السكن لازم شرط عند العقد يكون مستقل والا تقبلي انه يماطل فيك
وخلاص الان ابو عيالك والطلاق دمار لك وللاطفال
تفاهمي معه ومادخل اللين في شي الا زانه

الله يعينك زوجك جد مو وجه حشيمه وعاجبه الوضع كذا وأهله بعد مبسوطين عنده زوجه وعيال بس قاطهم ولا يصرف عليهم افضل حل عشان تكسرين خشمه لا جا يشوف عياله قطيهم له وقولي له خذهم ماابيهم ربيهم انت عشان يصرف عليهم وشوفي اذا اهله ماطردوة هو بعياله عشان يعرف قيمتك ولا ترضخين او ترجعين له الا بشقه مستقله بدال مايلوي ذراعك بعيالك انتي الوي ذراعه فيهم خليه يعرف قيمتك

معها وعيالك بتحكم لك المحكمه الحضانه لك ولا تنسي تلزمينه بمصروف شهري كل شي عن طريق المحكمه،، الله يهديه او ياخذه هو وامثاله

الله يفرج لك ويوسع عليك ويسخر لك ابو عيالك ويحفظ لك عيالك امين وكل مسلم

عارفه اني لازم اشترط في العقد سكن مستقل لكن انتوا شفتوا وضعي المفروض ان اهلي هم الي ينبهوني اشرط هالشرط ولا انا وش عرفني و ماعندي خوات اكبر مني عشان اعرف ابوي من الناس اللي متأثره بموضوع تعقيدات الزواج والقروض ويقول اهم شي الاخلاق والدين وطبعا ماعرفنا اخلاقه الا بعد ماطاح الفاس بالراس وكان ابوي مستعد يساعد زوجي بكل شي وانا ماانكر اني يوم انخطب انبسطت وقمت اتخيل نفسي مخطوبه ولابسه دبله والبنات يسألوني في المدرسه وكذا هذا كان تفكيري 😢
لكن بعد ماضربني وطردتني امه ابوي وقف في وجهه ومارضي ارجع الا بسكن ويوم شافه يتحجج بالراتب عرض عليه يعطيه فلوس الايجار ومارضى زوجي قال ماطلبت فلوس من احد خالي مهندس يوم شافوا مافي امل يستأجر قاله بشوف خريطة بيتكم او شوف وقت يناسبك واجي بيتكم ونسوي درج وباب خارجي رفض بعد وقال بيتنا تفصيله كذا ومافي مجال للدرج !
طبعا يابنات انا عارفه ان المشكله بزوجي مو فقط بالسكن لكن انا ماني مضطره اتحمل العايله كلها زوجي اذا بتحمل اللي يسويه مو لسواد عيونه لان نفسي طابت لكن عشان اولادي الثلاثه وصبري كله عشانهم خايفه عليهم والله خايفةياخذ بنتي لو طلبت الطلاق ولا لو رحت المحكمه وطلبت الخلع بنتي عمرها سبع وسألت شيخ قالي ياخذها ابوها ولي يوم في الاسبوع ساعتين فقط اشوفها والله ماتخيل بنتي اشوفها يوم واحد وساعتين !
كأني غريبه عنها مو امها واخاف اعطيه العيال ويروح المحكمه ويقول تنازلت عنهم ..
طبعا انا ذكرت ان اخ زوجي الكبير دخل الشقه وانا نايمه دخل المطبخ وقام ينبش فيه وصحيت من نومي وعلي ملابس داخليه يابنات لقيته بوجهي وصرخت صرخه وطلع جري وهذا بوقت متأخر 12 او 1 بالليل وهذا من سنه ونص تقريبا وزوجي دوامه كان اخر ليل اتصلت عليه وقلت له رد علي ببرود ان اخوه مايدري اني موجوده يحسبني رحت انام عند اهلي !
وتبون تعرفون بعد
