زوجي والشغاله الحبشيه

سلام الله عليكم يابنات


انا الله يسلمكم على وشك ولاده يعني اليوم ولا بكرا

وتعرفون الوحده لما تكون نفاس تحتاج من يخدمها

لأن مستحييييل هي تقوم بنفسها خصوصا الايام الاولى من النفاس

وأنا مشكلتي اهلي بعيدين عني ومستحيل يجون لأن راح تكون ولادتي بوقت امتحانات

وعندي شغاله تعل القلب عل جديده ولا تفهم ولاعندها نيه تفهم


وقررت اجيب شغاله حبشيه وزوجي رااافض الفكره

يقول الموضوع مايستاهل وأنا اقوله كيف مايستاهل أنا بضيع وعيالي بعد ولا راح نلقى من يشوف اكلنا

وحمواتي بيوتهم بعيده لو حاولوا يخدموني مايقدرون وبتصير سالفه على ود وجب

والشغاله اللي عندي غبيه بالدرجه الاولى

حاولت اعلمها لكن طبخها حووووسه ولاااازم كل حركه اشرف عليها

حتى طول النار وقصرها ....والله انها تطول على الاكل ويحرق وهي ولا كنها تشوف مدري غبا ولا ايش

وزوجي مو راضي يقول وش يبي اكلك انا اسويه ولا اجيب لك من برا قلت له اكل النفاس انت ماتعرفه ومو معقوله بتسويه انت يعني بتجلس عندي طول اليوم تودي وتجيب بذا الاكل طبعاً كله كلام لاطاح الفاس بالراس راح وخلاني


والله ضايق صدري يابنات وابي احد يهون علي لأني مدري وش بيصير فيني وقتها ووش لون بهتم بنفسي قسم بالله نفسيتي زفت

واللي مضيق صدري مررره عندي بنت عمرها سنه ونص يعني يبغالها اهتمام كيف بوفق بين المولود وأنا وهالبنت
هالشغاله اللي عندي زييين ان أهتمت ببنتي يعني لو بمسكه الطبخ راح احتاس وراح تهمل البنت

ايضاً تعرفون لو بنام ولا شي بخليها تترك كل الشغل وتنتبه لها ماراح ارتاح وهي تطبخ لي والبنت بوجهها لأن ماعليها اتكال ابد والله مره لقيت بنتي طالعه للسطح وانا مأكده عليها تنتبه لها اجل كيف لو بمسكها الطبخ .....والله لو ينكب على بنت شي أقل ماتقول ماشفتها ولا مادريت
الله ياخذها من شغاله

هو اللي اختارها جديده ولا نا ماأبي هالجنسيه ابد بس قال بجيب جديده عشان تجي على كيفنا وأنا اقوله السيريلانكيه اللي سبق لها العمل احسن من هالجنسيه الأندونيسيه الحين

معليش يابنات كثرت كلام بس والله من حر مافيني حبيت افضفض