زوجي فوضوي الى ابعد درجه

انا عضوه قديمه بس مدري ليش أسم عضويتي القديم مو راضي يزبط يمكن صارلي مده وناسيه
المهم
مشكلتي يمكن ماتكون صعبه جدا وتهد النفس بس متعبه
أنا يابنات زوجي فوضوي كانه واحد عمره 3 سنين يجلس بالبيت كانه قاعد بالشارع كل شي يقطه تحته ماعمره شاف زبالتنا الله يكرمكم
من يومياته اول مايدش الله يكرمكم نعاله مايحطها عند باب البيت لا يفسخها عند غرفة الاكل وشنطته حق العمل عند الدرج
وجاكته وبوكه وتلفونه فوق مكتبة التلفزيون ويدش الغرفه وملابسه يحطها على الارض مايبي يتعب ويعلقها ينام على السرير ياكل ككاو او شبس على السرير وينثر، ينام يقوم يسبح المنشفه كالعاده على الارض اذا خلاص شافني معصبه وجانه يزعم محترم يعلقها على باب دولاب الملابس اذا بغى ياخذ ملابس نثر الباقي على الارض ينظف اذنه يقط العود على الكومدينه يتعطرمايتعب ويغطيه ويرجعه مكانه ياخذ الثوب من الدولاب يرمي المعلاق على الارض ويخلي كل الادراج والابواب مفتوحه مايطلع من الغرفه الا وكانه صار فيها انفجار كل شوي يبدل ويقط ويتسبح اقول سمكه انت يقول النظافه من الايمان اقول ياليت اطبق هالشي وماتقط وراك والله يابنات تعبت منه كل يوم على هالحال عيالي عقدتهم وياي صارت الزباله بيدهم اذا بغوا ياكلون شي غير الوجبات عشان على طول قبل لا اشوفهم يرمونه بالزباله، اقول ماراح الم وراه واجي واهاوشه يقول ماعليج انا برجع انظف ويمر الوقت ولايفتكر ويقول اسحي على دمي واشيل شوي وانا بصراحه ما احب اشوف وساخه وفوضى والله يابنات انه اليوم الي مايجي على البيت البيت يصير نظيف بس يرد ترد الازمه والحرب الاهليه والله ولدي عمره سنه وشهرين مايتعبني كثر مايتعبني هالطفل الكبير زوجي انا ما ابيه يساعدني بس على الاقل يلم وراه واللي قلته ترا شي بسيط من الي يسويه
بغيت اقولكم على شغله تضحك هي زوجي اذا مرض احد من عيالي يقول سبحيه وبدليه بيصير اوكي اي مرض كان هذا علاجه مدري متعقد واهله ماكانوا يسبحوه

الحين انا ابيكم تعطوني حل ابيه يحس شوي ويساعدني على نفسه لا على عياله ولا علي تعبت منه صرت ما اقدر اطلع
من البيت من كثر الشغل