زوجي ماينام معي وأحسها اهانه لي

السلام عليكم
الموضوع باين من عنوانه وصار لنا على هالحال اكثر من سنه
كنا في أمان الله وعشان ولدي الصغير يبكي احيان بالليل ومره زوجي اشتكى منه وامه جالسه ومسكت هذا الممسك وكل يوم تقول له نام برا عشان مايسهرك النونو وتتأخر عن دوامك
زنت على راسه لين طلع برا الغرفه
حسبي الله ونعم الوكيل
أم تبني حياة ولدها وأم تهدم
المهم هو جاز له الوضع وانا حاولت فيه كذا مره بس كان يرفض ويقول بعدين وخلي الولد يكبر شوي عشان مايزعجني ولما تجي الخميس والجمعه يسهر بالصاله والولد ينام واذا جيت ابنام اقول يلا مابتجي يقول لا بنام بالغرفه الثانيه اقول له هذا الولد نايم يقول اخاف يصحى ... طيب انت ماوراك دوام
حاولت كذا مره لين حسيت اني ذليت نفسي اخر شي شلت ملابسه من دولابنا وحطيتها بالغرفه اللي ينام فيها وقلت له انت كذا ريحتني وانا بنام مع ولدي حبيبي
ومافاد فيه شي ومن وقاحته بعد مامرت شهور يقول لي انتي حتى مافكرتي تقولين لي ارجع للغرفه قلت له انا حاولت فيك كثير بس انت ماتبي وخلاص اللي مايبيني ما ابيه
تبي ترجع الغرفه الله يحييك واذا ماتبي براحتك
اللي يقهرني ويجيب أجلي انه يجي ياخذ حقه الشرعي ويطلع ويخليني لحالي وينام بالغرفه الثانيه
وربي احسها اهااانه بس وش اسوي منعته كثير بس حرام
طبعا قريت معاناه كثير حريم يشتكون من هالشي والله أعلم ايش المشكله هل الرجال فعلا يرتاح اذا بعد عن زوجته ! او هي نفس احد بالغرفه يوم شافها !
وضحت له انه بعدنا عن بعض مو زين مافي ألفه ولا سكينه ولا موده و و و قال عادي اصلا احنا دايم بيننا مشاكل
ايش الحل مع هالاشكال
لا تقولون لي تقريي له واشرحي له اللي بخاطرك لأني مابي اذل نفسي له لأنه يعلق ويقول جيتيني تترجيني ويعاير
هل اطنشه وامشي حياتي ! ووضعنا اللي كله مشاكل !