زوجي والشعر والبنات

السلام عليكم ورحمه الله وبركاته

اكتب لكم يابنات عالم حواء مشكلتي وانا مالي غير الله ثم انتم اشتكيلكم
مدري من وين ابدي
انا متزوجه من رجال غامض مايحب احد يمسك جواله ولا يعرف وش يكتب ولا شي
المهم انا شكيت بزوجي كل ماشافني طفى جواله ويموت ولا يحط جواله عندي يمكن ينجلط لاشاف جواله جنبي
وبيوم من الايام قدرت افتح جواله وادخل اشوف وش سالفته
لقيت برنامج حق الشعر وزوجي مسجل فيه من سنين
ويسولف مع البنات وعايش عالم ثاني عاشق ولهان ومسوي نفسه انه عاشق وحده بالشات بالشعر وانه يتيم وانه مو متزوج مع ان حنا متزوجين من عشر سنين
وكلامه كلام مراهق بس باادب بس يكتب اشتقت لك يافلانه واشتقت لكتاباتك و يتناجر مع وحده شكلهم يحطون ع بعض وحابين اسلوب بعض ويفقدون بعض من كلامه بالمنشورات
الرجال بالبرنامج يسبونه ويقولون انت كل شوي وحده قايمه عليك استح على الشارب اللي بوجهك وهو يحسبهم غيرانين منه وهو ولا همه بس يكتب عن الشوق وعن فلانه اللي فاقدها وانه مظلوم ومقهور من دنيته وان زواجه بعد كم شهر وهو كذاب الله ينتقم لي منه
والمهم واوجهه واقوله باسلوب زين ليه تتكلم مع البنات وانت تحلف انك ماقد كلمت بنت تدرون وش سوى سحبني بيوديني بيت اهلي بنص الليل واهلي بمدينه بعيده وفعلا وداني لديره اهلي وانا اشحذه لايطلق
ويقولي انتي فتحتي جوالي وزعلان والله فكني من شره وهدى وطاح اللي براسه ومعصب مني ورجعت لبيتي
وبعد كم يوم حلفلي بالطلاق انه مايرجع للبرنامج ومسحه قدامي وحلف علي مااحمل البرنامج بجوالي حلف قال تحرمين علي
وحلف انه يمسح البرنامج وقال علي الطلاق وحلف بالمصحف مايحمله باي جوال وولا يكتب فيه


وانا طبعا مالصدقه وسالت شيخ ان لو ادخل البرنامج بقوقل واشوف زوجي ع كلامه ولا لا قال الشيخ ادخلي وشوفي زوجك لايمشي بالهطريق
المهم وامس لقيته داخل البرنامج باسم ثاني وقال انا فلان اللي كان اسمي كذا ورجع يكلم البنات
ورحت وقلت لاختي تحملي البرنامج بجوال بنتي وحملته ودخلت البرنامج واشوف وتاكد الا هذا زوجي اللي يرسل ويكتب بالبرنامج وهو حالف بالطلاق وبالمصحف مايرجعله


انا سويت هالطريقه عشان ماسوي اللي حلف فيه اللي هو احمل البرنامج بجهازي
اللحين شسوي بزوجي مدري هو خاين ولا كل الناس كذا عادي بالبرامج هذي يسولفًون البنات مع الرجال عادي ويدخلون خاص وعادي شكلي انا الوحيده البقره اللي واثقه من زوجها
ترى اسلوبي بارد يوم اكتب ولا بقلبي نار مشتبه ومقهوره وودي اذبحه الله لايسامحه انا اختكم انصحوني
للمعلوميه انا عمري 29
وزوجي 46 بس كبير وعقله عقل مراه