زوجي صار هو اللي يلاحقني/الاجزاء بأول رد

السلام عليكم ورحمة الله وبركاته

اول شي قبل ما تقرون الموضوع قولوا ما شاء الله تبارك الله
ثاني شي كثير جربوا طريقتي ولقوا نتايج مبهره
ثالث شي لا تنسون ان الرجال بعد يختلفون ووضع الزواج وعدد سنوات الزواج تحدد اشياء كثيره
رابع شي لا تنسون انك انتي مو مثل غيرك
خامس شي ترا الموضوع طويل لكن ابي اوصل لكم بالضبط قصدي وان شاء الله تستفيدون
سادس شي فيه بنات ماشاء الله عارفين هالاشياء من يومهم لكن الاغلبيه مثلي للأسف

موافقين ؟

طيب اول شي ابقول لكم عن طريقتي مع زوجي
انا من النوع اللي ما يعرف يوقف عطااااااااااااااااء يعني مشغله نفسي بزوجي وعيالي وامي وخواتي وعيالهم وزميلاتي بالعمل يعني شايفه كل الناس الا نفسي
متزوجه من 10 سنوات اقول لكم كيف يومي اصحى الصباح افطر زوجي وعيالي واطلع قبلهم للدوام لازم اتفنن لزوجي بالفطور واحضره من الليل وكل يوم اسوي له شي مختلف واحط له ورده مع الفطور واذا ما عندي ورده اكتب له عباره احبك والا بتوحشني والا والا والا من كلام التغزل على هالصبح واقول لكم شي ما عمره رد علي ولا حتى كلمة شكرا واذا وقفت عل راسه وقلت له هاه وش رايك ؟ حلو ؟ اعجبك ؟ وبالعربي غثيته قال لي شكرا والا يعطيك العافيه
في الدوام لااااااااازم ادق عليه ( شلونك شخبارك وهو طبعا يرد عليه من غير نفس واحيانا ما يرد واحيانا يقول عندك شي والا تراني مشغول ) بعدها بساعتين لااااااااااازم رساله غراميه والا رسالة دلع والا شوق والا حب والا شعر ... بعدها ادق مره ثانيه وش تبي يا حبيبي على الغدا ؟ ودايم يقول اللي تحطينه اباكله ويسكر السماعه .. وبعدين امر عيالي وار السوبر ماركت اجيب اغراض الغدا والتفنن والتانتك

اذا طلعت من الدوام على طول اطبخ اللي يحبه زوجي وبسسسسسسسس واغدي العيال اللي يحبونه واروح اتحمم واتعطر وادخن البيت واتجهز واسشور وحاااااااله

اذا دخل لازم استقبال وتحضين كاني ما شفته من شهر ولاحظت انه يجاملني وبعدين يبعدني بيده ويقول وين الغدا ؟

احط الغدا وطول ما احنا نتغدا وهو ماسك الريموت وعيونه بالتلفزيون وانا اقرق اليوم رحت وسويت واشتريت وجبت وحطيت وترا هذا الخس انا منقيته بنفسي وهذي الطبخه تعلمتها من اختي والمدرسه الفلانيه اليوم قالت وفلانه تطلقت وفلانه تزوجت واقررررررررررررررق وهو ولا يرد ولا كلمه الا كلمة الحمد لله اذا شبع من الاكل

وهو داخل الحمام يغسل اطمر قبله وانسدح على السرير واول ما ينسدح اقابله ( تبي مساج حبيبي ؟ تبي العب بشعرك ... تبي تبي تبي ؟؟؟؟؟ ) وهو يقول ابي اناااااااااااااام ... ومره قالها لي صريحه .. انا اكره ما اشوف اذا جيت ابنام العصر ولقيتك طامره قبلي بالسرير :(

اول ما يصحى العصر يلاقي الكيك والا الحلى والشاي والقهوه ... وطبعا تكملة القرق ... والطلبات الغساله خربانه نسيت تصلحها والسياره يطلع لها صوت ليش ما صلحتها وتبي ونبي ونبي نغير السفره ونبي ننجد الكنب ونبي نغير مدرسة العيال ونبي طبيب ونبي ونبي ونبي وال وال وال ... الطلبات هذي كلها طلبتها منه اقل شي 50 مرررررره وما شفت منها ولا شي لكن اصرار منقطع النظير
وهو مثل ابو الهول لكن معه ريموت خخخخخخ

