زوجي كلامه سم ويجرحني

السلام عليكم بنات
حبيت افضفض قلبي مجروح ومهمومه والله يشهد علي
متزوجه من ٩ سنوات زواج تقليدي
زوجي لسانه طويل كثير الغلط خصوصًا اذا عصب يرمي كلام يسم البدن ماعمري سمعته ف بيت اهلي 💔💔وللحين ماقدرت اتاقلم على هذا الطبع
طبعا اغلب اوقاته معصب ويخليني شمّاعة اخطاءه اي شي يصير يحملني مسؤوليته حتى لو ما لي دخل في الموضوع
غير جذي اذا ماكان معصب ينتقد… اغلب الاوقات ينتقد تصرفاتي؛ طريقة تعاملي؛ تفكيري؛ وظيفتي الخ
مع العلم الحمدلله انا موظفه في مكان جيد وشهادتي جيده جدا ولله الحمد
بس من كثر انتقاده احس ثقتي انهزت
ما يفرح لي اذا صار لي شي طيب بالشغل
احسه يغار احيانا كثيره
صرت ما اتكلم معاه عن شغلي ولا عن اموري الخاصه عشان اتجنب الخلاف
صار يتصيد اي موقف اي شي ينتقدني عليه
تخيلوا بنات يعايرني بمرض لان من ٣ سنوات تعبت واحتجت اسوي عمليه ولليوم يعايرني بالموضوع كأني انا اخترت يصير لي جذي ويقول انتي تعبتيني و الشباب كلهم تزوجوا ومحد يعاني كثري !!
كل حياته مقارنات .. مع العلم اني ابدا مو مقصره بالبيت ولا معاه بس من كثر انتقاده وكلامه السم صرت اتحاشاه واحاول اخلي علاقتي سطحيه معاه وبعد مافي فايده !!!
يقارني بأي حد في الحياه وان الكل احسن مني وانا كأني ما اسوي اي شي زين له او للبيت !!
يشوفني مقصره على طول حتى في تربية الاطفال
قلت له مره انا تعبت ماقدر اشتغل وارجع البيت اجابل العيال افكر استقيل .. طبعا تجنن لانه مو قادر يصرف ع البيت
الحياه غاليه انا ما الومه لكن انا طول يومي بين شغل ومسؤولية عيال وبيت اذا ماعندك كلام زين تقوله لا تقول لي كلام يضيق خاطري
والله العظيم يا بنات اني من عايله طيبه ومعروفه في مجتمعنا وابوي له قدره وتربيت على الاحترام
زوجي لسانه بذيء ويتعمر يحتقرني او يستصغر مني ومن اهلي ! طيب مو فاهمه ليش خطبني وتزوجني !! مع العلم ابوي بالبدايه ماوافق عليه لكنهم اصروا بحكم انهم شايفيني في مناسبه وامه واخته قالوله عني
انا الحمدلله جميله وهذا من فضل ربي .. زوجي بالبدايه كان طاير وفرحان عقب سنه او سنتين بدا يتغير وينتقدني وينتقد شكلي !!!من قريب صار موقف بالمستشفى كنت متنومه بالمستشفى مع ولدي وزوجي جاي وعلى وقتها جت الممرضه تقيس لولدي حرارته وقالت لي انتي جميله وايد زوجي تغير وجهه وتضايق
انا حاولت اعدي الموضوع عشان لا يقلبها علي وينتقدني
وهذا اللي صار .. بعد ساعه قام يدور اي سبب ينتقدني عليه ويجرحني
اغلب الاوقات اسكت وما ارد …. ماتربيت اني ارادد لكن اشوفه صار يتمادى
بنات والله العظيم انا كنت اتمنى اتزوج واحد محترم وكلامه موزون وسبحان الله تزوجت انسان لسانه بذيء ومايحسب حساب الكلمه
مع العلم هو مع امه وخواته ( دجاجه) سامحوني على هذي الكلمه
لكن اخته تبهدله وهو ساكت
ويطلع حرته عندي وفي عيالي
تعبت من الاهانات
ورحت بيت اهلي وصار طلاق مرتين خلال هذي السنوات
لكن ارجع بسبب عيالي
اول شي يسويه بعد الطلاق يبهدلني مع العيال
ويهدد بياخذهم
قانونيًا له حق يطالب فيهم اذا البنت صار عمرها ١٣ والولد ١١ ( يخيرونهم بين الام والاب) طبعا ما اقولكم خلال فترة الطلاق شو يصير !!! اهله يصيرون مافي احسن منهم مع العيال ويغرونهم بالالعاب والحلويات والسهر !! وكل ممنوع مرغوب !!! ويرجعون لي منقلبين ومزاجهم متغير ما يبون ينامون بدري وطول الوقت حلويات
عشت اشهر في معاناه بين محاكم وامور كثيره وللاسف القانون غالبًا مع الرجل حتى في الحضانه💔💔احس اني ضايعه يا بنات
هز ثقتي ف نفسي
ماخلاني اكمل دراستي
ينتقدني طول الوقت
اذا جاب غرض للبيت يعايرني وينفخ نفسه كانه شاري العالم لي
مسؤولية البيت اغلبها علي
وللعلم للحين ساكنين بايجار وانا ادفع النص معاه
ومع ذلك لا حمدا ولا شكورا

ادعولي 💔
احس بضيقه لايعلم فيها الا ربي