طموحة جداً

طموحة جداً @tmoh_gda

محررة برونزية

زوجي ضربني لأول مره رغم اني حامل ولسى مامر سنة على زواجي.. اطلب الطلاق؟ساعدوني>>قديم

الأسرة والمجتمع

بنات والله اكتب وانا ارجف من كثر البكاء..
قسما بالله ضايقه فيني الدنيا.. ولاني قادره اكلم احد باللي صار..

قبل كل شي.. انا حامل بالشهر الخامس..
زوجي ماشاء الله مدللني بالمصروف والمشاوير والاغراض.. يعني طلباتي أوامر..
بس بعد اللي صار كرهته وكرهت عيشتي معه..

المهم.. ابقول لكم اللي صار وانتم احكموا..

امس زوجي تنرفز على كلمة تاااافهه قلتها.. ونام بدري..
وانا كنت مشغوله وجلست اكمل كوي وترتيب..
ولما صحيت فكرت اسوي له كشري.. لانه قال لي من مدة انه مشتهي كشري..
وانتم اكيد عارفين انه ياخذ وقت وحووووووسه وقدور..
الله وكيلكم جلست ساعتين ونص اسويه بالمطبخ..

المهم.. جاء زوجي العصر..
شاف حافظ الكشري.. قال هذا جاي من برا؟؟
قلت: لا أنا مسويته.. بس حطيته بحافظ عشان ينكتم ويصير اطعم..
شاف الصوص.. قال: ليش كذا ثقيلة؟
قلت له: لازم صوص الكشري يجي غليظ شوي..
غرفت له كشري.. قال: مسويته بدون لحم ولا دجاج؟؟
قلت له: اساسا الكشري الاصلي مايصير فيه لا لحم ولا دجاج!!
قال: وليه البصل يلمع؟ انتي قاليته يعني؟
قلت: اكيد.. لازم يتحمر بالزيت..
ذاقه اخيرا.. وقال: حلو.. بس مافيه ملح..
قلت له: حط من الصوص..
حط له صوص.. وقال: يوووه مكثره ثوم بالصوص..
انا هنا طفششششت.. ألف ملاحظة بدقيقه..
قلت له: هذا اللي عندي عاجبك كل مو عاجبك لا تاكل.. حسافه تعبي بس!
هنا عصصصصب.. ورمى الملعقة وكب الصحن وقام!!


أنا تنرفزت.. وبكيت بالمطبخ..
تخيلوا اكرف كل هالوقت واخرتها يسوي كذا..
واقسم لكم بالله ان الكشري كان لذيذ ومرتب.. بس هو ينقد قبل يذوق..


المهم.. ما تحملت..
رحت له الغرفة لقيته منسدح..
قلت له: من اليوم ورايح تغدى بدوامك.. كل واحد يدبر نفسه.. وانا ماعندي استعداد اطبخ واتكلف واخرتها ينرمي بالزباله..
وطلعت وتركته..


هنا لحقني وهو معصصصب..
كنت ابفلت منه.. لقيته ساحبني من شعري..
وضربني على ذراعي بقوه.. وجلس يهاوش ويسب ويشتم..
وانا ركضت عالصاله.. وحاولت اغطي بطني ووجهي..
وهو يرفسني مع كتوفي ويهاوش.. ويسحب شعري بقوه..
قسما بالله اول مره يمد يده علي كذا..
انا انجنيت.. ودخلت بحالة بكاء هستيري..
بعمري ما صحت كذا.. قسما بالله اكثر من ساعه وانا اصيح..
وهو دخل الغرفة وانسدح..
لحقته وقلت له: مستحيل اجلس عندك دقيقه بعد اليوم.. ودني لاهلي..
عصب اكثر وقال: قسما بالله ماتطلعين من البيت..
لبست عباتي وقلت: والله ما اجلس لك بعد مامديت يدك..
انت ماتستحي.. منت رجال.. انا اكرهك..
قام وسحبني مره ثانيه من ذراعي ورماني عالكنب وهو يصرخ..
واستمر يسب ويهاوش ويهدد الخ..
وانا تحسبت عليه مع اذان المغرب ودعيت على يده بالكسر..
وجلست ابكي بقوة.. ولقيته قرب يبي يضمني ويبوس راسي..
دفيته.. وقلت بعد.. لا تقرب مني..

