زوجي كم انا فخوره بك

نور عيني جنان • 15 سنة

ام رغد الاموره :

لا يمكنك مشاهدة هذا التعليق لانتهاكه شروط الاستخدام.

لا عادي الموضوع للحوار يالغاليه

بس شكلك حامله كثير على :arb:

مين قال ما حد عنده مشاكل ما في بيت ما تمر عليه المشاكل
<<وهي بالاصل ملح الحياة على ما يقولو

ولكن الحكمة بالتصرف مع هالمشاكل عشان ما تزيد وما تصير عاده
بيش نسمح لها بوجودها

اذا انتي تعرفي زوجك اعرفي تتصرفي معه اذا مو عشانه عشانك لانو نار وقاز ما يجتمعو

الموضوع ما ينحل بسطور ولا بأسبوع كل شي يبيله صبر
فما بالك تبين تغيري بتصرفات انسان معك <<<ما قلنا طبع لانو صاحب الطبع ما يتخلى عن طبعه
لكن يتنازل عنه في بعض الاحيان

معليش سؤال ....هل حاولتي اصلاح المشاكل ...اذا كان الحكم من بيتك ...
هل استمعتي الى محاضرات اصلاح الذات ...اصلاح المشاكل الزوجيه وغيرها
هل ثقفتي عمرك بكتب ومقالات؟؟؟؟؟

واذا كان حكمك بشكل عام؟؟؟
فأعذريني على التطفل يالغلا....:)

ا

عروس الشام • 15 سنة

نفسي أرد على كل وحدة بس صعب
الصبح كتبت رد طويل و طار مثل العادة :(

أول شي فكرة دفء الليل بالنسبة للدفتر مطبقتها من زمان و يمكن سبب تطبيقي مختلف عنكم شوي
أنا طبقتها لأني تعلمت من بداية حياتي إن ما أحكي لأي أحد خصوصيات بيتي و لو كانت أمي أو أختي
حياتي مع زوجي خط أحمر, ما حدا بيعرف عنها غير أنا و هو و بس
لأني مرة وحدة ببداية حياتي الزوجية دخلت أهلي بالموضوع.. و الموضوع كبر بطريقة مو طبيعية و أهلي زعلوا من زوجي.. بس أنا و زوجي تصالحنا, و نسينا.. بينما أهلي ما نسيوا المشكلة يلي صارت

فتعلمت إنك ممكن تغفري لزوجك أي شي إذا إعتذر و عاملك بحب.. بس أهلك مستحيل ينسوا إنه ضايق بنتهم.. فليش أكبر المشاكل؟
محتاجة أفضفض, خلص عندي دفتري حبيب قلبي, بكتب فيه كل شي مدايقتي و برتاح.. أو بضم ابني و برتاح.. و خلص

بعمرك لا تدخلي مخلوق بينك و بين زوجك.. مهما كبرت المشكلة.. مصيرها تصغر دامها بينكم.. أول ما تطلع برى, حتكبر و ما تنلم
خصوصاً لو كان الرجل ناوي يصالحك و شاف كل الناس صارت عارفة, بتعز عليه نفسه قدامهم و بيكابر و بتتخربط أموركم

و أبداً أبداً أبداً لا تفكري تروحي بيت أهلك وتزعلي
البعيد عن العين بعيد عن القلب
مجرد خروجك من البيت يقضي على كل فرص المصالحة.. بالعكس خليكي جنبه و نامي على السرير جنبه, و لحاله بيحس بغلطه و لو بعدين.. المهم إنك ما تتركيه أبداً..
خلي هدفك الأوحد هو تفادي الطلاق بأي طريقة
لأن الطلاق فشل.. و هذه هي الحقيقة.. الطلاق معناه إنك فشلتي في إيجاد الحلول.. بس لما تكون أساساً ما تعبتي نفسك في إيجاد حل و قضيتها بكاء و مشاكل و ترك البيت و شكاوي لأهلك و أهله.. معناها إنتي من الأساس ما كان بيتك و حياتك غاليين عليكي لحتى تدوري حل منطقي و تصبري و تتعبي لتوصلي للحل

