زوجي ضحك علي وبياكل حقي

يابنات بقولكم شي حصل معاي وانظلمت فيه من زوجي وشوركن
ابو زوجي كل مايجي الرياض مراجعات يجلس عندي احيانا يجلس شهرين اعتني فيه واعتبره مثل ابوي
اعطيه ابرة السكر اوكله وزوجي مداوم وطلباته اوامر وهو يفضل يجلس عندي من زمان عكس سلفتي الي بنفس الديره وانتبه له اول باول واترك اهلي ماروح لهم
؛
عطاني مدري ايش يسمونها بكره او ناقه صغيره هو عنده خير وقالي متى مابغيتي تبعينها انا عمك علميني طبعا هو عنده مزاين ابل
ترى مراح احط بيده ريال يقصد زوجي لين تجين واعطيك اياها بيدك
؛
زوجي بعدها بشهرين قال بشتريها منك وقال اعطيك 10 الاف هو يعرف اقيامهن وانا اجهلها ويعرف حلال ابوه
؛
قلت تم وعطاني الفلوس وقفلنا الموضوع وابو زوجي قايلي زوجك لايدري ان لك شي عندي
صار على بيعتها لزوجي سنتين
قبل اسبوع جاني زوجي قال اتصلي ببوي قولي يبيعها وكلمته
؛
امس اتصل ابو زوجي قال انا عمك بعتها لك ب 215 الف وفلوسك والمه انا انقهرت
..
جاء زوجي سويت نفسي زعلانه وقلت انت تستغفلني وتضحك علي ماهقيتها منك انا وثقت فيك
قال تبايعنا والمومنين عند اقوالهم وانا صبرت سنتين عليها المهم بعد شد وجذب قال خلاص بعطيك 50 الف بس قولي لبوي يحولهن وخوذي ال 50 والباقي جيبيه
وابوه ترا مايقصر معاه يعطيه بس عيونه على الي في يدي ايش اسوي مانمت من القهر وهل معاي حق