زوجي واخته من ابوه شورو علينا بالحل المناسب

السلام عليكم
زوجي واخته من ابوه علاقتهم من يوم ماتزوجته متوترة جدا
اسباب توترهم كثيرة منها اخوهم لي توفى قبل سنتين وحرمته
فيه مشاكل كثيرة كانت بين المرحوم وحرمته مع اخته هذي
وبعد ما مات صارو تبغى تنتقم من الحرمة وابنها
الاخت تبغى زوجي يقطع المصروف عن الحرمة والولد ويطرد الحرمة من الشقة لي ساكنة فيها وترجع ل اخوانها مع انها عارفة انه اخوانها رافضين يستقبلونها ورافضين الولد اصلا
واذا استقبلوها مصيرها خدامة لحريمهم
ونفس الشي ماشية بقسوة قلب وتحريض عالحرمة وعالولد خصوصا
اولها تجي عند ابوها وزوجة ابوها والحريم وانا تنبهنا انه وجود هالحرمة خطر علينا وانها بيوم راح تسحب واحد من رجالنا وانها ساحرة وان اخوها كان ماسك عليها ادلة ومدري ايش
والحرمة معروفة عند الجميع انها شخصيتها ضعيفة جدا وجملة وحدة ماتعرف تكون
وثاني شي تحرض ابوها وتعبي راسه تقوله ترا ولدك ترك فلوس وخير عندها وهي ماخذتهم لها وتصرف منهم وتأسس مشاريع بالسر ولازم ترفع عليها قضية وابوها يهزئها ويطردها
والكل يعرف انه المرحوم ماترك شي اصلا مات مديون وزوجي لي سدد ديونه كلها
طبعا هي تركيزها الاكبر على زوجي لانه زوجي مهتم بالولد وامه ومصروفهم من وإلى عليه
وذكرت هذا الشي بمواضيعي من قبل
وهي كل فترة يجن جنونها عليه بسبب هالموضوع وتجي تهزئه وتحرضه وليه تصرف فلوسك عالولد وعيالك احق منه وخلي امه تتوظف وتصرف عليه
زوجي قالها وش تبغين انتي انا طلبت منك ريال عشان اصرف على ابن اخوي والولد يتيم فقد ابوه وهو عمره 7 سنوات ليه تبغينه يتشتت ويعيش طفولة بائسة
وذيك تقوله خلها تروح بيت اخوانها والولد انا اخذه اربيه ببيتي مع عيالي
وياما تروح تهزأ الحرمة وتهددها انها بترفع عليها قضية وتتهمها انها ماخذة فلوس من زوجها قبل لايتوفى وذيك تخاف على طول وتجي تستنجد
لي صار قبل اسبوع اني قلت لزوجي يجيب سواق لها مادامه مقتدر ماليا وفعلا زوجي جاب سيارة وسواق للحرمة وابنها يقضي كل مشاويرهم بحكم انه زوجي هو لي كان يقضي كل مشاويرها اذا احتاجت شي
وذيك جن جنونها وجاتنا اول امس مع ابنها معصبة وتقوله ليه ماقلت لي وليه ما استأذنتني وبدأت تقط بالكلام وتخربط وتقوله انت مالك شغل وانا اخته الشقيقة ومدري ايش
زوجي قالها خلاصة الكلام
فكي الحرمة وابنها من شرك وخلي الولد يتربى بعز جده واعمامه وانتي مالك شغل بشي وبدأت تزيد بالكلام الين عصب عليها وقام طردها طرد من البيت هي وابنها وحلف عليها ماتكلمه ولا تدخل بيته ثاني
ومن امس راسلة له رسالة تقوله انا لي عندك فلوس ولي حصتي بالمصنع معاك ابغى فلوسها كاش ولا بنزل برفع عليك قضية بالمحكمة ومدري على ايش يترفع قضية هالمريضة نفسيا
وفوقها معبية راس عمي على زوجي الين اتصل فيه وقعد يقوله انت قاعد تتصرف من نفسك بالفلوس والخير وماتتعداني ثاني وترجع لي وزوجي لا هو فاهم الموضوع ولا عمي بالاصل فاهم وش السالفة بس ذيك معبية راسه على زوجي
واخوه الثاني نفس الشي يهاجمه
الين زوجي اليوم اتصل عليها غسل شراعها وتهاوش مع زوجها ومع عيالها بسبب هالموضوع