لو يروح الحمام لحقته لو يبي يطلع بالسياره طمرت وين بتروح ؟ عادي اجي معك ؟ من عازمك ؟ وليش ووين ومين وكيف ؟

واذا طلع مستحيييييييل يتصل ولو يدخل للبقاله اشترى كل شي يحبه لنفسه وبس حتى ما يسال وش تبون ..
واذا رجع من طلعته انواع التفنن بالعشاء وبعده تبدأ الحنه واستجداء العاطفه ..انت ليش ما تتكلم معي انت ما تحبني ؟
ليش الرجال يسولفون عل حريمهم وانت لا ؟وليش ما تحب تطلع معي وليش ما توديني مطعم وليش وليش وليش ويمكن يجي معها دموع

اذا جا وقت النوم اشتغل مصنع العطور مره ثانيه وكل ليله قميص نوم جديد ودلع ولاحظت انه كل ليله يسوي نفسه نايم ويعطيني ظهره

المهم
صار لي موقف معاه صحى قلبي وسبحان الله زي اللي احد اعطاني طرااااااااااااق على والموقف قال لي هيه بسسسسس خلاص كفاااااااااااايه

انا ما راح اقول لكم شو الموقف لانه خاص لكن انا اعتبره هديه من رب العالمين

واذا وافقوا على الموضو ونزلوه اقول لكم وش سويت وكيف صار زوجي



الجزء الثاني في الرد 59

زي ما قلت لكم الموقف اللي حصل لي غير نظرتي لزوجي ولنفسي
وللناس وعرفت اني مهمله نفسي واستجدي العاطفه بالغصب من زوجي
وعرفت انه مو شرط اذا اعطيتي زوجك وخدمتيه بيعتبرك احسن زوجه بالعالم
بالعكس ! ممكن يشوفك عله ولزقه ومنتي مثيره
ويشيل هم اذا جا للبيت من كثر ما تقابلينه وتحوسين عنده وتتوددين له
وانا هنا ابركز على زوجي لانه منتدى الحياة الاسريه
ابقول لكم اول شي عن زوجي الله يهديه انااااااااااني
يعني مواعيد طبيب مستحيل يضيع وقته ويجي معي حتى لو ضناه اللي تعبان
مستحيل يسال وش تبين آخر همه بالحياة انا .. يطلع ويدخل ولا كأني موجوده ما يفتح فمه الا يطلب وبس
اسمعه انواع المدح ليل نهار وهو ما يمدحني بأي شي
حتى بالجنس ما عنده اعتبار لي
وانا حامل بالتاسع ما اقدر اشيل نفسي يقومني من النوم عشان انزلال الدور الاول اجيب له مويه
مستحيل يودي او يجيب ماله اي علاقه بالبيت كل شي يقول السواق السواق
يعني البيت عنده مثل الاوتيل
حتى ولدت ولدي الاخير بعملية قيصريه يوم صحيت من البنج وطلعوني للغرفه لقيت الاخ رايح للبيت ونايم :( ما قال زوجتي وش بيصير عليها تعيش والا تموت
اذكرمره قهرني مع ان الموضوع بايخ .. كنا راجعين من بيت اهله ( هذا المشوار الوحيد اللي يوديني له ) المهم مر على البقاله ونزل
ما قال حتى تبون شي .. ورجع ومعاه حبة سنكرس وعصير وقعد ياكل وهو يسوق حتى ما قال أسال هالغنمه اللي بجنبي لا تنظلني
عن العين بس ... لاوزياده على كذا يقول لي افتحي لي العصير
يشتري بكت الدخان قدام عياله وينفخ الدخان بوجهي وانا حامل وانا اسكت اقول احسن يدخن عندي ولا يدخن عند غيري
وابيه ياخذ راحته بالبيت
يعني ما عنده اي اعتبار لي
ما يحكي وكل شي ما يعلمني فيه
كل شي عنده بعدين بعيدن ما يسوي اي شي بالبيت
ما يشيل ما يحط وما يحرك ساكن
ملك ومنصب نفسه بالبيت
لو ينهد نص البيت جلس بالنص الثاني اللي ما انهدم
الله يهديه ما ودي احش فيه بس << ما خليتي شي خخخخخ
المهم
اول شي سويته صرت اخصص جزء من مصروفي (مو من راتبي ) لا من مصروفي كل شهر
