زوجي كرهت الحياه بسببة وصرت معقده

السلام عليكم
كيفكم يا احلى خوات 
بدخل بالموضوع ،،انا ترددت بالبدايه وكنت كل يوم ودي اكتب الموضوع بس اتردد واليوم حسيت اني بنفجر قلت خلاص بفضفض لان مافية احد يدري عن مشاكلي حتى اهلي مايدرون عنها. 
انا تزوجت واحد مو من قبيلتي ولي الان سنتين ونص وعندي ولد الله يخليه لي 
المشكلة هي بزوجي مو مرتاحة معه بالمره من اول ماتزوجته وانا ضايق صدري من اسلوبة وتصرفاته وانا بشهر العسل مانبسطت كنت كل يوم ابكي على مخدتي مو هذا الشخص اللي حلمت فيه ولا صفة وحده من الصفات اللي اتمناها لقيتها فية بقول لكم صفاته وانتو بتعذروني
اول حاجة معقد بقووة كل مانطلع يراقبني ويقول لي غطي عيونك وحطي عباتك على راسك واذا شاف عبايتي تلزق علي من الهوا قال البسي ثقيل تحت عباتك كل مشكلته بهالعباه كرهت الطلعات بسبته واذا رحنا لمحل وجينا عند المحاسب يقول اطلعي عند الباب الين اخلص او اذا صار يكلم البائع يقول لي خليك وراي ومايخليني اسال هذا بكم 
ثاني حاجه فية وسواس لو ادخل دوره المياه واخذ عشر دقايق يطق علي وماخليني اقفل باب الغرفه ويخاف من الامراض ماياكل اي شي اذا فيه حاجه بتنتهي بعد يومين يحذفها على طول ويكره شي اسمه مكيف انا من النوع اللي اعرق بسرعه ماحب الحر ولا انام الا وانا مشغله المكيف اول ماتزوجني كنت انام واحنا مشغلين المكيف واصحى الاقيه مقفله والجو حار قوه وهو ولا همه عادي بعدين سالته ليش تقفله قال انا جسمي يبردبسرعه تخيلو لو ينام الظهر بعز الصيف بدون مكيف عااااادي عنده وانا اخيس من الحر ومتحمله عشانه كل يوم هواش على هالمكيف تخيلو اول ماتزوجت كانت غرفة النوم كبيره وفيهامكيف شباك ومايبرد خربان واقول له صلحة او اشتر لنا جديد يقول لا خلينا ننام كذا احسن وربي طفششت وصرت انام بالارض قدامه وانزله علي عشان يجيني هوا لو خفيف واقوم معرقه وحالتي حاله وللحين مشكلة المكيف معقدتني ودايما هواش والحين بزياده عشان ولدي يقول خايف عليه من المكيف تصدقون انا الحين جالسة بالصاله انا وولدي عشان المكيف ودي انام بس الغرفه حاره وهو نايم فيها ولا على باله
ثالث حاجة فيه بخل ماعمري شفته باحد تصدقون ماعمره عطاني فلوس ولا ريال من يوم تزوجته وكنت اقول لهليش ماتعطيني دايما بوكي فاضي واذا رحت لاهلي اتفشل منهم يطلبون ويشترون وانا اشوف واتحسر ، قبل لما كنت عند اهلي بوكي دايما مليان ومصروفي يمشي لي كل شهر 500 ابوي مو مقصر معي بشي بس لما تزوجت شفت الفقر بوكي دايما فاضي احيانا اضحك على نفسي اقول ليش حاطته بالشنطه واذا قلت له عطني فلوس يقول وش تبغين فيها اي شي تبينه انا اجيبه لك او اروح انا وياك للمحل وتاخذينه اما اني اعطيك فلوس بيدك انسي تصدقون مو شي يقهر والمطبخ يمر شهرين ماقضينا له واذا رحت معاه لسوبرماركت يقول لاتشترين الا الظروري الدريم ويب والخفايف هذي مايخليني اخذها واذا جيت بحطها بالعربيه ياخذها مني ويرجعها قسم بالله اطلع وانا فيني غصه احسه يتمنن علي حتى الاكل والحين اطلب منه يجيب سرير لولده لاني انام انا وياه احيانا بالارض واحيانا ننام على السرير وهو ينام بالارض بس مو راضي يجيب له سرير انا من شفته كذا قلت بدور لي شغله اصرف على نفسي منها وكملت دراستي وصرت اصرف على نفسي من المكافاه وازعجني فيها كل ماقلت له ابي شي قال اصبري لين تنزل المكافاه