حتقولوا كلام نظري و يلي بيقول هالكلام عايش ببرج عاجي..
بالعكس.. أنا ما بدي إحكي عن أشيائي الخاصة.. بس صدقوني تعرضت لأشياء صدمتني و لضغوط كبيرة لدرجة إني أيام أصحى بالليل مو قادرة أتنفس و حاسة قلبي حيوقف من كتر المشاكل.. و مو مشاكل بسيطة أبداً.. يعني كنت أقرأ بالحياة الأسرية بنات كاتبين مشاكل أصغر من مشاكلي مع زوجي و لاقيهم ناويين على الطلاق و إزعل عليهم
بس الحمدلله كنت دائماً أقول بيني و بين نفسي "يا رب ألهمني الصبر" و أتذكر دائماً (إنما يوفى الصابرون أجرهم بغير حساب)
و قرأت و ثقفت نفسي و حاولت غير من اسلوبي مع زوجي
و قربت منه و طلبت منه أكون صديقته يلي يتكلم معها و يفضفض لها.. و شوي شوي جريت رجله و خليته يعترف بأشياء كنت عارفتها لوحدي بس ما بدي واجهه فيها.. و لما اعترف فيها حس بتأنيب الضمير و صالحني.. بينما لو كنت أنا يلي واجهته يمكن كان كابر و طنشني
بس الحمدلله مضت هديك الفترة على خير و خلصنا من هالهم

و تعلمت إنه حركات بسيطة خلال اليوم بتخليكي أقرب لزوجك و بتخليه يحس بالراحة معك.. مثلاً, الصبح قبل لا يطلع الدوام عانقيه عند الباب بقوة كأنك بتفقدي شي غالي.. حسسيه إنك حتشتاقي له بغيابه.. و إنتي عم تسكري الباب وراه إدعي له بصوت عالي (الله يوفقك, الله يحميك, الله يبعد عنك أولاد الحرام, الله يرزقك) سمعيه إنك بتحبيه و بتحبيله الخير

بس يرجع من الشغل و جايب معه أغراض للبيت ابتسمي في وجهه.. و الله الابتسامة في وجه أخيك صدقة و ما بتكلف فلس.. ابتسمي و خليكي بشوشة ما بتخسري شي
و قولي له (الله يعوض عليك, الله لا يحرمني منك, الله يخليلي ياك دائماً تاج راسي)
لا تناديه غير بحبيبي و حياتي و روحي.. خلي إسمه المجرد لوقت الزعل.. خليه يعرف بس تزعلي إنك زعلانة لأنك صرتي تناديه باسمه من دون أي دلع

قبل النوم ضروري تقولي له تصبح على خير و بوسة قبل النوم.. لا تخليه يروح ينام و إنتي مشغولة بين الأولاد و بين الكمبيوتر و التلفزيون.. روحي على الغرفة و بوسيه على خده و قولي له تصبح على خير.. و إسأليه لو محتاج شي

أمور بسيطة جداً.. ما بتاخد لا من وقتك و لا من تعبك.. بس بتبني المحبة بينكم شوي شوي.. لا تعامليه كأنه واحد من إخوانك, لأنه بيصير بعدين واحد من إخوانك ..

و فكرة أم محمد روعة.. أنا كنت أرسل له ecards على ايميله و هو بالشغل و ينبسط فيهم كتير.. خصوصاً إني ما بعتمد على نص موجود.. بكتب أشياء طالعة من قلبي مباشرة.. فبتوصل لقلبه مباشرة..
كل فترة و فترة بغير اسمي عنده بالموبايل على حسب حالتي النفسية.. و بلاقيه عم يتصل فيني و هو عم يضحك.. مثلاً هلأ كاتبة إسمي عنده (الأميرة المتوجة على عرش قلبك)
اتصل فيني فرطان من الضحك.. قالي إيمتى غيرتي اسمك عندي.. وعجبه كتير
و بس كون زعلانة من موضوع معين, كمان بغير اسمي

