لو ابي قص كان قصيته له وهو نايم بدون مااتعنى لكم واكتب موضوعي ..
وابي تجاربكم مع اخوانكم وازواجكم اللي مطولين شعورهم عشان استفيد ..

يعني فيه فكرة غير انه يربطه ممكن تخفف النظر له ..؟محتاجة افكاركم .. واول فكرة تجيني بطبقها ..:تحمسسكم هالمسيكينة :


انتظر ارائكم واللي تتحمس معي لها جائزة >> يرحم امتس ماتعرفين تغرين
ولو سمحتوا بلاش حركات تحطيم وتدخل الوحدة تدرعم برد تحطيمي وتمشي..ابي تفاعلكم تفاعل بنات حواء ياحبيلكم ..


وهذي اول مشاركة لي هنا ..