اذا رحت لاهلي ودي ادخل عليهم بحاجه حلوة حلا او فطاير يقول مو لازم  مره برمضان عزمونا اهلي وقلت له بروح بدري عشان اساعد البنات ورفض مارحنا الا قبل الاذان بنص ساعه وقلت له بنمر محل فطاير ناخذ معنا شي قال ماله داعي اهلك مو جوعانين طيب انا ادري انهم مو جوعانين وشايفين خير اكثر منك بس مابي ادخلويدي فاضيه فشله ، ماعمري رحت لهم ومعي شي عكس خواتي ماويجون الا ومعاهم شي 
لما حملت بولدي كنت بنفس عند اهلي قلت له اشتر لي سرير قال فية سرير بمستودع اهلي حق خواتي اذا نفسو بجيبه لك ورفضت قال تبينه ولا مو جايب لك قلت خلاص لاتجيب مابي لك شي كنت لما اروح اجهز للبيبي يجن جنونه مايبي يدفع اخر شي طلبت لي مفرش لنفاسي ورفض وجلست شهر اترجاة ورحنا للسوق ونفسة خايسة ومعصب وكنت ابكي وانا بالسياره وسرير ولدي جابه بعد خناقات يقول حطية بالارض مو لازم سرير
ولما ولدت ماعطاني مصروف يقول اصرفي على نفسك من اللي يعطونك الحريم وجبت شغاله اسبوع لاني تعبانه وزعل يقول مايحتاج امك تخدمك وامي تعبانه ينهد حيلها من اي شغله فيها سكر وضغط والكلى عندها تعبانه ماتقدر تشتغل واغراض البيبي اخواني يجيبونها هو ماجاب لي الا يمكن مره ولا ثنتين واذا احتجت اروح مكان او المستشفى قال خلي اخوانك يودونك واخواني مايقصرون مايرفضون لي طلب بس استحيت من كثر ماطلب منهم ومره خلص حليب ولدي وقلت له يجيب قال خلي اخوك يجيب لك انا انقهرت قلت بنفسي والله مايجيبه الا انت وازعجه باتصالاتي وعصب ويجيب له حليب ويجلس يسب باخواني يقول مافيهم خير المهم لما جبت الشغاله رفض يدفع وجمعت فلوس وجبتها اسبوع لين حسيت اني تعافيت وبديت اشتغل بنفسي مع ان خواتي الصغار يساعدوني ببعض الاشياء بس انا ماحب اثقل عليهم بالشغل ايه نسيت اقول لكم ان سرير نفاسي جابته لي امي حست انه مايبي يجيب لي فشلني بحركاته قدام اهلي دايما احاول اغطي على عيوبه وامدحه قدامهم بس ماينفع تدرون مطبخي نص دولاب ورافض يكمله كل من شافه قال ليش مطبخك كذا وانتي شقتك ملك واقول لهم بالعكس عاجبني وانا من داخلي مقهوره وفيه حاجات ناقصة بالبيت من تزوجنا وانا اطلبه ورافض يجيبها
وحاجه ثانيه شخصيته ضعيفة خواته يهزؤنه قدامي وامه تهاوشة ولا يقول شي وعندي مسوي نفسه شخصيه ويتحكم سوي كذا ولا تسوين كذا واذا قلت له بروح لخواتي يرفض يقول خواتك تشوفينهن عند اهلك اما انك تروحين لهن لا مافيه طلعات لا صديقات ولا خوات بس اهلي يوديني لهم وماطول اكثر شي 3 ايام
ولاسفرني الا مرتين مره بشهر البصل وسفره تضيق الصدر مانبسطت فيها 5 ايام ورجعنا
والسفره الثانيه تسلطت علينا امه كل يوم تدق تقول ارجعو  ماطولنا ورجعنا على طول عشانها طبعا امه سالفه ثانيه متسلطة وتتدخل بحياتنا وتنتقد ومالي خصوصيه كل شي عندهم وطلعاتي ودخلاتي مع بابهم وتحرضه علي وهو يسمع كلامها
للمعلوميه زوجي عاطل ماعنده وظيفة ويشتغل حر بس مدخولنا مايسوى شي
هذي كل مشكلتي وابيكم تنصحوني لاني مالي غيركم بعد الله