بعد ساعه تقريبا..
رجعت وقلت له بهدوووء: يافلان تراني عفتك.. ما ابي اعيش معك.. طلقني..
وهو عصب وقال: بتنثبرين بالبيت غصبا عنك واحسن لك اسكتي..
وقال: اذا طلعتي من البيت اليوم فأنتي طالق بالثلاث..
قلت له: اخر شي اتوقعه منك انك تضربني.. مالي عيشه معك بعد اليوم.. واذا بطلقني احسن..
وطالت السالفة وهو انفعل وجلس يكسر العطور وكسر ابجورة الغرفة..
وشق ملابسه.. وبكى.. وشوي الا جلس يرجف ويصرخ ويقول: يدي..يدي..
قلت: وش فييييك؟
قال: يدي تشنجت.. ماني قادر احركها.. وبكى بقوووه..
انا هنا خفت عليه.. ضميته وقريت عليه ايه الكرسي..
وهو يصيح يقول مو قادر يحركها..
جلست اقرأ عليه.. وانا ارجف واصيح.. اخاف جد يده انشلت..
وجلست على هالحال ساعه تقريبا.. لحد ماهدى.. وقدر يحركها..
يعني الحمدلله.. رجعت يده سليمه..
هنا قمت انا ورحت جلست بالصاله..
وهو بالغرفه.. جلسنا كل واحد لحاله نص ساعه تقريبا..
شوي الا اسمع صوت حركته وهو يلبس.. وجواله دق..
طبعا هو معزوم اليوم عالعشاء..
والصدمة لما لقيته طالع من الغرفة لابس وكاشخ..

وقف يناظري.. وانا مسويه نفسي مشغوله بالجوال..
بعدين ناداني.. قلت له: نعم؟؟
قال: تدرين اني احبك؟
قلت له: لو تحبني مامديت يدك علي..
قال: اوووه ماخلصنا.. اعوذ بالله تحبين النكد.. ابطلع احسن لي..
وفعلا طلع وتركني.. وانا جالسه اضرب اخماس باسداس..


المشكلة الحين..
اني كنت مصره اطلع من البيت حتى يتأدب ومايعيدها..
بس لما شفت حالته وهو يبكي ويرجف ويده متشنجة تعاطفت معه!!
وأخاف ان اللي سواه تمثيليه عشان ينسيني سالفة الطلاق والطلعه من البيت..
وانا ماودي اسكت له حتى ما يتمادى او يكررها..
ولانه جارحني مرررره.. قسما بالله احس اني كارهه نفسي..
ولا ادري كيف اتصرف؟؟
اترك له البيت واروح لاهلي؟؟
والا اكتفي بأني ما اكلمه؟؟
وافكر اليوم انام بالصاله.. مالي نفس انام جنبه..
قسما بالله مدري وش اسوي.. والدنيا مظلمة بوجهي..
ارجوكم ساعدوني برأيكم..
175
108K

هذا الموضوع مغلق.

**هدوء الصمت**
**هدوء الصمت**
الله يكون بعونك
طموحة جداً
طموحة جداً
الله يكون بعونك
الله يكون بعونك
جزاك الله خير
كدووووووووشه
كدووووووووشه
أختي تعوذي من إبليس ماصار شي الحمد لله مشكلتك أهون من غيرك فكري في اللي بطنك من بير بيه بكره لو تفرقتو الله لا يقوله غيرك يواجه مشكلات أصعب من اللي مر بك فكري في اللي في بطنك وحالك النفسين وادعي من الله انه يؤلف مابين قلوبكم لاتكل رين الموضوع هولي هم الرجا جيل ما يملى عيونهم غير التراب وانتي الله يهديك يوم شفتيه معصب ومضايق يمكن من الدوام كان تركيته لين ما تهدا أعصابه ثم كلمتيه����������������
βǾữหτỸ
βǾữหτỸ
شكل زوجك عصبي إلا ناااارو أنتي نرفزتيه بكلامك صراحة ..ما مسك اعصابه و صار اللي صار .. أنا ما أبرر له بس شكل زوجك من النوع اللي اذا عصب ماعاد يدري عن نفسه شوفي حتا العطورات و الابجورات ما سلمت منه ..عموما ازعلي عليه كم يوم و لا تحاكينه خليه كأنه هو و الجدار واحد ..حسسيه ان اللي سواه شي مو بسيط بس لا ترددين طلقني و كرهتك و مدري وش ترا هالنوع لا عاندتيه بيعطيك ما تبين و يمكن ساعتها تحنين و تندمين الله يكون بعونك ..
طموحة جداً
طموحة جداً
أختي تعوذي من إبليس ماصار شي الحمد لله مشكلتك أهون من غيرك فكري في اللي بطنك من بير بيه بكره لو تفرقتو الله لا يقوله غيرك يواجه مشكلات أصعب من اللي مر بك فكري في اللي في بطنك وحالك النفسين وادعي من الله انه يؤلف مابين قلوبكم لاتكل رين الموضوع هولي هم الرجا جيل ما يملى عيونهم غير التراب وانتي الله يهديك يوم شفتيه معصب ومضايق يمكن من الدوام كان تركيته لين ما تهدا أعصابه ثم كلمتيه����������������
أختي تعوذي من إبليس ماصار شي الحمد لله مشكلتك أهون من غيرك فكري في اللي بطنك من بير بيه بكره لو...
والله انا ماودي اهد بيتي بيدي..
خصوصا ان زوجي فيه شغلات كثير حلوه.. لولا موقف اليوم..
واللي قاهرني اني متأكدة من حبه لي.. ما ادري كيف يحبني ويمد يده!!
ودي أربيه ولا اعرف كيف.. وخايفه اسكت ويكررها..
واسمع دايما يقولون اذا الرجال ضرب زوجته يعني الحياه بينهم منتهيه..
والله محتاره..