و خلي دائماً على لسانك كلمة (الله يسامحك)
قد ما غلط بحقك, ولو شو ما قال.. بس قولي الله يسامحك.. قوليها بقوة طبعاً مو باستكانة و انهزام.. بس حسسيه إنك أحسن منه, هو بيغلط فيكي و إنتي عم تطلبي من رب العالمين يسامحه
و أنا دائماً بقول لزوجي, أنا ما بيطاوعني قلبي إنك تتعذب ثانية بالنار لأني زعلت منك بيوم من الأيام.. كل يوم قبل ما نام بسامحك على كل شي و بطلب من رب العالمين يسامحك كمان ويجمعنا بالجنة

الله يوفق الجميع.. و خلينا هيك عم نستفيد من بعض كتير حلو :)
كتاب الذكاء العاطفي ناوية جيبه ان شاء الله
كمان أنا تحمست له

Em zaid • 15 سنة

نور طرح رائع وموفق ومشاركت الاخوات اثرت الموضوع بارك الله فيكم

وحبيت ارد على الاخت ام رغد الامورة الله يخليلك ياها
اختي بالعكس ما انزعجنا من مشاركتك وسعيدين بتواصلك الاخوات في الموضوع
ما ذكروا انه ازواجهم ملائكة ومنزهين لكن كل اخت ذكرت طريقة جربتها واستفادت منها
للتعامل مع مشاكلها والتخفيف من التوتر المصاحب للمشاكل ز

كل بيت ما بيخلى لكن كل وحدة الها اسلوبها في امتصاص شحنة الغضب والزعل في البيت
يا اما بتتصرف بحكمة وبتمتص الغضب يا اما بتضرب البيت كله وبتكهرب :)

والبنات بيختلفوا في منهم الها سنين متزوجة وصارت فاهمة طباع زوجها وفي منها حديثة
عهد وببداية حياتهم وهي اصعب فترة اول 3- 5 سنوات زواج بعدها الامور بتهدا وبتصير
الطرفين فاهمين بعض اكتر هو بمرقلها وهي بتمرقله

عن نفسي وقت الزعل بضل ساكتة وما بجاوب ومن الطرق الي بتبعها حتى اخفف عن نفسي
بقوم باخد شور وبلبس مرتب وبزبط حالي بحس نفسيتي اختلفت وتحسنت كتيييير >>> وحدة رايقة
ومرات ما بنسى ووقت يوم تكون زعلة وفي صالحي بطلع كل الي في نفسي ومدايقني

وبشد على كلام بطة بتشغيل سورة البقرة انا بشغلها تقريبا كل يوم والله انه مفعولها عجيييييييب
ولا تنسي الدعاء والالحاح فيه ان يديم الله المحبة و المودة والاحترام بينك وبين زوجك وذريتكم ما احياكم

وفقكم الله

om jena • 15 سنة

طبعا الموضوع مفيد ورائع وعندي حكي كتير فيه بس مو شاطرة بالتعبير
المهم انا كنت دايما افكر انو بس انا الي بمر بهيك مواقف بس لما قرات البنات شو كاتبين ارتحت انو عادي ممكن يصير سؤ الفهم والمواقف مع اي حد..بس انا عندي مشكلة اني ما بحكي اول باول بخبي بعرف انو غلط كتير بس صرت بحاول اني اصراحو اول باول علقد مابقدر لقيتو متفهم عادي بس عندي سؤال ياريت الي بقدر يجاوبني
ازا اكتشفت بموقف معين او زوجك كزب عليك بنقطة معينة وانت عارفة ومتاكدة انو عم بكزب شو بتعملي بتعديها؟بس يمكن تضل بقلبك
او تصارحيه؟يمكن تحرجيه...طيب شو؟؟؟؟؟؟؟؟؟؟؟؟؟

&لمسة حنان& • 15 سنة

ام رغد الاموره :

لا يمكنك مشاهدة هذا التعليق لانتهاكه شروط الاستخدام.

والله الموضوع جداً رائع

شوفوا هذا الرابط ان شاء الله يفيدكم

بعنوان

انظري اين انتي منه فأنما هو جنتك ونارك

http://forum.hawaaworld.com/showthread.php?t=1786045

هذا الموضوع بمجهودي الخاص

وان شاء الله لي رجعه لكم