زوجي مع التدخين

السلام عليكم ورحمة الله وبركاته

هذي اول مشاركه لي في المنتدى واتمنى الاقي ارآء اقدر استفيد منها
باختصار انا متزوجه من عشر سنين والحمد لله حياتي مع زوجي خاليه من المشاكل الكبيره
قبل زواجنا كان زوجي يدخن وترك التدخين يوم ما خطبني وكان يحكيني انه ارتاح لما تركه
واستمرينا على هذا الحال الى بداية هذي السنه وصرت اشم فيه ريحة الدخان ولما اسأله يقول انه من اصحابه
او من المكان اللي هو فيه وانا ما احاول ادقق لاني ما ابغى اسوي معاه مشكله وانا ما اشوفه يدخن وما يسهر
برى البيت غير في الاجازه لما نروح عند اهله
المهم مره رحت عند ناس ولما اخذني نزل من السياره يفتح الباب للعيال شفت البكت في باب السيره وياالله يوم شفته حسيت الدنيا دارت وجلست يومين وانا مهمومه وبعدين صارحته وقالي انه مو ادمان بس لزوم العمل ولما شافني زعلانه قال انه راح يبطل والى الان ما تركه وحسيت انه لما اكلمه عنه يرجع له بزياده وقلت له اوعدك اني ما اجيب طاريه لو وعدتني انك تسيبه للابد قال اوعدك بس ما احدد وقت يعني قريب او بعيد وانا وافقت على امل انه يوفي بوعده وكل يوم وانا اترقب وادعي له بالهدايه في كل وقت
ايش رايكم يا بنات انا غلطانه اني وعدته اني ما ازن عليه ؟؟
وكيف اثق انه راح يتركه ؟ اخاف يطول الوقت يعني يستمر سنين , يمكن اكون ابالغ بس ما اتحمل ريحته بالمره
واخاف اكره زوجي بسببه
واللي عندها تجارب تساعدني الله يجزاكم الخير
وآسفه على التطويل