زوجي والشراب

السلام عليكم ورحمة الله وبركاته
انا سجلت هنا خصيصًا عشان تساعدوني في مشكلتي
متزوجة من ١٠ أشهر ليس لدي ابناء ولا حامل
زوجي فيه ايجابيات كثيره الحمدلله
ولكن فيه سلبيات ماقدر اتجاوزها اولها انه ماكان يصلي وتعبت وانا احاول فيه وانصحه استجاب لي نوعا ما بس لازال مو حريص جدًا عليها يصلي بس قدامي من وراي مايصلي دايم
عيبه الثاني كثييير الكذب خصوصا وقت اللي يسافر فيه لاحد الدول الخليجية بعض الاحيان يقولي رايح للخبر ويروح للدولة الخليجية اكثر من مره كذب علي بهالموضوع
اخر مره راح فيها لهذي الدولة هذا الويكند وكان في فاتورة لمطعم داخل فندق واكتشفت ان في الفاتوره طلب بيرة ( كرونا) طبعا هذي البيره بحثت عنها فيها نسبة من الكحول مو نسبة كبيرة بس فيها نسبة وتعتبر طبعًا حرام والشخص يحتاج يشرب اكثر من وحده عشان يسكر
طبعا واجهته بكل هدوء وقلت له انا ماراضاها لا عليك ولا على نفسي وانا راح اساعدك وراح اوقف معك وانا شاريتك ومن هذا الكلام
طبعا هو ردة فعله كانت جحود في جحود وقالي انه كان طالب مشروب غازي بس هم سجلوها هذا بالفاتوره هذي البيره لان المشروب مو موجود بالسستم ! طبعا انا ماصدقته وهو يحلف انه كان طالب مشروب وانه ماطلب كرونا وماصدقت وعصب وانتي تكذبيني حتى وانا حالف
قلت له احلف بالقران وبصدقك قال القران مو لعبة كل شي احلف فيه قلت بس هذا الموضوع مو بسيط !!! عادي تحلف ومارضى ! قلت له طيب ابي اروح معك هذا المطعم وبطلب معك المشروب الغازي وبشوف يسجلونه بالفاتوره كرونا ولا لا قالي المطعم كله شباب وفيه بار مستحيل اوديك له !!!
الحين انا مو عارفه وش اسوي وكيف اتعامل معه !!
انا قلت له بساعدك وبوقف معك لين تترك هالشي وتبعد عن الحرام بس المشكلة هو لازال ينكر ومو راضي يعترف ويحلف !!
وش اسوي ساعدوني الله يعافيكم