زوجي غريب/حساس/ كتوم.. لكن هل هو يحبني؟؟ .. ارجو من حكيمات المنتدى الدخول للأهمية..

مساء الخير بنات..
انا لسى مخلصة نفاس..
واللي اعرفه ان الزوج يكون متلهف على زوجته بعد الاربعين..
وانا خلصت الاربعين وزوجي لليوم ما سألني متى بتجين؟!
اليوم يكلمني.. وقلت له: غريبه ما سألتني متى برجع البيت؟
قال لي: ما ابي افرض عليك شي.. انتي متى ما ارتحتي قولي لي اجي اخذك..!

علما بأنه قبل ولادتي..
اخذ اجازة وكان يباشرني بالغداء والعشاء.. ماشاء الله..
وكان يجلس عندي بالمستشفى لحد مايخلص موعد الزيارة..
حتى الممرضات كانوا يقولون لي ان زوجي خايف علي مره..
وبعد ماولدت شرى لي صواني من باتشي وبوكيه ورد ضخم..
بعدين رحت نفاس ببيت اهلي..
وماكان يزورني الا بالاسبوع مره.. لكنه يوميا يكلمني..
وحجته بقلة الزيارة ان المشوار بعيد (حوالي 40 دقيقة)..
حتى امي دايم تسألني: غريبه زوجك زيارته قليله!!!

وفوق هذا.. 90% من مكالماته يسال عن البيبي..
او يتكلم بشغله وامور عامه..
ولا مره قال لي اشتقت لك.. او وحشتيني.. الخ!

علما بأنه جاب لي طقم ذهب هدية بعد اسبوعين من ولادتي..
وكتب عالكارت ان هذا اهداء بسيط لي لاني زوجه صالحه!!!
معقولة يعني مو شايف فيني الا اني زوجة صالحه!!!
بدل مايقول حبيبتي.. غاليتي.. الخ..
قلت يمكن لانه اهداني الهدية قدام اهلي وانحرج يقرأون الكارت..
بس برضو حزت بخاطري.. ولا بينت له..

الشيء الثاني..
هو مسمي البيبي اسم تقليدي..
وانا ما اعترضت ولا شي.. قلت له ابشر وبس..
لكن قلت له كان خاطري باسم خفيف وفخم..
واني المره الجايه انا اللي ابسمي البيبي.. قال يصير خير..
بعدها بكم يوم ارسلت له صورة ولد صديقتي..
قال مين هذا؟؟ .. قلت له هذا قصي ولد فلانه..
قال يع وش هالاسم!
قلت ايه ابوه مو مقتنع فيه.. بس صديقتي اصرت عليه..
تدرون وش قال زوجي؟!!!!
قال: مسكين زوجها متخرفن عندها.. الظاهر ماصدق وحدة تقبل تتزوجه!

انا حز بخاطري جدا تعليقه هذا ولا وضحت له..
وقلت بنفسي.. يعني انا مو ماليه عين زوجي عشان يتخرفن على قوله!
والا هو شايف اني اقل من باقي الحريم عشان سمعت كلامه!


ومن مدة كنت اسولف له عن وحدة من صديقاتي 24 ساعه مسافره..
وان زوجها ماشاء الله مايرد لها طلب.. ودايم تلبس ماركات الخ..
وقال لي: تلقين صديقتك حلوه وزوجها متخرفن عندها.. ومو مصدق انها تزوجته!!


يعني هو نظرته ان الرجال اللي يدلل زوجته ويدلعها.. ماله شخصيه!
وانه متعلق جدا بزوجته.. او ان زوجته ملكة جمال وماكله عقله..
وهالشي يحسسني بالنقص.. يعني انا بعينه اقل من صديقاتي..؟!!!!


علما بأنه دايما يحب هو اللي يتحكم..
يعني هو ماشاء الله كريم معي.. بس يحب هو اللي يحدد متى وكيف..
يعني لو قلت له ابي اشتري شنطه بالمبلغ الفلاني.. يقول بعدين بعدين..
لكن لو اسكت.. القاه من نفسه جايب لي شنطه فخمه..
يعني هو مو بخيل.. ودايما يحاول مايقصر علي شي..
بس بنفس الوقت يحط بباله انه هو اللي يحدد متى وكيف..


بالنسبه للعلاقه الخاصه..
فعااااادي عنده لو نجلس اسبوعين بدون شي..
ومرة تجرأت وسألته عن السبب.. وقال انا مو رجل شهواني!
ويقول ان اخر ما يفكر فيه الجنس..
ويالتني ماسألته.. لانه صار دايما يلمح ان هالشي اكبر همي!!

وانا على كثر ما البس واكشخ.. ما احسه يهتم..
بالعكس.. كل ما اهتميت بنفسي كل ما بعد عني..
لانه يعتقد اني كاشخه اليوم عشان ابي منه شي..
وانا والله مايكون تفكيري كذا..!!!!


واليوم يقول لي تستاهلين سفره بعد النفاس..
وقال لي ابروح معك كم يوم ماليزيا..
قلت له بس انا ما ابي اروح ماليزيا..!
ودي اروح باريس.. لندن.. شي زي كذا..
قال لي لا صعبه هالاماكن يبي لها فيزا..
قلت عادي نأجل السفر شوي.. مارد علي!
برضو يبي هو اللي يتحكم بالسفر والمكان والبرنامج الخ..

ما اخفيكم اني اغار اذا شفت بنات يخططون وازواجهم ينفذون..
وانا زوجي دايما يتعامل معي بطريقه: احمدي ربك ياشيخه!
واحنا لسى ماكملنا سنتين من تزوجنا !!!!


وهو مره تخانقت معه خناقه كبيره من كم شهر..
وقال لي: الحرمه اذا بين لها الرجل حبه دعست عليه...!

ما ودي اطول عليكم بنات..
بس انا صراحة مالي مزاج ارجع بيتي..
سواء سأل او لا.. باختصار.. مالي خلقه..
واحيانا افكر واقول لنفسي: كنت استاهل رجال احسن منه..
واحيانا ارجع وألوم نفسي.. لاني فعلا احبه..
لكن ماني عارفه انا وش موقعي بحياته..
هو نفسه يحاول مايبين لي.. وهالشي يقهرني..
من حقي احس بانوثتي ومعزتي وغلاي.. بالكلام والعواطف الخ..

هو حساس جدا..
ويشيل بخاطره من اشياء تافهه بدون مايبين..
واحيانا اقول الكلمة بنية صافية لكن يفهم غلط!
وعنده تخيل ان اذا سويت شي له فأنا لازم ابي مقابل!
بنفس الوقت: عصبي.. عشان كذا ما اكثر جدل معه..
ولو اناقشه بشي يتنرفز بسرعه.. معي او مع غيري..
فأحاول دايما اكون رايقه وهاديه.. عشان حياتنا تمشي تمام..

وللامانه..
هو حنون ومحترم ومحبوب من اهلي ماشاء الله تبارك الله..
وبنفس الوقت يدقق بكل ردات فعلي..
ويقول لي دايم: انا ما احب احرجك ولا احب اجرحك.. لانك حساسه!
ويقول: انتي لو اقول لك طلعت حبه بوجهك كان تحسستي..!
وانا ما انكر اني حساسه.. بس هو يحب المبالغه..
ومره تهاوشنا وقال لي: اول ماتزوجنا كنت احبك اكثر من حبك لي..
والحين انا صح احبك.. لكن صرتي انتي تحبيني اكثر من حبي لك!


ياليت كل وحدة منكم تتخيل نفسها مكاني..
وتحلل شخصية زوجي..
وجزاكم الله خير..