زوجي كذب علي بشكله !!

السلام عليكم
اول شي هالمنتدى فادني كثير بشكل ما تتصورون وانا من زمان يمكن سنتين او ثلاث سنين مسجله واتابع واستفيد بصمت .
لكن ما توقعت ابداااا ابدا تكون اول مشاركه لي عن مشكله مقفله الدنيا بوجهي :"( يمكن الفايده الوحيده لي من المشكله انها ساده نفسي عن الاكل من فتره وساعدتني على الدايت .

ابي احاول اختصر لكم ازمتي لان ودي انثر اللي بصدري كله من القهر
،،،،،،،،،،
اول شي انا عمري ١٩ وبيضاء وطويله شوي ومن عايله مرتاحه وبالنسبه لجمالي مملوحه لكن مو لدرجة الابهار او الجمال الملفت ، اللي يميزني ذكيه جدا ومثقفه من صغري وبشهادة الكل ما احب امدح نفسي لكن اقول الصدق
تزوجت بالثانوي تحديدا بثالث ثانوي قبل بداية الدراسه هذيك السنه في الصيف ، يعني تقريبا من سنه وشوي وانا متزوجه
انا متزوجه عن حب لكن من نفس لقب العايله يعني نفس القبيله ، تزوجت قبل سنه لكن نعرف بعض من ٤ سنين من كنت ١٥ سنه وهو كان عمره ٢٤ اكبر مني بتسع سنين
تعرفنا على بعض بواحد من برامج التواصل الاجتماعي والبدايه كانت بنيّه صافيه يعني مجرد تعليقات لبعضنا بعض و رسميه او تعليقات على بعض المدونات او الرسايل العامه سواءا منه او مني وهذا نظامي المتبع اساسا بالبرامج اني ما اتعرف عن طريق الرسائل الخاصه وبعيده كل البعد عن هذا الطريق لكن معه هو ما قدرت اتجاهل اسلوبه وارفض اكمل قصتي معه ، وتطور الامر للخاص وكنت خايفه يكون تفكيره نتقابل وكذا لكن ابدا ما كان يطري الموضوع اساسا وكان منفرد باسلوبه وطريقته يابنات ما ادري شلون اوصف لكم لكن ان الوقت معاه او الايام كل ما تمضي معاه كل ما اصير منجذبه له اكثر ، مرت سنه كامله ما طلب صورتي ابدا لدرجة شكيت فيه ان وراه شي وخاصتا اني انا اطلبه احيانا يرسل صوره له وهو ما يطلبني فمستحيل ما يطلب يشوفني بس بعدها انا فتحت الموضوع وقال عشان ما افهم غلط وافكر انه راعي بنات انا اقتنعت وشافني وكانه شايف ملكة جمال العالم ويمدح وما بقا شي انا قلتله لحظه اروح اتاكد من الصوره اللي ارسلتها لك لان مدحه حسيته كان مبالغ تطور الامر بعدها لمكالمات وكان يساعدني ببعض موادي بالثانوي المهم كان يعني مره ميت فيني خصوصا من يوم شافني بالصور
انا طبعا كنت شايفته من بدري وكان عموما جميل جدا لكن ابدا ما همني لان الشكل مو من اهتماماتي ابدا ، و لكن كنت افكر وقتها انو كيف بتصرف لو شفت بنات حوله لاني معروفه غيرتي تهد جبال
استمرينا لاخر سنه لي بالثانوي وقرر يجي يخطبني ما كنت مصدقه اني بعيش قصة حب تنتهي بزواج عكس اللي نسمعه دايم
هو اخته قريبه منه جدا وما يخبي شي عليهاا وعرفني عليها قبل الزواج وانا عندي بنت عمتي قريبه لي مره واعلمها بكل شي
اتفقنا انو يجي يتقدملي على اساس ان اخته صديقة بنت عمي وان بنت عمي هي اللي دلتهم علي ، وصار هالشي وانا للحين مبسوطه ومو مستوعبه اني بتزوج شخص عشت معه قصة حب
حددنا يوم الزواج بالصيف وقت الاجازه وكانت مسهله الامور لان حنا بنفس المنطقه كلنا وما دخل عندي بقاعة الزواج ولا حتى يصور معاي ، انتظرني بالسياره عند الباب ووصلنا اخوه وابوه للفندق وهنا جات صدمة عمري
صار شي ما كان على بالي ابدا يا بناااات ولاواحد بالميه
انا ما كنت لابسه كعب طويل ٥ سم بس
يوم وصلنا للغرفه وصرنا لوحدنا بديت اركز واشوف زين قبلها كنت مرتبكة شوي عشان اهله معنا ومنزله راسي اغلب الطريق عند الغرفه طلع شكله غير الصور اللي يوريني اياها ، طلع يكذب علي ٤ سنين وانا ابدا ما توقعت انه بس يكذب علي في اي شي فما بالكم بموضوع زي كذا !!
