زوجي ما يحب يجلس معاي

بنات بقولكم سالفتي
انا انسانه مرحه واحب السوالف والمرح و اجتماعيه والناس يحبوني ومو مدحا بنفسي بس لما آكون في المجلس كل الأنظار علي والكل يسولف وموجه كلامه لي يعني باختصار عندي كاريزما وماني انسانه سطحيه او تافهه او مهمشه واعرف متى وقت الجد جد ووقت يكون المزح مزح
تزوجت واحد اكبر مني بسنه ونص فقط لكنه ما يحب سوالفي ولا الجلسه معاي ويتهرب ويفضل يجلس مع اي احد بس مو انا بعد فتره من الزواج احس اني تدمرت من داخل الين ضاعت ثقتي بنفسي صرت احاول اغير بالسوالف واشوف ايش يعجبه ونتكلم فيه احاول اني احكيله أشياء قريت عنها او شفتها اشوف ايش يعجبه وايش اهتماماته لكن مافي فايده
صار لي ثلاثة سنوات على هذا الحال لا يجلس معاي ولا يسولف معاي ولا يتحمل دقيقتين مع بعض يمل معاي بسرعه واذا جلس يكون مجامله لكن الصراحه مع اهله ومع الناس يطلع كل الضحك والسوالف وكل شي مخبيه عني
اكتشفت انه انسان مرح بس مو معاي وانسان يحب السوالف بس مو معاي هو عنده استعداد يجلس مع بنت اخته الصغيرة خمس ساعات لكن معاي يمل ويقوم
انا ما اصطنع المشاكل ولا نتمشكل مافي سبب يخليه يمل من قعدتي! كثير آكون بنص السالفه ويقوم ويتركني
شوفوا ايش صار امس كان جالس طول اليوم على اللاب توب يشوف مقطع يوتيوب وكنت انا لحالي في الصاله ارسلت له على الواتساب تعال اجلس معاي جاء وقال لي راح الوقت ما حسيت على اليوتيوب يالله انا طالع تبي شي قلت له لا وراح يسهر برا
كأن رسالتي هي اللي ذكرته راح الوقت عليك على اليوتيوب روح كمل السهر برا
كثير احرم نفسي طلعات ايام الأسبوع اقول وراه دوام وانتظر الويكند على احر من الجمر ويجي الويكند ومافي جديد لا هو اللي جلس معاي ولا هو اللي طلعنا نتمشى
قولولي كيف أتصرف غير العتاب والكلام لان خلاص تناقشت معاه وقال لي مافيك شي وقلت له اجلس معاي مثل اي زوجين قهوة وشاي وسوالف ولا صار شي يعني تكلمنا وتناقشنا كثير
ابي حل غير هالحل
ساعدوني احس بيننا فراغ وفجوه ما بينا كلام الا سطحي وكل مره توسع الفجوه