زوجي والجوال

اهدي يا أختي اذا زوجك كان سابقا ما يفتش ولا يمسك جوالك وفجأة صار يفتش هذا معناته شاك بحاجة لان اصلأ مو حقه يفتش هذي خصوصية لكن اذا شاك الشكوى على الله خليه يتأكد لكن مو كل مرة بيأًخذه حجة أنت فتشت وعرفت الجوال ايش فيه خلاص المسألة هنا تنتهي
لان الحياة الزوجية اذا ما كانت الثقة بين الزوجين موجودة اصبحت دماااار واذا دخل الشك بينهم الاستقرار اهتز لذلك خذي الموضوع بهدوء وأعطيه الأمان لحد ما يخف الشك عنده ويحس ان امورك طبيعية ويبعد الشكوك عنه وحاوريه في الموضوع بوقت يكون فيه هادي وبدون عصبية وبدون اسئلة مين حط الشك برأسك ومن ها الكلام خليك متوزانه وواثقه من نفسك قدام حركته هذي
والله يسر أمرك ويزرع الألفةو المحبة والثقة بينكم يارب 🌹

اذا انتي تمسكين جواله عادي،يمسك جوالك بس انتي ممنوع وهو مسموح لا والله امسكي جواله وفتشيه والله يبطل يمسك جوالك

الله يجبر بخاطرك ي ام منال والله اني واثقة من نفسسي وحافظته بوجوده وبغيابه واكثر من مرة يفتش جوالي بحجة انه يبي يتطمن ويرتاح من الشكوك اللي براسه واخرتها امس قلت له ليه تتزوج وحدة مانت واثق ب اخلاقها ما اتحممل هالاهانة مو من حقه ابدا والمشكلة واللي يقهر انه عارفني وعارف اخلاقي وواثق بهالشي بس فيه اشخاص انذال الله لايوفقهم يلعبون براسه ويدخلون الشك بقلبه علي وانا شخصيا قريت مسجاتهم له عن ثقته فيني كلام يخلي الواحد يفقد الثقة باللي حوله ولما اناقشه يقول ما فيه خصوصية بين الزوجين والشيطان يدخل بينهم عشان كذا لازم اتطمن والله الكل يشهد لي بالاخلاق والسمعة الطيبةة وقبل كل شي حاطة مخافة رب العالمين بين عيوني مااااانممت ولا ارتحت الله وكيلك اغلي ومحترق دمي من تصرفه

ام عيالك الله يخليهم لك ويخليك لهم والله ما افتح جواله ولا افكر اشوفه ولا هو من اهتماماتي وكذا مرة يقول اعطيك جوالي تشوفينه ادري فيه ماهو صادق بس انا ارفض وش ابي بجوالك اشوفه خلاص اسمه جواله يعني من ممتلكاته وخصوصياته وبكيفه يسوي اللي يسويه فيه افتشه واقهر نفسي ليه الله يتكفل فيه اذا هو يعمل شي مو كويس مو أنا

بلغي احد اخوانك .. لانه يعتبر تشكيك فيك ..
انا صارت لي نفس مشكلتك ..


كل ما تناقشنا ف اي شيء وزعل يروح يفتش جوالي .. ف البدايه طنشت وجلست اضحك ..

وكررها ... وكررها .. قلت ي ابن الناس ترى منت ماخذني من الشارع قاعد تفتش جوالي ..
والله لو جلست كل العمر تفتش مابتلاقي عليه زله وحده .. لاني بنت فلانه ..

الغلط ماسويته وانا مراهقه باقي ع بالك بأسويه اللحين ..
اذا انت تشوف اني مو محل ثقه .. ترى التربيه تفرق .. وما اتوقع احد امي تربيه وممكن يغلط بالحياه..

وبعدها زعلت منه ورحت غرفه وسكرت علي ..
جاني يدق الباب يقول وش تسوين ..

فتحت الباب وتجهزت وقلت ودني عند اهلي ي الذيب .. بروح اسمر معهم ..

قال طيب ..
وداني ع اساس بس زياره ..
وجلست عندهم اسبوعين .. طبعا جاء ذاك اليوم ع اساس بيدق علي يقول بأمرك ..

قلت تمر مين .؟
تمر اللي تشك فيها ..؟



عموما .. متى مافكرت وش بتسوي انا لي بيت تجي تتفاهم مع اخوي فلان. لان الموضوع صار عنده

جاء واخذ له كلمة ف عضمه

ومن بعدها ماعمره مسك جوالي