ادلع فيه نفسي .. هذا لي انا وبس اصرفه في شي لي .. اما اصلح شعري او اظافري او اسوي مساج او اطلع اتعشى فيه
في احسن مطعم مع صديقاتي او حتى اشتري لي الحلى اللي احبه واذا ناموا العيال وابوهم مو موجود اقعد اتقهوى عليه وامخمخ
بالنسبه لزوجي الصبح احط له فطوره بدون بهرجه ولا قلوب ولا ورود ولا حركات
واطلع لدوامي من الدوام ما ادق عليه ابداااااااا ولا مسجات ولا حتى بالغلط
اذا طلعت من الدوام اغدي عيالي واسوي الغدا بدون ما اساله
خلاص 10 سنين الظاهر عرفت وش يحب ووش يكره .. اصلح من اللي موجود بالبيت وبس
بدون روحات السوبر ماركت كل يوم ولااااااااازم اسوي لي شي احبه انا على الغدا
اخذ حمام دافي واحط كريم حلو ريحته نظافه ويناسب بشرتي لافيه نكهات ولا اثاره
واذا دخل اقول له أهلين مع ابتسامه وبسسسسسس مافيه تحضين ولا مطامر ولا هبال خخخخخخ
نجلس على الغدا وانا ساااااااااكته ولا كلمه يعني ولا كلمه ما امد بوزي
لا لا لا بس اقعد ساكته .. صرت الاحظه يحاول يسأل ( وش فيك اليوم ؟ ) اقول له
ما فيني شي بابتسامه عاديه واكمل سكوت .. لقيته يسألني وش صار اليوم بالشغل
وانا اقول ابد اما فيه جديد , يسأل مثلا وش الطاري مسويه مكرونه ورز اليوم تراني ما احب المكرونه
ارد عليه ( انا مشتهيه المكرونه ) يعني تراها لي وانت كل رز
اذا خلصنا غدا اروح بغرفه ثانيه واكمل شغل العمل او ادخل النت او أقرأ كتاب .. المهم ما يشوف وجهي عقب الغدا
العصر اذا صحى يلاقي قهوته وحلاه بالصاله جاهزين لكن المره مو موجوده لقيته ياب نات وقسم بلله يجي يدورني يقول تعالي
تقهوي اقول له اليوم تقهويت قبلك معليش ومره اقول له مو مشتهيه ومره اقول له مشغوله ومره اجلس واتقهوى معه وانا ساااااااااااااكته
والله يا بنات بعد فتره وصل مرحله انه يجيب قهوته عندي وانا اصلح اوراق العمل ويقول سولفي علي خخخخخخ
اذا طلع ما ادق عليه واذا دق اجاوب على قد السؤال
واذا جاب شي اقول له شكرا والا يعطيك العافيه وبس ما ازيد ولا اهلل ولا ابجل
شكرا مع ابتسامه كااااااااااااااااااافيه وزياده
واحيانا اذا دق ما ارد عليه .. لأني اعرف لو شي ضروري بيرسل رساله
الاقيه مثل المجنون يدق 6 7 8 مرات واذا رديت قال وينك ما تردين
اقول له معليش كنت مشغوله .. يقول مشغوله في وشو ؟ اقول له شي خاص معليش حبيبي كنت تبي شي ؟
وهنا تجي اهمية الغموووووووض ... عشان ما تصير الوحده ممله ومثل الكتاب المفتوح
معاد اطلب الشي اكثر من مره وحده فقط !
وحده وبس .. لأن الزن اثبت انه خيبه حقيقيه
طبعا كل وحده وظروفها
مثلا بحالتي الغساله خربانه من شهرين ما صلحها
الغسيل اللي تقدر عليه الشغاله تغسله واعطيتها ترضيه
واللي ما تقدر عليه يروح للمغسله مع السواق
فيه غيري ما عندها شغاله ولا سواق
تتاخر عليه بالغسيل عشان يحس على دمه لكن لا تقول له تأخرت باغسيل عشان الغساله وهات الغساله وجيب الغساله
خلاص انتي قلتي له وهو عارف
ولا تخافين ما راح يطلقك عشان قدراتك مو مثل قدرات غسالة 8 كيلو
وما قدرتي تخلصين غسيله بيوم وليله
لكن ممكن يطلقك بعيد الشر عنك لو تاخرتي عليه بالغسيل وبعدين قلتي له
تاخرت عنك بالغسيل لانك ما صلحت الغساله
هو يفهمها وهي طايره


