زوجي وأهل زوجي المستفزين

السلام عليكم
عندي مشاكل كتير ، صحيح كلها صغيرة لكن كتر المشاكل الصغيرة تتعب الوحدة
ابدأ بالأب دايماً يخاصم على أتفه حاجه حتى لو مو انا سويتها يعني اللي يخاف يقوله لبناته يقوله ليا انا ولو قلت له طيب انا ماعمري سويت كدا يقول انا عارف يابنتي لكن اقولك يعني لا تسوي كدا .. طيب ليش تخاصم ؟ ودايما محترمة معاه وحتى هو يقول والله انتي أخلاقك عالية وبنت رجال .. بس برضه ماينفعني إنّو شخص يعرف اني محترمته وصابرة عليه ومع ذلك مستمر في غلطه 😭
وأخوات زوجي كلهم قليلات أدب ووقحات كثير يسووا فيا مواقف بايخة .. واهم شي عندهم المظاهر والفلوس .. بحكي مواقف مثلاً مرره نزلت لهم ودائماً انزل لهم وأكون لابسة لَبْس حلو يعني مو بجامة مع إنّو نفس البيت بس لازم أكون لابسة لَبْس حلو ، وكان عندهم ضيوف ولما فتحت الباب جات اخته وقالت اطلعي البسي بسرعة وابتسمت وعادي وطلعت لبست وقالت لا مو حلو لبسك ذَا كمان قديم وبعدين يقولون اخويا ما يعطيك فلوس قلت ببالي هي الحقيقة ماعندنا فلوس كلها دين ومصروف لك انتي واخواتك 😒وموقف تاني دايما لما انزل لهم ويكونوا في غرفة مع بعض ولما اجي يقولون بصوت واضح خلاص خلاص غيروا الموضوع .. طيب في طريقة لبِقة تغيرين فيها الموضوع انتي وهيا ليش الوقاحة ؟ وفوق كدا يتفرقون وكلهم يخرجوا من الغرفة وابقى لوحدي بغرفتهم وأحياناً ما يخرجوا بس كل وحدة تحط السماعة في إذنها .. وعمري ما سويت لهم شي دايماً محترمتهم واعاملهم كويس. وأحياناً كل وحدة تقول انا ابغى اتغدى مع اخواني ويروحون كلهم يتغذون مع بعض وانا اجلس لوحدي على السفرة وهم مع الرجال اخوانهم وأمهم وأبوهم .. عييييب حتى رمضان يسووها فيا
ومره رحنا زواج وزوجي هو اللي رجعنا ولما وصلنا البيت وقفت شوي انتظر زوجي يدخل الحوش عشان أتكلم معاه شويتين لوحدنا ويشوفني لانه بيروح لاصحابه يسهر معاهم وبعدها طلعت لهم كان ودي أسهر معاهم وانصدمت إنّو يتكلمون فيا وحدة تقول "يعني تحب زوجها مسكينة" وما فكرت إنّو يقصدوني وجات التانية تقول المشكله إنّو هيا زوجة اخويا وتسوي فينا كدا .. وبعدين سكتوا لما دخلت وانا مصدومة مادري ليش قالوا كدا ما سويت لهم ولا حاجة وسحبت نفسي وطلعت البيت ونمت مقهورة نفسي اعرف ليش قالوا عني كدا


المهم صرت ما اتحملهم مواقفهم اكتر من كذا اكتر بكتييييي