زوجي قال لامه مو لازم تنامين عندنا .. ومفكره اني انا محرضته // تم الرد

مساء الخير
بالبدايه انا زوجي رجوله متكسره لانه عمل حادث (الله يشفيه) .. بحكي شوي عن ام زوجي
تكرهني بشكل مو طبيعي (يشهد الله عمري ماسويت شي بس هي ماتحبني عشان امي الله يرحمها) .. ونص مشاكلي مع زوجي بسببها وزياده على كذا مره زوجي تهاوش مع بنتها عشاني وكرهتني زياده تقول اني ساحره ولدها باختصار ماتطيقني لاهي ولابناتها
جات قبل امس عندنا للبيت وتقول ان زوجي وجهه اصفر وواضح انه تعبان واني مو مهتمه فيه وقررت تجي عندنا عشان تهتم بولدها اللي هو زوجي ( زوجي الحمدلله مافيه شي بس شافتنا انا وزوجي متراضين وتبي تسوي مشاكل بيننا انا اعرفها كويس)تبي تجي هي وبنتها عشان يفتنون انا قلت حياكم الله قالت ليه انا غريبه ؟؟ هذا بيت ولدي واجي متى مابغى قلت طيب ياعمتي انا ماقلت شي قلت حياكم الله ماتنقال للاغراب بس عادي .. زوجي كان جالس معانا وساكت ماعلق على اي شي
بعدين هي قامت تتعشى هي وبنتها على طاولة الاكل وانا جلست جمب زوجي بالصاله بعيده شوي عن الطاوله كنت أاكله وكان يسولف علي سوالف عاديه وهي تشوفنا نسولف ومو عاجبها ودها اننا نتهاوش .. قام زوجي وقال لي باقول لها ما يحتاج تنام عندنا لان امي تنقد اذا الخدامه قدمت لها ولا خدمتها تبيك انتي وانتي تعبانه صح (لاني حامل) انا بصراحه تعبانه وتكفيني خدمة زوجي انا اللي احممه والبسه وااكله وهو شايف قلت لا عادي وسكت وهو سكت
يوم جلست امه قال يمه ترا ما يحتاج تنامون انا فلانه ماهي مقصره علي ومابي اتعبك قامت امه تهاوش علي وبصوت عالي تقول خمس دقايق جلست معاك وغيرت رايك .. تطرد امك عشانها وزوجي قال هي مالها دخل انا مابي اتعبك معاي يايمه .. قالت الحق مو عليك انت مسحور منها يا ولدي انا مازعل عليك انا متاكده لو انت بوعيك ماتطرد امك عشان حرمه لاراحت ولا جت .. وراحت لبيتها وهي تتحلطم بهالكلام .. امس كلمتني على جوالي حتى السلام ماقالت قالت اعطيني ولدي يا ساحره يا دجاله
قلت لزوجي انت دايما تسبب لي مشاكل كلم امك ووضح لها انا مو ناقصه تكرهني زياده .. قال ماعليك انا اتصرف بس كذا يسكتني اعرفه .. اهم شي يمشي اللي براسه اللي يزعل يزعل واللي يرضى يرضى تعبت من اسلوبه وهذي مو اول مره يسبب لي مشاكل بسبب هالاسلوب
كيف اتصرف مع امه يابنات انصحوني على هالمشكله .. ومستقبلا علموني كيف تتفادون هالمواقف