وبحاول يا بنات انظم الموضوع في نقاط عشان ما اضيع خخخخخخ بس اصبروا علي

الجزء الثالث في الرد 207

اسفه يا بنات تاخرت عليكم

كل يوم ابنزل نقطه للي تحب تتابع

زي ما قلت لكم يا بنات صار يدورني ويكلمني من العمل ويجيب لي الاشياء اللي ابيها
وكل شي وانا ساكته ما اقول شي

الحين نبي نعرف ليش كان يعاملني هذيك المعامله ، وليش الحين تغير
صحيح ان تصرفاته ناتجه عن تصرفاتي انا لكن وش السبب ؟؟

اولا
ليش الزوجه تعطي كثير
بغض النظر على ان العطاء فطره بالحريم فيه موضوع آخر
انا يا بنات كنت شايله البيت على راسي ابي اصير سوبر ومن
انا اودي العيال من المدرسه واجيبهم واوديهم الطبيب واشتري احتياجاتهم واحتياجات البيت
وزوجي ما يشوف مني الا الدلع والدلال والمدح المبالغ فيه احيانا
اوتيل 5 نجوم او6 بعد
بس ابيه يحب البيت ويرتاح بالبيت
وابي اصير زوجه مثاليه بعيونه
واضغط على نفسي عشان ارضيه << حطوا تحتها خط
طيب ليش الوحده تبي تصير سوبر ومن وتتحدى قدراتها وتتخطى صلاحيتها وتعطي كثير مع الزوج وتتودد له احيانا بشي
ممكن يقلل من كرامتها وتتعدى الحدود في التجمل وتبالغ وتبعد كثير عن خلقتها عشان ترضيه ؟

الجواب :
لانها في داخلها تحس انها هي كذا بالشكل اللي هي عليه مو كفايه
تحس انها بوجودها في حياته كذا زي ماهي ما تكفي
تحس انها محتاجه شي اضافي عشان ترضيه وما يتزوج عليها
وطبعا هذا كله يجي من قلة الثقه بالنفس والشعور بالنقص
اعرفي قيمة نفسك قبل تعرفين قيمة زوجك
صح دلعي زوجك .. البسي له .. اكشخي له .. تميزي عنده
سمعيه كلام حلو
لكن باعتدال وخلي لنفسك قيمه
وجودك في حياته بحد ذاته نعمه من رب العالمين
زي ما وجوده بحياتك نعمه
قال تعالى
( وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً ...
ورحمه)
يعني وجود الزوجه بحياة الرجل بحد ذاته سكن


اجيب لكم مثال
ما تشوفين البضاعه لما تكون جودتها تعبانه ايش يسوون فيها يسوون عليها عروض ويزينونها ويبهرجونها ويمكن يقولون نوصلها لك للبيت لو تبي بعد .. ليش ؟ لأنهم عارفين في داخلهم ان البضاعه بوظيفتها الاصليه غير كافيه
لكن البضاعه الجيده لا يسوون عليها عروض ولا يرززونها ولا يبهرجونها .. هي كذا زي ماهي كلها حلى :)

طبعا هذا مجرد مثال والا المراه تكرم عن انها بضاعه او شي مثل كذا .. لكن هذه النفس البشريه


ببساطه اعرفي قيمة نفسك و50 % من جاذبيتك هي اللي عندك و 50 % من جاذبيتك هي اللي انتي مقتنعه فيها

وفي استبيان في مجله ذكوريه عالميه اسمها men's health
سألوا شريحه كبيره من الرجال من جنسيات واعمار وبيئات مختلفه عن اكثر شي يعجبك بالمراه
80 % منهم قالوا الثقه بالنفس وتقدير الذات

تصدقون كان لنا جار من جنسيه عربيه لما كنا بالخارج وكان دايم يعامل زوجته بقسوه ويتلفظ عليها .. وسمعته مره يقول عنها دي انسانه ماعندهاش كرامه اشتمها واجرحها وامرمطها وتروح تعمل الغسيل .. نفسي ومنى عيني مره ترمي الغسيل في وشي وتزعل وتحس هههههههه ...
طبعا انتو لا ترمون الغسيل في وجيه ازواجكم بس اذا انجرحتي خذي موقف :)

بنكمل ان شاء الله
وأجري على رب العباد