زوجي والدق ب الكلام فهموني ☹️

صباحكم ورد بنات 🌹
عندي مشكله بسيطة مع زوجي .
لي سنتين متزوجة وحامل اول حمل ربي يتمم لي ولكل حامل يارب 🌹وحابه توجهوني وتنصحوني كيف اتصرف وكمان لان زوجي اكبر مني بكثير وعمري 24 سنه .
المهم بعطيكم نبذه عن زوجي 😩
هو كويس وقلبه طيب مررره لدرجة اشوفه اطيب مني من تعامله وحنيته وكريم جدا ويحب الرومنسيه والاهتماام ويحب يستشيرني في كل شيء بس شخصيته عموما من النوع اللي يحب المزح الثقيل والرجة واذا صار عنده شغله حماسي مررره . بس اوقاات من مزحه مع الناس تخلي ماله هيبه لان بعضهم صار مايحترمه ويرمي عليه كلااام ويستغله .
انا عكسه تماما صحيح ماقصر معه من ناحية الاهتمام بس انا طبعي هاديه وثقيله وحتى اذا مزحت معه بثقل هو لا برجه لدرجة ماعطيه ع عمره كأنه اصغر . المهم هو عارفني قبل يأخذني وتقريبا انسجمنا مع بعض
بس السنه الثانيه من زواجي وخلال الاشهر هذي ملاحظه عليه انه يدقني ب الكلاام .
وينتقد كثير
ومن المواقف انه مره كان يتفرج ع التلفزيون ومنسجم معه ومره يسولف معي وانا مجهزه قهوتي له وجاالسه نتقهوا واسولف معه . وتحمست انا وكملت سوالف لانه يبي كذا يحب السوالف والمزح فجأة عصب وقال اسكتي انا اتفرج ! انتبهت لنفسي وفعلا سكت وعادي مازعلت لانه ممكن خربت عليه و ثاني يوم نفس الشيء يتفرج جبت له قهوته وجلست بس ساكته لاني مابي ازعجه فجأة كمان زعل ! وقام يسب ويقول انتي بارده ماعندك حماس وانه حريم اخواني احسن منك . وتهاوشناا 😩
المهم اليوم الثاني كأن ماصار شيء واعتذر .
بعدها لاحظت عليه صار بس يمدح في اهله لان طروفهم الماديه افضل ماشاء الله واهلي بنعمه الحمدلله بس هو يشوف انهم في عز وصارت سوالفه عن العز ما العز لان كل خواته واخوانه وظائفهم ممتازه ماشاء الله انا رديت عليه وقلت الله يبارك لكم وصرت معه امدح حتى اخواته و احترمهم .يحاول يستفزني بس سكت .
اليوم اللي بعده طلعنا نتمشى وكان مشغل اغنيه فيها توصيف لبنت مزيونه وانها بنت العز
قال هو اي والله وينها بنت العز بس ! يقولها ب اسلوب كأنه ماعنده بنت عز بعد !! او انه شايفني اقل منه ومستحقرني !
حسيت انه يدق ب الكلام او انا يتهيأ لي
المهم اليوم الثاني ،
امه اتصلت عليه تبي يسافر لمدينه تبعد عن ديرتنا تقريبا ساعتين تبيه يجيب لها شغاله وقالت روح انت واهلك وجيبوها قال ابشري وخبرني المهم رجع اتصل ع امه وقال لها تروح معي بنت اختي وحط عذر لاني حامل ومايبي يتعبني وانا قلت بكيفك عادي بس ماتأخذ الشغاله لحالكم صعبه
المهم قالت امه لا اذا زوجتك تقدر تروح خذها معك افضل بدال ما. تشغل الناس بنت اخته هذي متزوجة .
المهم قال خلاص وتحمس معي قال اجل تروحين و نتعشى هناك ونبي نتمشى قبل نأخذ الشغاله قلت اوك معك
وبعد ماوصلنا واحنا نتمشى قال لو ماخذ بنت اختي احسن قلت ليه قال تصلح تكون معي واستانس معهااا موب مثل ناس تدبل الكبد !
وسكت هنا قال ترى ما اقصدك .
وبعد مارجعناا فتح موضوع يسولف فيه ومتحمس ودخلت معه ف الموضوع وخليته يقول لي قصص المهم صار زي النقاش لانه يبي رأيي ف الموضوع واذا اعطيته اللي عندي قال اسكتي ولا عاد تفتحين فمك ! طيب انت تبي ردي عليك تبي سوالف وكل ماجيت ابدا بس اسولف سكتني مادري كيف اتصرف معه تعبت معه احسه متناقض
واحياانا افكر. انه خلاص ماعاد يبيني والواحد الزم ماعليه كرامته بس هو تصرفاته زي الدق موب صريح يعني انا شاكه انه مايبغاني لانه صاير بس ينتقد حتى تصرفاتي واليوم الثاني اشوفه عكس طاير معي احترت والله ☹️انتم ايش شايفين وهل وضعي طبيعي ولا انا صايره ادقق كمااان 😩😩