في نفاسي بولدي اللي عمره 5 سنوات كنت عند اهلي وزوجي يبات معاي اتصل اخوه مره وحده بس والظاهر ان زوجي مانتبه لاتصاله قام وكسر قفل الباب واخذ سير الجري وسحبه من شقتنا لشقته وهذي هدية ولادتي من زوجي اخذه بقراطيسه !
اكمل؟
اخر ولاده لي فتحوا شقتنا وصاروا يستخدمونها تخيلوا ملابسهم في الحمام والمطبخ ملعوب فيه قدور مو مغسوله وغرفة نومي ناموا فيها حماي وزوجته بحجة يغيرون جو!
وزوجة حماي الكبير اللي عايشه معاي بالبيت ام زوجي نفس الشي طفشتها وطردوا امها واتذكر كلامها قالته لي اول ماتزوجت واللي مصبرها ان زوجها محترمها
يعني عشان ماشرطت عليه سكن وطبعا مو عشان انا متنازله مثلا لا كله بسبب الجهل وعدم الادراك وبسبب وثوق ابوي في كلامه لما يجينا عيال نطلع
يعني ارضى ينتهكون ستري وخصوصيتي عشان جهل وطيبه وثقه انا ماغلطت عشان استاهل هالوضع
وين الاحترام وين الدين الدين يحرم ان الانسان يطل من سطح جاره او يعلي طوفه على طوف جاره وهذا اخوه دخل وشافني عريانه وين اداب الاستئذان واهم يدخلون حتى من النافذه اكثر من مره اخو زوجي يطب من النافذه !
يوم رجعت من بعد ماطردتني امه ومن بعد ماضربني ووقع تعهد قلت خلاص مستحيل اهله يتجرؤون يسوون شي او يعيدون تصرفاتهم لاني قلت كل شي لاهلي لكن لا الوضع كل ماجاه ويصير اسوأ صارت ام زوجي تجاهر بالكلام الغلط ليش طيب عشاني محترمه وماأرد تأذيني قبل طلعتي باسبوع يلعني لاني تأخرت 5 دقايق والسبب ولدي دخل الحمام وطول وكل بيتهم يسمعون اللعن انا فوق واسمع لعنه وصراخه ويوم نزلت امه كانت واقفه معاه واهو يقول لعنات عليها وعلى ام اللي جابتها لازم تأخرني تدرون امه وش قالت لاتتعب نفسك هذي االي ماتخاف ربها تبي تفصلك من دوامك وتبني مستقبلها ودراستها على ظهرك!
وعرفت اني سمعتها قامت تطالعني بنظرات بدل ماتستحي
ليش طيب بدل ماتهدي الوضع وتتكلم بالحق وتقوله عيب تسب و تلعن اهلها من الصبح
يوم نزل حافز كنت مقدمه ملفي في الجامعه ومقبوله بتخصص احسن من هذا شيشته اخته علي قالت حافز اضمن تقول كافي ثانويه ليه جامعه وخرابيط تدرون سحب ملفي سنه كامله سجلني حافز عشان الفلوس وضليت عايشه بمشاكل عشان ارجع اقدم ملفي ومن تشوفني اخته تقط كلام مثلا ولدي في زكام تقول لزوجي مسكين الولد حرام اصلا بهالعمر ينترك والزكام من طلعته كل يوم الصباح طيب اذاخايفيين على عيال اخوهم من طلعة الصبح يمسكونهم عندهم بدل ماوديهم لامي ولا بس عشان التخريب
تدرون ان صالتهم ماتخلى وازواج خواته يجون ويجلسون على الدرج يشربون زقاير مره كنت بمر وزوج اخته جالس قلت له وخر بمر وخواله من الصبح يجون واعيال خواته في بعمري وفي اكبر مني ينامون بالصالة ويطفون الانوار بالله كيف نمر والصاله صارت غرفة نوم
يوم استدعاني في المحكمه قلت كل هذا للشيخ وكذبني زوجي وانكر

😢😢😢