كذب علي باشياء كثير فيه كان يرسل صور له يعدلها لكن معدلها بشكل تتغير الملامح ، يعني هو نفسه بالصور بس مرررررره معدله ومتغير بالواقع ، انا قلت ما همني الشكل ولا حتى فكرت بشوفه شرعيه ولا طلبت اهلي اشوفه ولو طلع شين كان عادي بس هو طلع قبيح لدرجة النرفزه اللي ودي
في الصور مصغر خشمه وبالصدق خشمه كبير ، وبالصور سماره خفيف وبالصدق غامق
والطامه الكبرى طوله كان يقول ١٧٠ وانا ١٧٢ وكنت اقول فرق ٢ عادي وبالصدق يوم كنت لابسه كعب يا بنات مو لايق مره غصبن علي انحرج حتى لوحدنا ، وتوقعت اذا فصخت الكعب نصير نطول بعض لكن طلع اقصر ومو نفس كلامه
انا ما بي اخرب فرحة اهلي واكبر الامر وقتها ، لكن ما قدرت اسكت يوم صرنا بغرفة الفندق اول ما شفته قعدت احقق معه ليش يسوي كذا وكانت اخيس ليله مرت علي لدرجة بغيت اسوي مصيبه فيه هذاك اليوم .
بعد ما قعدت اساله معه علمني بكل الكلام اللي قلته فوق انه كان يعدل الصور وانه يكذب بشكله ويشوف انه شي عادي انه يعدل ، قال بس الطول اللي كذب علي فيه وطلع طوله ١٦٦ ، خلاني مصدومه اكثر انه شايف الموضوع بسيط مع اني علمته مره ما يهمني شي بالشكل عموما غير الطول لازم ١٧٠
انا يا بنات الله يسعدكم ادري انها خلقة الله وما اقدر اعترض لكن انا قصتي تعور القلب لاني ما زلت احبه ولا قدرت اطلب الطلاق واكبر الموضوع وعلى اساس اني بتقبله اذا عشت معه وبتعود ، و لان كنت وما زلت متعلقه بهذاك اللي كنت اتناقش معه بالبرامج ونقضي الليالي مع بعض كانها ساعات
لكن بنفس الوقت فيه ثلاث حاجات رافضين يطلعون من صدري حتى بعد هالسنه اللي عشتهم معاه
اول شعور اني احس انه انلعب علي يعني هو خلاني اتزوجه بدون ما اشوف قبحه قبل وحتى ما يعترف يقول اهم شي انه انا ، فكل ما اشوفه يجيني شعور انه ملعوب علي حتى لو يحبني
ثاني شعور ان اللي كنت احبه وميته على اسلوبه ومنطوقه شخص خيالي انتهى ومات من بعد ما شفته اول مره بالفندق كذا احس بكتمه بصدري خاصه من هالشعور ، هو نفس الاسلوب معي الحين ونفس ثقافته لكن مو قادره اركب هالاشياء الحلوه على شكله الشين ابدا ما قدرت مااا قدرت حاولت
ثالث شعور اني كارهه تعليقات الناس بعد ما شافوه اغلب جماعتي وصوره خاصتا صديقاتي القريبات كلهم يقولون شلون صابره من غير انه كذب بعد ، حتى اذا حاولت اتقرب منه غصب علي يجيني احساس انه ولد صغير مو رجال عليه وياليت لو انه سمين شوي الا نحيف ، ومن بنات جماعتنا تعليقات تجرررررحني بقوه مره يقولون كانهم رقم ١٠ ويقولون وش ناقصك انتي عشان تاخذين خال وهو مو خال بس عشان خشمه مثلهم وعشان لونه قريب منهم
كرهت حياتي معه بعد ما كنت اتمناه لحد الموت وما احس بانوثتي معه ومن قوة الصدمه الا اني ما قدرت اكبر الموضوع بداية الزواج وقلت بقعد واحاول اتاقلم ، لكن للاسف حبي تدريجيا صاير ينقلب كره له وماصرت اشوفه بعين الحب الاعمى صرت اشوفه بعين الواقع بكل قبحه وقزامته وهو يحاول يستغبي كل ما حاولت ابين له اني للحين ما قدرت امشي اللي صار وكم من مره ادقه بالكلام انه بشع وقزم بس متمسك فيني ومقهوره للحين انه كذب علي بشكله ، لو كان مقبول او حتى شين شوي عادي لكن يكذب ومو حلو !!

انا اقدر اطلبه الطلاق ومن معرفتي فيه ما راح يقول لا لو اصريت وجزمت بس قلت اكتب لكم هنا يمكن وحده عندها منفذ مو واضح لي من هالمشكله






الله يسعدكم